ଭୁବନେଶ୍ଵର କୋର୍ଟରେ ହାଜର ହେବେ ଯାତ୍ରା ଅଭିନେତା ପୀୟୂଷ ତ୍ରିପାଠୀ । ଆଜି ଯାତ୍ରା ଅଭିନେତା ପୀୟୂଷ ତ୍ରିପାଠୀ ଏବଂ ଯାତ୍ରାପାର୍ଟି ସିଂହବାହିନୀର ପ୍ରଯୋଜକ ସଞ୍ଜୀବ ପାଢ଼ୀ ଭୁବନେଶ୍ଵର କୋର୍ଟରେ ହଜାର ହେବେ । ସୂର୍ଯ୍ୟ ମନ୍ଦିର ନାଟ୍ୟ ଅନୁଷ୍ଠାନ ସହ ଦୁଇ ବର୍ଷିଆ ଚୁକ୍ତି ଖିଲାପ କରିଥିବା ଅଭିଯୋଗରେ ପ୍ରଯୋଜକ ପ୍ରମୋଦ ସ୍ୱାଇଁ କୋର୍ଟର ଆଶ୍ରୟ ନେଇଥିଲେ । କୋର୍ଟର ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ପୀୟୂଷ ମଞ୍ଚ ଚଢ଼ି ପାରିବେ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ । ପୀୟୂଷ ଏବଂ ସଞ୍ଜୀବ ବ୍ୟକ୍ତି ଗତ ଭାବେ କୋର୍ଟର ହଜାର ହେବେ ନା ଓକିଲ ଜରିଆରେ ନିଜର ହାଜର ହେବେ ତାହା ସ୍ପଷ୍ଟ ହୋଇନାହିଁ ।

ଅଧିକ ପଢ଼ନ୍ତୁ: ନୂଆ ଲୋକସେବା ଭବନ ନିର୍ମାଣ ପାଇଁ ପଡ଼ିବ ଭିତ୍ତିପ୍ରସ୍ତର, ଖର୍ଚ୍ଚ ହେବ ୩୬୨୩ କୋଟି

ସୂଚନା ଅନୁସାରେ, ବିଗତ ଦିନରେ ପୀୟୂଷ ତ୍ରିପାଠୀଙ୍କୁ ନେଇ ଯାତ୍ରା ସିଂହ ବାହିନୀ ଓ ସୂର୍ଯ୍ୟ ମନ୍ଦିର ଯାତ୍ରା ପାର୍ଟି ମାଲିକଙ୍କ ମଧ୍ୟରେ ବିବାଦ ଲାଗି ରହିଥିଲା । କାହା ପାର୍ଟିରେ ଯାତ୍ରା କରିବେ ପୀୟୂଷ ସେନେଇ ବେଶ୍‌ କିଛି ଦିନ ବିବାଦ ହୋଇଥିଲା । ଏମିତିକି ତାଙ୍କୁ ବ୍ୟାନ୍‌ କରିବା ପର୍ଯ୍ୟନ୍ତ କଥା ଯାଇଥିଲା । ପୀୟୂଷଙ୍କ ଚୁକ୍ତି ସୂର୍ଯ୍ୟ ମନ୍ଦିର ସହ ୨୦୨୬ ଜୁନ ପର୍ଯ୍ୟନ୍ତ ଥିଲା । ମାତ୍ର ଚୁକ୍ତି ସରି ନ ଥିଲା ବେଳେ ପୀୟୂଷ ସିଂହବାହିନୀ ଆସିବାକୁ ଚାହୁଁଥିଲେ । ବିବାଦ ହେବାରୁ ଯାତ୍ରା ମାଲିକ ସଂଘ ପୀୟୂଷଙ୍କୁ ବର୍ଷେ ବିଶ୍ରାମ ଦେଇଥିଲେ । ବିଶ୍ରାମ ନ ନେଇ ଗତ ଜାନୁଆରୀ ୫ ତାରିଖରେ ସେ ଯାତ୍ରା ସିଂହବାହିନୀ ପାର୍ଟିରେ ତୁ ମୋ ବଜରଙ୍ଗୀ ନାଟକରେ ମଞ୍ଚକୁ ଚଢ଼ିଥିଲେ । ପୁଣି ମଞ୍ଚ ଚଢ଼ିବାରୁ କୋର୍ଟ ଯାଇଥିଲେ ସୂର୍ଯ୍ୟମନ୍ଦିର ମାଲିକ । ଏବେ କୋର୍ଟ ପରବର୍ତ୍ତୀ ଶୁଣାଣି ନ ହେବା ପର୍ଯ୍ୟନ୍ତ ଯାତ୍ରା ମଞ୍ଚ ଚଢ଼ିପାରିବେନି ବୋଲି କହିଛନ୍ତି ।

ସେପଟେ କୋର୍ଟ ନିର୍ଦ୍ଦେଶ ପରେ ପ୍ରତିକ୍ରିୟା ରଖିଥିଲେ ପୀୟୂଷ । ସେ କହିଥିଲେ, "ଭଲ ମାନସିକତା ନେଇ ମୁଁ ଯାତ୍ରା ମଞ୍ଚକୁ ଆସିଥିଲି । ଏବେ ଯେଁଉ ପ୍ରସଙ୍ଗ ଉଠିଛି, ମୋ ଜାଣତରେ ସେଭଳି କିଛି ମୁଁ ଭୁଲ୍ କରିନି । ଯାହା ପାଇଁ ମଞ୍ଚଠାରୁ ଦୂରେଇ ରହିବାକୁ ପଡ଼ିବ । ସମୟକୁ ଅପେକ୍ଷା, ସତ ନିହାତି ସାମ୍ନାକୁ ଆସିବ । ନ୍ୟାୟ ପାଇଁ ଲଢ଼ିବି, ସମସ୍ୟାର ସମାଧାନ ସୁରୁଖୁରୁରେ ସମସ୍ତଙ୍କ ଆଶୀର୍ବାଦରେ ହୋଇଯାଉ ।"