ପାରାଦୀପ ତାରେଣୀଗଡାରେ ଛାତରୁ ପଡ଼ି ଯୁବତୀଙ୍କ ମୃତ୍ୟୁ ମାମଲାରେ ପୋଲିସକୁ ମିଳିଛି ନୂଆ ତଥ୍ୟ । ଦୁଷ୍କର୍ମ ପରେ ଯୁବତୀଙ୍କୁ ହତ୍ୟା କରାଯାଇଥିବା ସନ୍ଦେହ । ପୋଲିସ ଜଣେ ଯୁବକଙ୍କୁ ଅଟକ ରଖି ଘଟଣାର ତନାଘନା ଚଳାଇଛି ।

ଅନ୍ୟପଟେ ଯୁବତୀ ଜଣକ ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା ଅଞ୍ଚଳର ବୋଲି ମଧ୍ୟ ପୋଲିସ ସୂଚନା ପାଇଛି । ପ୍ରାଥମିକ ତଦନ୍ତ ଅନୁଯାୟୀ ପୋଲିସ ଜାଣିବାକୁ ପାଇଛି ସାରଳା ରୋଡ୍ ନିକଟରୁ ଜଣେ ଯୁବକ ବାଇକରେ ଯୁବତୀଙ୍କୁ ଲିଫ୍ଟ୍ ଦେବା ବାହାନାରେ ପାରାଦୀପ ନେଇ ଆସିଥିଲେ । ପରେ ତାରେଣୀଗଡାରେ ଥିବା ଖୁଣ୍ଟିଆ ନିବାସକୁ ଆଣି ଦୁଷ୍କର୍ମ କରି ହତ୍ୟା କରିଥିବା ସନ୍ଦେହ କରାଯାଉଛି । ଯୁବକ ଜଣକ ବିହାର ଅଞ୍ଚଳର ହୋଇଥିବା ବେଳେ ସେ ଖୁଣ୍ଟିଆ ନିବାସରେ ଭଡ଼ାରେ ରହି ପାରାଦୀପରେ ଏକ କମ୍ପାନୀରେ ଶ୍ରମିକ ଭାବେ କାମ କରନ୍ତି ।

ଏହି ଘଟଣା ପରଠାରୁ ସଂପୃକ୍ତ ଯୁବକଙ୍କୁ ପାରାଦୀପ ପୋଲିସ ଅଟକ ରଖି ଅଧିକ ତଦନ୍ତ ଚଳାଇଛି । ମୃତ ଯୁବତୀ ଜଣକ କ’ଣ ପାଇଁ ଘରୁ ପଳାଇ ଆସିଥିଲେ ତାହା ଜଣାପଡ଼ିନାହିଁ । ପ୍ରାଥମିକ ତଦନ୍ତରୁ ଯୁବକ ଅନୁଗୁଳରେ ରହୁଥିବା ନିଜ ବାପାଙ୍କ ଠାରୁ ବାଇକ ଆଣି ପାରାଦୀପ ଆସୁଥିବା ବେଳେ ବାଟରୁ ଯୁବତୀଙ୍କୁ ଲିଫ୍ଟ ଦେଇଥିଲେ । ପରେ କଥାବାର୍ତ୍ତାରେ ଯୁବତୀ ଜଣେ ଯୁବକକୁ ଭଲ ପାଇ ଘରୁ ପଳାଇ ଆସିଥିବା ଜାଣିଥିଲେ । ଏହାପରେ ଯୁବତୀଙ୍କୁ ସେ ପାରାଦୀପ ଆଣିଥିଲେ । ତେବେ ଯୁବତୀ ଜଣକ ଛାତରୁ ଡେଇଁ ପଡିଛନ୍ତି ନା ଦୁଷ୍କର୍ମ ସହ ହତ୍ୟା କରାଯାଇଛି ସେନେଇ ତଦନ୍ତ କରୁଛି ପୋଲିସ । ତେବେ ଏହି ଘଟଣାରେ ଜଣେ ସଂପୃକ୍ତ ନା ଆଉ କିଏ ସେନେଇ ପୋଲିସ୍ ତଦନ୍ତ ଜାରି ରଖିଛି ।
ପଢନ୍ତୁ ଏହି ଖବର: ସ୍ଵାମୀ ନା ସୈତାନ ? ପ୍ରେମ ବିବାହରେ ଭରିଲାନି ମନ, ଯୌତୁକ ପାଇଁ ସୋସିଆଲ୍ ମିଡିଆରେ ସବୁ ସାରିଦେଲା