ପୁରୀ: କାଖେଇ, କୋଳେଇ ଏକମାତ୍ର ପୁଅକୁ ବଡ଼ କଲେ । ବଡ଼ କଲେଜରେ ପାଠ ପଢ଼ାଇବା ସହ ପୁଅଠାରୁ ବଡ଼ ଆଶା ବି ରଖିଥିଲେ । ହେଲେ ପିତୃତ୍ଵ ଦିବସ ବା ଫାଦର୍ସ ଡେ'ରେ ସବୁ ଆଶା ମଉଳିଗଲା । ବୟସର ଅପରାହ୍ଣରେ ଯେଉଁ ପୁଅକୁ ଆଶ୍ରା ବୋଲି ଭାବୁଥିଲେ, ସେ ଯେତେବେଳେ ବାଟ ହୁଡ଼ିଲା । ସେତେବେଳେ ବାପାମାଆ ନେଇଗଲେ ଚରମ ନିଷ୍ପତ୍ତି ।

ପୁଅକୁ ଏକାକୀ କରି ବନ୍ଦ ଘର ଭିତରେ ଝୁଲି ପଡ଼ିଲେ ଦମ୍ପତି । ଏଭଳି ହୃଦୟ ବିଦାରକ ଘଟଣା ଘଟିଛି ପୁରୀରେ । ଶ୍ରୀକ୍ଷେତ୍ରର ସେନାପତି ବଗିଚାରେ ଦମ୍ପତି ଆତ୍ମହତ୍ୟା କରିଛନ୍ତି । ମୃତକ ହେଉଛନ୍ତି ପୁରୀ ସେନାପତି ବଗିଚାର ଅନାମ ମିଶ୍ର ଓ ସଙ୍ଗୀତା ମିଶ୍ର ।

ଏଥିସହ ପଢ଼ନ୍ତୁ: କଟକ ରେଳ ଷ୍ଟେସନରେ ସନ୍ତାନ ପ୍ରସବ କଲେ ମହିଳା 
 
କାହିଁକି କଲେ ଆତ୍ମହତ୍ୟା ?

ପୁରୀ ସେନାପତି ବଗିଚାର ଅନାମ ମିଶ୍ର ଓ ସଙ୍ଗୀତା ମିଶ୍ରଙ୍କ ଏକମାତ୍ର ପୁଅ ହେଉଛି, ଅନୁ ସଙ୍ଗୀତ ମିଶ୍ର । ପୁଅ ନାଁରେ ବାପାମାଆ ୩ ମହଲା ଘର କରିଛନ୍ତି । ସେଇ ଘରେ ପୁଅକୁ ନେଇ ଏକାଠି ରହୁଥିଲେ ଅନାମ ଓ ସଙ୍ଗୀତା ।

ସୂଚନା ଅନୁସାରେ, ଏକମାତ୍ର ପୁଅ ଅନୁସଙ୍ଗୀତ ନିଶା ସେବନ କରୁଥିଲା । ଯାହାକୁ ନେଇ ଅତିଷ୍ଠ ହୋଇ ପଡ଼ିଥିଲେ ଅନାମ ଓ ସଙ୍ଗୀତା । ନିଶାଠାରୁ ଦୂରେଇ ରହିବାକୁ ବାରମ୍ବାର ପୁଅକୁ ବାରଣ କରୁଥିଲେ । ହେଲେ ପୁଅ ନିଶା ଛାଡ଼ି ନଥିଲା ।

ନିଜେ ଅନୁସଙ୍ଗୀତ ନିଶା ସେବନ କରୁଥିବା ଓ ବାପାମାଆଙ୍କ ଉପରେ ରାଗି ଯାଉଥିବା ସ୍ଵୀକାର କରିଛି । ହେଲେ ଏଥିପାଇଁ ଅନାମ ଓ ସଙ୍ଗୀତା ଜୀବନ ହାରିଥିବା କଥାକୁ ମାନି ନାହାନ୍ତି ପୁଅ ଅନୁସଙ୍ଗୀତ ମିଶ୍ର । ସେ କହିଛନ୍ତି, "ବାପାଙ୍କ ମୋବାଇଲ୍ ମେସେଜ୍‌ ଖୋଳତାଡ଼ କରିବା ପରେ ସବୁ କଥା ସ୍ପଷ୍ଟ ହେବ ।"

ଏଥିସହ ପଢ଼ନ୍ତୁ: ଦିନ ଦ୍ୱି-ପ୍ରହରରେ ଗୋଡ଼ାଇ ଗୋଡ଼ାଇ ହତ୍ୟା; ବାଇକ୍‌ରେ ଯାଉଥିବା ବେଳେ କାଟିଦେଲା ତଣ୍ଟି 

ଶନିବାର ରାତିରେ କ'ଣ ଘଟିଲା ?

ଶନିବାର ରାତିରେ ପୁଅ ଅନୁସଙ୍ଗୀତକୁ ଖାଇବାକୁ ଦେଇଥିଲେ ମାଆ । ତା' ପରେ ଶୋଇବାକୁ ଯାଇଥିଲେ । ହେଲେ ସକାଳେ ଅନୁସଙ୍ଗୀତ ବାପା ମାଆଙ୍କୁ ଝୁଲନ୍ତା ଅବସ୍ଥାରେ ଦେଖି ପୋଲିସକୁ ଖବର ଦେଇଥିଲେ ।

ପୋଲିସ ପହଞ୍ଚି ଉଭୟଙ୍କ ମୃତଦେହକୁ ଜବତ କରି ସଦର ମୁଖ୍ୟ ଚିକିତ୍ସାଳୟରେ ବ୍ୟବଚ୍ଛେଦ କରିଛି । ସ୍ଵର୍ଗଦ୍ଵାରରେ ନିଜେ ଅନୁସଙ୍ଗୀତ ବାପାମାଆଙ୍କୁ ମୁଖାଗ୍ନି ଦେଇଛନ୍ତି । ବାପାମାଆ ଜୀବନ ହାରିବାର କାରଣ ସେ ନିଶା ସେବନ ନୁହେଁ ବୋଲି କହିଛନ୍ତି । ପୁରୀର ଏହି ଘଟଣାକୁ ନେଇ ଚର୍ଚ୍ଚା ଜୋର୍ ଧରିଥିବା ବେଳେ ପୋଲିସ ତଦନ୍ତ ପରେ ହିଁ ସ୍ପଷ୍ଟ ହେବ କାହିଁକି ଜୀବନ ହାରିଲେ ଅନାମ ଓ ସଙ୍ଗୀତା ।