Cuttack Durga Puja / କଟକ ଦଶହରା ପାଇଁ କମିସନରେଟ ପୋଲିସର ବଡ଼ ପ୍ଲାନ୍; ୬୦ ପ୍ଲାଟୁନ ପୋଲିସ ଫୋର୍ସ ମୁତୟନ

କଟକ: ଧରାପୃଷ୍ଠକୁ ଅବତରଣ କରିଛନ୍ତି ଦୁର୍ଗତିନାଶିନୀ ଦେବୀ ମା' । ଦଶହରାରେ ଝଲସିବ କଟକ ସହର । ମାଆଙ୍କୁ ଦର୍ଶନ କରିବେ ଲକ୍ଷ ଲକ୍ଷ ଶ୍ରଦ୍ଧାଳୁ । ଆଉ ଏହି ଭିଡ଼ ଭିତରେ ଶାନ୍ତିଶୃଙ୍ଖଳା ବଜାୟ ରଖିବା ପୋଲିସ ପାଇଁ ରହିବ ବଡ଼ ଚ୍ୟାଲେଞ୍ଜ । ତେଣୁ ଚଳିତ ବର୍ଷ ଦଶହରା ପାଇଁ କମିସନରେଟ୍ ପୋଲିସ ସମ୍ପୂର୍ଣ୍ଣ ପ୍ରସ୍ତୁତ । ଦୁର୍ଗାପୂଜାକୁ ଶାନ୍ତି ଶୃଙ୍ଖଳା ସହ ସମାପନ କରିବା ପାଇଁ ୬୦ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ ।

• ସମସ୍ତଙ୍କ ଉପରେ ନଜର ରଖିବ ୧୩୦୦ ସିସିଟିଭି

ଏହାସହିତ ୫୦୦ ଅଫିସର, ୨୧୦୦ ଓଆର ଏବଂ ଏପିଆର କନଷ୍ଟେବଳ, ୬ ପ୍ଲାଟୁନ ୨ କମ୍ପାନୀ ସିଏପିଏଫ ମୁତୟନ ରହିବେ । ୫୭ଟି ଏଡ଼ ପୋଷ୍ଟ ବିଭିନ୍ନ ସ୍ଥାନରେ କରାଯିବ । ଟ୍ରାଫିକ ପରିଚାଳନା ପାଇଁ ସମସ୍ତ ପ୍ରକାରର ବ୍ୟବସ୍ଥା ଗ୍ରହଣ କରାଯାଇଛି । ୧୩୦୦ଟି ସିସିଟିଭିରେ ସମସ୍ତ ସ୍ଥାନ ଉପରେ ନଜର ରଖାଯିବ । କୌଣସି ସ୍ଥାନରେ ବିଶୁଙ୍ଖଳା ହେଲେ ସେହି ସ୍ଥାନରେ ଉପସ୍ଥିତ ପୋଲିସ ଅଫିସର ପଦକ୍ଷେପ ଗ୍ରହଣ କରିବେ ।

ଆଜି ଇଣ୍ଡୋର ଷ୍ଟାଡିୟମରେ ଆୟୋଜିତ ପୋଲିସ ବ୍ରିଫିଙ୍ଗରେ ସମସ୍ତଙ୍କ ଦାୟିତ୍ୱ ସଠିକ ଭାବରେ ବୁଝାଇ ଦିଆଯାଇଛି । ଦୁର୍ଗା ପୂଜାକୁ ଶାନ୍ତି ଶୃଙ୍ଖଳା ସହ କରିବା ପାଇଁ କମିଶନରେଟ ପୋଲିସ ପକ୍ଷରୁ ସମସ୍ତ ପ୍ରକାରର ବ୍ୟବସ୍ଥା ଗ୍ରହଣ କାରାଯାଇଛି । ଆୟୋଜିତ ପୋଲିସ ବ୍ରିଫିଙ୍ଗରେ କଟକ ଭୁବନେଶ୍ୱର ପୋଲିସ କମିଶନରଙ୍କ ସହ ଅତିରିକ୍ତ ପୋଲିସ କମିଶନର, କଟକ ଡିସିପି, ଅତିରିକ୍ତ ଡିସିପିମାନେ ଉପସ୍ଥିତ ରହିଥିଲେ ।

