ଶ୍ରୀମନ୍ଦିର ପ୍ରଶାସନର ଅଜବ ନୀତି । ନିଜର ରାଜସ୍ୱ ବୃଦ୍ଧି ପାଇଁ ଭକ୍ତଙ୍କୁ କରାଯାଉଛି ଶୋଷଣ । ଶ୍ରୀମନ୍ଦିର ପ୍ରଶାସନ ଅଧୀନରେ ଥିବା ଚାରିଗୋଟି ଭକ୍ତନିବାସ ପାର୍କିଂରେ ଏଥର ଚାରିଚକିଆ ଯାନ ପାର୍କ କଲେ ଆପଣଙ୍କୁ ଦେବାକୁ ପଡିବ ୫୦୦ ଟଙ୍କା । ଗତକାଲି ଠାରୁ ଏହାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ବିଧିବଦ୍ଧ ଭାବେ ଲାଗୁ କରିଥିବା ବେଳେ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହା ବଳବତ୍ତର ରହିବ ।

ଏଣିକି ଭକ୍ତ ନିବାସରେ ଗାଡ଼ି ରଖିଲେ ଗଣିବାକୁ ପଡ଼ିବ ପାର୍କିଂ ଫି' । ଯେତେ ଅଧିକ ସମୟ ଗାଡ଼ି ରଖିଵେ ସେତେ ଅଧିକ ପାର୍କିଂ ଫି' ଗଣିବେ । ପୂର୍ବରୁ ସମ୍ପୂର୍ଣ୍ଣ ଦେୟୁମୁକ୍ତ ଥିଲା ୪ ଚକିଆ ଗାଡ଼ି । ଏବେ ଗାଡି ରଖିଲେ ଦେବାକୁ ପଡିବ ୫୦୦ ଟଙ୍କା ।

ଅଧିକ ପଢ଼ନ୍ତୁ: ଆନ୍ଦୋଳନରୁ ଓହରିଲେ ଡାକ୍ତର ସଂଘ, ଆସନ୍ତାକାଲିଠୁ ସ୍ୱାଭାବିକ ହେବ ସ୍ୱାସ୍ଥ୍ୟସେବା

ଶ୍ରୀମନ୍ଦିର ପ୍ରଶାସନର ଅଜବ ନୀତି । ରାଜସ୍ୱ ବୃଦ୍ଧି ପାଇଁ ଏମିତି ନୀତି ଆପଣାଇଛି ଶ୍ରୀମନ୍ଦିର ପ୍ରଶାସନ । ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀଙ୍କ ନିର୍ଦ୍ଦେଶରେ ମନ୍ଦିର ପ୍ରଶାସନ ଅଧୀନରେ ଥିବା ଚାରିଗୋଟି ଭକ୍ତ ନିବାସରେ ପାର୍କିଂ ନାମରେ ଆଦାୟ ହେବ ୫୦୦ ଟଙ୍କା । ଭକ୍ତ ନିବାସର ଗୋଟିଏ ରୁମ୍ ରେଟ୍ ୧୭୧୨ ଟଙ୍କା ହୋଇଥିବା ବେଳେ ଏଣିକି ପର୍ଯ୍ୟଟକ ତାଙ୍କ ଚାରିଚକିଆ ଗାଡ଼ି ୨୪ ଘଣ୍ଟା ପାର୍କିଂ ରେ ରଖିଲେ ଆଉ ୫୦୦ ଟଙ୍କା ଗଣିବେ । ଅର୍ଥାତ ସମୁଦାୟ ୧୭୧୨ +୫୦୦=୨୨୧୨ ଟଙ୍କା ଆପଣଙ୍କୁ ଗଣିବାକୁ ହେବ । ଯାହାକୁ ନେଇ ଭକ୍ତ ନିବାସରେ ରହୁଥିବା ଯାତ୍ରୀମାନେ ଅସନ୍ତୋଷ ପ୍ରକାଶ କରିଛନ୍ତି ।

ଭକ୍ତ ନିବାସକୁ ଘରୋଇକରଣ କରି ପରିଚାଳନା କରିବା, ନୂତନ ଭକ୍ତ ନିବାସ ନିର୍ମାଣ କରିବା ଇତ୍ୟାଦି ପ୍ରସଙ୍ଗ ପରିଚାଳନା କମିଟି ବୈଠକରେ ଉପସ୍ଥାପନ ହୋଇଥିବା ବେଳେ ବର୍ଦ୍ଧିତ ପାର୍କିଂ ଫି ପ୍ରସଙ୍ଗ କୌଣସି ବୈଠକରେ କେବେ ବି ସ୍ଥାନ ପାଇନାହିଁ । ପରିଚାଳନା କମିଟି ବୈଠକରେ ବର୍ଦ୍ଧିତ ପାର୍କିଂ ଫି' ପ୍ରସଙ୍ଗ ଉପସ୍ଥାପନ ନ ହୋଇ ସିଧାସଳଖ ପାର୍କିଂ ଫି' ଆଦାୟ ନିଷ୍ପତ୍ତିକୁ ସେବାୟତ ମହଲରେ ନାପସନ୍ଦ କରାଯାଇଛି । ଆଉ ଏପରି ନିଷ୍ପତ୍ତିକୁ ପ୍ରତ୍ୟାହାର କରିବା ପାଇଁ ଦାବି ହୋଇଛି ।
ପରିଚାଳନା କମିଟି ବୈଠକରେ ଏ ପ୍ରସଙ୍ଗରେ ଆଲୋଚନା ହୋଇନି । ତେବେ କିଭଳି ଏତେ ବଡ଼ ନିଷ୍ପତ୍ତି ନିଆଗଲା ସେନେଇ ସୃଷ୍ଟି ହୋଇଛି ପ୍ରଶ୍ନବାଚୀ ।