ପାହାଡ଼ପୁର ଗାଁ ଇତିହାସରେ ଯୋଡ଼ି ହେଲା ଏକ ସ୍ୱର୍ଣ୍ଣିମ ଅଧ୍ୟାୟ । ମୟୂରଭଞ୍ଜର ଛୋଟ ଆଦିବାସୀ ଗାଁ ପାହାଡ଼ପୁରରେ ପ୍ରଥମ ଥର ପାଇଁ ଏକାଠି ହେଲେ ଦେଶର ଦୁଇ ଶୀର୍ଷ ନେତୃତ୍ବ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାଷ୍ଟ୍ରପତିଙ୍କ ଗାଁରେ ପାଖାପାଖି ଦେଢ଼ରୁ ଦୁଇ ଘଣ୍ଟାର ସମୟ ବିତାଇଛନ୍ତି ପ୍ରଧାନମନ୍ତ୍ରୀ । ଯେଉଁଠାରୁ ବାହାରି ଜଣେ ଆଦିବାସୀ ଝିଅ ରାଷ୍ଟ୍ରପତି ଭବନ ପର୍ଯ୍ୟନ୍ତ ପହଞ୍ଚିଥିଲେ, ସେହି ମାଟିକୁ ଅତି ନିକଟରୁ ଦେଖିଥିଲେ ପିଏମ ମୋଦି ।

ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପାଖରେ ପାଇ ଉଠୁଥିଲା ପଡ଼ୁଥିଲା ରାଷ୍ଟ୍ରପତିଙ୍କ ଗାଁ ପାହାଡ଼ପୁର । ଅବସର ଥିଲା ମହାମହିମଙ୍କ ୬୮ ତମ ଜନ୍ମଦିନ । ପିଏମ ମୋଦିଙ୍କ ସ୍ୱାଗତ ପାଇଁ ନବବଧୂ ଭଳି ସଜେଇ ହୋଇଥିଲା ପୂରା ପାହାଡ଼ପୁର । ସନ୍ତାଳୀ ସଂସ୍କୃତି ଓ ପରମ୍ପରା ଅନୁସାରେ ଗାଁର ପ୍ରତିଟି ମାଟି ଘର କାନ୍ଥରେ ଅତି ସୁନ୍ଦର ଭାବେ ସ୍ଥାନ ପାଇଥିଲା ସୋହରାଇ ଚିତ୍ରକଳା । ଫୁଲରେ ସଜେଇ ହୋଇଥିଲା ଗାଁ ରାସ୍ତାର ଦୁଇ ପାର୍ଶ୍ବ । ଜଙ୍ଗଲ, ପାହାଡ଼ ଭିତରେ ସୀମିତ ଥିବା ଏହି ଗାଁର ପରମ୍ପରା ଆଜି ଦେଶର ସର୍ବୋଚ୍ଚ ନେତୃତ୍ୱଙ୍କ ଉପସ୍ଥିତିରେ ପାଇଛି ନୂଆ ପରିଚୟ । ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଏହି ଗସ୍ତରେ ସମ୍ମିଳିତ ଥିଲା ଭାବନା, ଐତିହ୍ୟ, ରାଜନୀତି, ବିକାଶ ଓ ସଂସ୍କୃତିର ସମନ୍ୱୟ ।

ଅଧିକ ପଢ଼ନ୍ତୁ: ରାଷ୍ଟ୍ରପତିଙ୍କ ଗାଁ ବୁଲିଲେ ପ୍ରଧାନମନ୍ତ୍ରୀ,ଗୋଷାଣୀ ପୀଠରେ ଆଦିବାସୀ ପରମ୍ପରାରେ କଲେ ପୂଜାର୍ଚ୍ଚନା

ନିଜ ଗାଁରେ ଗାଇଡ୍ ସାଜିଥିଲେ ମହାମହିମ । ପିଏମ ମୋଦିଙ୍କୁ ବୁଲିବୁଲି ଦେଖାଇଲେ ପାହାଡ଼ପୁରର ଗଳିକନ୍ଦି । ଆଦିବାସୀ ସଂପ୍ରଦାୟର ପବିତ୍ର ପୀଠ 'ସାନ୍ତାଳୀ ଜାହେରଗାଡ଼' ଏବଂ 'ହୋ ଜାହେରଗାଡ଼'ରେ କରିଥିଲେ ପୂଜାର୍ଚ୍ଚନା । ରାଷ୍ଟ୍ରପତିଙ୍କ ଦ୍ୱାରା ସ୍ଥାପିତ ଏସଏଲଏସ ସ୍ମାରକୀ ଆବାସିକ ବିଦ୍ୟାଳୟ ପରିଦର୍ଶନ କରିଥିଲେ ପିଏମ ମୋଦି । ପିଲାଙ୍କ ଗହଣରେ ଜଣେ ପ୍ରଧାନମନ୍ତ୍ରୀ ନୁହେଁ, ବରଂ ସେ ଜଣେ ଅଭିଭାବକ ଭଳି ନଜର ଆସିଥିଲେ । କାହାକୁ ଚକୋଲେଟ୍ ଦେଲେ, କାହା ସହ ହସି ହସି କଥା ହେଲେ, ଆଉ କାହାର ସ୍ୱପ୍ନ ବାବଦରେ ପଚାରିଲେ । ସେହି କିଛି ମିନିଟ୍‌ ଅନେକ ପିଲାଙ୍କ ପାଇଁ ହୋଇଯାଇଛି ସାରା ଜୀବନର ସ୍ମୃତି । କେବଳ ସ୍କୁଲ ପିଲା ନୁହେଁ, ସ୍ଥାନୀୟ ଦେହୁରୀ, ମହିଳା, କଳାକାର ଏବଂ ଦକ୍ଷତା ବିକାଶ ପ୍ରଦର୍ଶନୀରେ ଭାଗ ନେଇଥିବା ବ୍ୟକ୍ତିଙ୍କ ସହ ବି ଆତ୍ମୀୟତାର ସହ ଆଲୋଚନା କରିଥିଲେ ପିଏମ ମୋଦି ।
ଦୁଇ ଶୀର୍ଷ ନେତୃତ୍ବଙ୍କ କିଛି ଘଣ୍ଟାର ଉପସ୍ଥିତି ପାହାଡ଼ପୁର ଏବଂ ମୟୂରଭଞ୍ଜ ପାଇଁ ଥିଲା ଏକ ଐତିହାସିକ ମୁହୂର୍ତ୍ତ। ଏହି ଗସ୍ତ ପରେ ପାହାଡ଼ପୁର କେବଳ ରାଷ୍ଟ୍ରପତିଙ୍କ ଜନ୍ମଭୂମି ଭାବରେ ନୁହେଁ, ବରଂ ଆଦିବାସୀ ଗୌରବ, ପର୍ଯ୍ୟଟନ ଓ ବିକାଶର ଏକ ନୂଆ ପରିଚୟ ଭାବେ ଉଭା ହେବ ।