• ପୂଜା କମିଟିରେ ରହିବେ ୧୦ଜଣ ଭଲ୍ୟୁଣ୍ଟର

ପୂଜା ମଣ୍ଡପରୁ ଭିଡ଼ ନିୟନ୍ତ୍ରଣ, ସୁରକ୍ଷା ବ୍ୟବସ୍ଥାରୁ ଆରମ୍ଭ କରି ଶୃଙ୍ଖଳିତ ଦର୍ଶନ ପର୍ଯ୍ୟନ୍ତ ସବୁଥିରେ ସହଯୋଗ କରିବେ ପୂଜା କମିଟିର ସ୍ୱେଚ୍ଛାସେବୀ । ପ୍ରତ୍ୟେକ ପୂଜା କମିଟିରେ ରହିବେ ୧୦ ଜଣ ଭଲ୍ୟୁଣ୍ଟର । ଏଥିପାଇଁ ସେମାନଙ୍କୁ ଟି-ସାର୍ଟ, ପରିଚୟପତ୍ର ଓ ହୁଇସିଲ୍ ପ୍ରଦାନ କରିଛନ୍ତି କଟକ ଡିସିପି । ପୂଜା ଆରମ୍ଭରୁ ଶେଷ ପର୍ଯ୍ୟନ୍ତ ପୋଲିସକୁ ସହଯୋଗ କରିବେ ଏହି ଭଲ୍ୟୁଣ୍ଟରମାନେ । ଚଳିତ ବର୍ଷ ପୂଜାରେ ଏହି ଭଲ୍ୟୁଣ୍ଟରମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ ବୋଲି କହିଛନ୍ତି କଟକ ଡିସିପି ।

ପଢନ୍ତୁ ଏହି ଖବର: ସରପଞ୍ଚ ଓ ନାଏବ ସରପଞ୍ଚଙ୍କ ପାଇଁ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା; ମିଳିବ ୬ ମାସର ବୋନସ୍

• ୧୮୦ଟି ମଣ୍ଡପରେ ହେବ ପୂଜା

ଚଳିତ ବର୍ଷ ସହରରେ ପାଖାପାଖି ୧୮୦ ଟି ମଣ୍ଡପରେ ହେବ ପୂଜା । ତେବେ କଟକର ଐତିହାସିକ ଦଶହରାକୁ ଶୃଙ୍ଖଳିତ ଓ ସୁରକ୍ଷିତ କରିବା ପାଇଁ ପୋଲିସ ଓ ପୂଜା କମିଟି ମଧ୍ୟରେ ଉତ୍ତମ ସମନ୍ୱୟ ରକ୍ଷା କରି କାର୍ଯ୍ୟ କରିବେ ଏହି ଭଲ୍ୟୁଣ୍ଟରମାନେ । ସବୁ ଭଲ୍ୟୁଣ୍ଟରମାନଙ୍କୁ ଥାନା ୱାରୀ ଦିଆଯିବ ପ୍ରଶିକ୍ଷଣ । ପୂଜା ଆରମ୍ଭରୁ ଭସାଣୀ ଶେଷ ହେବା ପର୍ଯ୍ୟନ୍ତ ଏହି ଭଲ୍ୟୁଣ୍ଟରମାନଙ୍କ ରହିବ ବେଶ୍ ଗୁରୁତ୍ୱପୂର୍ଣ୍ଣ ଭୂମିକା । ତେବେ ଏମାନେ କଣ କରିବେ ଆଉ କଣ ନାହିଁ ଏ ନେଇ ସବୁ ଭଲ୍ୟୁଣ୍ଟରମାନଙ୍କୁ ଗାଇଡଲାଇନ ପ୍ରଦାନ କରିଛନ୍ତି ଡିସିପି । ତେବେ କଟକ ଡିସିପିଙ୍କ ଏହି ପଦକ୍ଷେପକୁ ସ୍ୱାଗତ କରିଛନ୍ତି ସହରର ବରିଷ୍ଠ ମୁରବୀଙ୍କ ସହ ଭଲ୍ୟୁଣ୍ଟରମାନେ ।