Puri Habishyali Camp / ଶ୍ରୀକ୍ଷେତ୍ରରେ ଜମିବ କାର୍ତ୍ତିକ ବ୍ରତଧାରୀଙ୍କ ଭିଡ଼; ଶିବିରରେ ରହିବେ ୨୪୦୦ ହବିଷ୍ୟାଳୀ

ପୁରୀ: ଆସନ୍ତା ୨୬ ତାରିଖରୁ ଶ୍ରୀକ୍ଷେତ୍ରରେ ଜମିବ କାର୍ତ୍ତିକ ବ୍ରତଧାରୀଙ୍କ ଭିଡ଼ । ଚଳିତ ବର୍ଷ ୨୪ ଶହ ହବିଷ୍ୟାଳୀଙ୍କ ପାଇଁ ହୋଇଛି ସ୍ବତନ୍ତ୍ର ବ୍ୟବସ୍ଥା । ଅନଲାଇନ୍ ପଞ୍ଜୀକରଣ ପରେ ଚୟନ ମାପଦଣ୍ଡ ଅନୁଯାୟୀ ହବିଷ୍ୟାଳୀଙ୍କ ତାଲିକା ପ୍ରସ୍ତୁତ କରାଯାଇଛି । ୨୬ ତାରିଖ ସକାଳେ ବୃନ୍ଦାବତୀ ନିବାସ ଶିବିରରେ ଚୟନ ହୋଇଥିବା ବ୍ରତଧାରୀଙ୍କୁ ପରିଚୟ ପତ୍ର ସହ ମିଳିବ ସିଟ୍ ଆଲଟମେଣ୍ଟ । ବିନା ପଞ୍ଜୀକରଣରେ କାହାରିକୁ ନରଖିବା ପାଇଁ ରହିଛି କଡ଼ା ନିର୍ଦ୍ଦେଶ ।

• ଏଇଠି ରହିବେ ମନୋନୀତ ହବିଷ୍ୟାଳୀ

ବିଶେଷକରି ବୃନ୍ଦାବତୀ ନିବାସ, ରେଳବାଇ ଟୁରିଷ୍ଟ କମ୍ପ୍ଲେକ୍ସ ଓ ପୌରସଂସ୍ଥା କଲ୍ୟାଣ ମଣ୍ଡପରେ ସମସ୍ତ ହବିଶ୍ୟାଳୀଙ୍କ ରହଣୀର ହୋଇଛି ବ୍ୟବସ୍ଥା । ବ୍ରତଧାରୀଙ୍କ ପାଇଁ ନିଶୁଳ୍କ ରହଣୀ,ମାଗଣା ମହାପ୍ରସାଦ ଓ ବସ୍ ଯୋଗେ ଶ୍ରୀମନ୍ଦିର ଦର୍ଶନ ବ୍ୟବସ୍ଥା କରାଯାଇଛି । ସେପଟେ ମାସକ ଯାକ ଶ୍ରୀମନ୍ଦିରରେ ରାଜ୍ୟର ସମସ୍ତ ବ୍ରତଧାରୀଙ୍କ ପାଇଁ ସ୍ୱତନ୍ତ୍ର ଦର୍ଶନ ଲାଇନ୍ କରାଯାଉଛି ।

• ହବିଷ୍ୟାଳୀ କେନ୍ଦ୍ର ପାଇଁ ସ୍ଵତନ୍ତ୍ର ଟ୍ରେନିଂ

ହବିଷ୍ୟାଳୀ କେନ୍ଦ୍ର ପାଇଁ ନୋଡାଲ ଅଧିକାରୀ ଓ କର୍ମଚାରୀ ମାନଙ୍କୁ ସ୍ୱତନ୍ତ୍ର ପ୍ରଶିକ୍ଷଣ ଦିଆଯାଇଛି । ସୁଆର ମହାସୁଆର ନିଯୋଗ ସହ ଜିଲ୍ଲା ପ୍ରଶାସନର ସମନ୍ୱୟରେ ଆବଶ୍ୟକୀୟ ମହାପ୍ରସାଦ ଯୋଗାଇ ଦେବା ପାଇଁ ହୋଇଛି ବ୍ୟବସ୍ଥା । ହବିଶ୍ୟାଳୀମାନଙ୍କ ପାଇଁ ଫ୍ରି ଦର୍ଶନ, ଶିବିରରେ ବ୍ରତଧାରୀଙ୍କ ସୁରକ୍ଷା ପାଇଁ ୫ ପ୍ଲାଟୁନ୍ ଫୋର୍ସ ମୁତୟନ କରାଯିବା ସହ ମାସେ ଯାକ ଶ୍ରୀକ୍ଷେତ୍ରରେ କ୍ରାଉଡ୍ କଣ୍ଟ୍ରୋଲ, ଟ୍ରାଫିକ ରେଗୁଲେସନ୍ ଓ ମନ୍ଦିର ଭିତରେ ଶୃଙ୍ଖଳିତ ଦର୍ଶନ ପାଇଁ ମୁତୟନ ହେବେ ୧୫ ପ୍ଲାଟୁନ୍ ପୋଲିସ ଫୋର୍ସ ।

