ଅର୍ଗସ ବ୍ୟୁରୋ : ଅର୍ପଣ ରଥ ନାଁରେ ଅଦିନେ ଗଡିଲା ରଥ । ଦଳୀୟ ପ୍ରଚାର ଭଳି ବ୍ୟବସ୍ଥା ହେଲା । ପାଣ୍ଡିଆନଙ୍କ ଫଟୋ ଲାଗି ମୁଖ୍ୟମନ୍ତ୍ରୀଙ୍କ ପ୍ରମୋଶନ ବି ହେଲା । ଦୂଆର ଦୂଆର ବୁଲି ଚାଉଳ ମୁଠେ ମାଗିଲେ ଷାଠିଏ ପଉଟି ଖିଆ ଦାରୁବ୍ରହ୍ମ । ଟ୍ରଲିରେ ବୁହା ହେଲେ ବଡ ଠାକୁର, ଅଳିଆ ଗଦାରେ ପଡିଲା କାଳିଆ । ଅଣ ଓଡିଆଙ୍କ ନିଷ୍ପତ୍ତିରେ ଓଡିଆଙ୍କ ଆସ୍ଥା ଅସ୍ମିତାକୁ ପାଦରେ ଦଳି ଚକଡି ଦିଆଗଲା । ତଥାପି ମୁଣ୍ଡ ପାତି ସବୁ କିଛି ସହିଲା ଓଡିଆ ଜାତି । ଜଗନ୍ନାଥଙ୍କ ନାଁ ନେଇ ଚାଲିଥିବା ପ୍ରଚାରରେ ସାମିଲ ବି ହେଲା ଆଉ ଗୁଆ ଚାଉଳ ଦେଇ ପରିକ୍ରମା ପ୍ରକଳ୍ପର ଜୟ ଜୟ କାର କଲା । କିନ୍ତୁ ସବୁଥର ପରି ଏଥର ବି ଲୋକଙ୍କ ଆସ୍ଥା ସହ ଖେଳିଲେ ସରକାର । ସଂଗୃହିତ ଚାଉଳ ଓ ଗୁଆ ସବୁ ପୁରୀ ନ ଯାଇ ବିଭିନ୍ନ ସ୍ଥାନରେ ପଡି ରହିଲା । ଯାହାକୁ ନେଇ ଏବେ ଭକ୍ତ ଭିତରେ ଦେଖାଦେଇଛି ତୀବ୍ର ଅସନ୍ତୋଷ । 

ଅଧିକ ପଢନ୍ତୁ ଓଡ଼ିଶା ଖବର

ସେପଟେ ଏଭଳି ଘଟଣା ସାମ୍ନାକୁ ଆସିବା ପରେ ସରକାରଙ୍କୁ କଡା ସମାଲୋଚନା କରିଛନ୍ତି ବିରୋଧୀ । ଠାକୁରଙ୍କୁ ବୁଲାଇ ଲକ୍ଷ ଲକ୍ଷ ଟଙ୍କାର ଚାଉଳ ସଂଗ୍ରହ କରିବାପରେ ଏବେ ତାକୁ ବାଟମାରଣା କରିବା ପାଇଁ ବିଜେଡି ସରକାର ଯୋଜନା କରିଛି ବୋଲି ଅଭିଯୋଗ ଆଣିଛନ୍ତି ବିରୋଧୀ । ଅନ୍ୟପଟେ ଭକ୍ତର ଭାବନା ସହ ସରକାରଙ୍କ ଖେଳକୁ ନେଇ ବ୍ୟଙ୍ଗାତ୍ମକ ଢଙ୍ଗରେ ସରକାରଙ୍କୁ ସମାଲୋଚନା କରିଛନ୍ତି ବ୍ୟଙ୍ଗ କବି ।  

ଏ ସବୁ ଭିତରେ ଟ୍ରଲିରେ ଠାକୁରଙ୍କୁ ବସାଇ ଚାଉଳ ଭିକ୍ଷା କରାଇବା ନିଷ୍ପତ୍ତି ପରିଚାଳନା କମିଟିର ନଥିଲା ବୋଲି ଖୋଦ୍ ଗଜପତି ମହାରାଜ କହିବା ପରେ ବିବାଦ ଅଧିକ ବଢିଛି । ଏପରିକି ଜଗନ୍ନାଥଙ୍କ ବାଡଗ୍ରାହୀ ବି ଅର୍ପଣ ରଥରେ ପାଣ୍ଡିଆନ୍ ଓ ନବୀନଙ୍କ ଫଟୋ ଲାଗିବାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି । ଏଠାରେ ପ୍ରଶ୍ନ... ଯଦି ପରିଚାଳନା କମିଟି କୌଣସି ନିଷ୍ପତ୍ତି ନେଇନଥିଲା ତେବେ କେମିତି ଅଦିନେ ଗଡିଲା ଜଗନ୍ନାଥଙ୍କ ଅର୍ପଣ ରଥ ? କଳା ଠାକୁରଙ୍କୁ ଟ୍ରଲିରେ ବୁହାଇ ଭିକ ମଗାଇବା ପଛରେ ରହିଛି କେଉଁ କଳା ପାହାଡର ହାତ ?