• ଶିବିରରେ କଣ ମିଳେ ସୁବିଧା ?

ପବିତ୍ର କାର୍ତ୍ତିକ ମାସରେ ରାଈ ଦାମୋଦର ବ୍ରତ ବା ହବିଷ ପାଳନ କରୁଥିବା ବ୍ରତଧାରୀ ମାଆମାନଙ୍କ ପାଇଁ ଓଡ଼ିଶା ସରକାର ଓ ପୁରୀ ଜିଲ୍ଲା ପ୍ରଶାସନ ପକ୍ଷରୁ ପୁରୀରେ ୩ଟି ପ୍ରମୁଖ ହବିଷ୍ୟାଳୀ କେନ୍ଦ୍ର (ଶିବିର) ବ୍ୟବସ୍ଥା କରାଯାଇଥାଏ ।
• ନିଶୁଳ୍କ ରହଣୀ: ସ୍ୱଚ୍ଛ ଏବଂ ସୁରକ୍ଷିତ ରହିବା ସ୍ଥାନ।
• ମହାପ୍ରସାଦ ସେବନ: ପ୍ରତିଦିନ ହବିଷ୍ୟାଳୀଙ୍କ ପାଇଁ ମାଗଣା ଶ୍ରୀମନ୍ଦିର ମହାପ୍ରସାଦର ବ୍ୟବସ୍ଥା ରହିଛି।
• ଶ୍ରୀମନ୍ଦିର ଦର୍ଶନ: ଶ୍ରୀଜଗନ୍ନାଥଙ୍କୁ ଶୃଙ୍ଖଳିତ ଭାବେ ଦର୍ଶନ କରିବା ପାଇଁ ସ୍ୱତନ୍ତ୍ର ବ୍ୟବସ୍ଥା ଓ ଗାଡ଼ି ସୁବିଧା।
• ଅନ୍ୟାନ୍ୟ ଆଧ୍ୟାତ୍ମିକ ବ୍ୟବସ୍ଥା: କେନ୍ଦ୍ର ପରିସରରେ ବୃନ୍ଦାବତୀ ପୂଜା, ସଂକୀର୍ତ୍ତନ ଏବଂ ଭଜନ ସନ୍ଧ୍ୟାର ଆୟୋଜନ।
• ସ୍ୱାସ୍ଥ୍ୟ ଓ ସୁରକ୍ଷା: ହବିଷ୍ୟାଳୀଙ୍କ ସୁରକ୍ଷା ପାଇଁ ପୋଲିସ ମୁତୟନ ସହ ଜରୁରୀକାଳୀନ ଚିକିତ୍ସା ଲାଗି ଡାକ୍ତରୀ ଦଳ ଉପଲବ୍ଧ ରହିବେ।

ପଢନ୍ତୁ ଏହି ଖବର: କୁମାର ପୂର୍ଣ୍ଣିମା କେବେ? ୨୫ରେ ପାଳିବେ ନା ୨୬ରେ ପାଳିବେ? ଜାଣିବା କାହିଁକି ରହିଛି ଦ୍ୱନ୍ଦ୍ୱ?

ଆଶ୍ବିନ ଏକାଦଶୀଠାରୁ ଶ୍ରୀକ୍ଷେତ୍ରରେ ମହାକାର୍ତ୍ତିକ ନୀତି ଆରମ୍ଭ ହୋଇଥିବା ବେଳେ, ଆସନ୍ତା ୨୬ ତାରିଖରୁ ନଭେମ୍ବର ୨୪ ପର୍ଯ୍ୟନ୍ତ ସରକାରୀ ଶିବିରରେ ବ୍ରତଧାରୀ ମାନଙ୍କ ପାଇଁ ଯୋଗାଇ ଦିଆଯିବ ନିଶୁଳ୍କ ବ୍ୟବସ୍ଥା ।