Jagannath Temple Servitor / ପୁରୀ ସେବାୟତ ପୁଅଙ୍କୁ ବିବାହ ପାଇଁ ମିଳୁ ନାହାନ୍ତି ଝିଅ, କମୁଛି ସେବାୟତଙ୍କ ସଂଖ୍ୟା

ପୁରୀ: ଶ୍ରୀଜଗନ୍ନାଥ ମନ୍ଦିର ସେବାୟତଙ୍କ ପରିବାରରେ କମିବାରେ ଲାଗିଛି ଝିଅଙ୍କ ସଂଖ୍ୟା । ନବକୃଷ୍ଣ ଚୌଧୁରୀ ସେଣ୍ଟର ଫର୍ ଷ୍ଟଡିଜ୍ ପକ୍ଷରୁ କରାଯାଇଥିବା ସର୍ଭେରୁ ମିଳିଛି ଏହି ତଥ୍ୟ । ଶ୍ରୀମନ୍ଦିର ସେବାୟତ ପରିବାରରେ ପୁଅ ଅନୁପାତରେ ଝିଅ ସଂଖ୍ୟା ଏବେ ହ୍ରାସ ପାଇଛି । ଫଳରେ ପୁଅମାନଙ୍କ ବିବାହକୁ ନେଇ ସମସ୍ୟାରେ ପଡୁଛନ୍ତି ପରିବାର ଲୋକେ ।

ଶ୍ରୀମନ୍ଦିର ପରମ୍ପରା ଅନୁସାରେ, ସେବାୟତମାନେ କେବଳ ନିଜ ସମାଜ ଭିତରେ ହିଁ ବିବାହ କରିପାରିବେ । ଆଉ ନିୟମ ପାଳନ ହେଲେ ହିଁ ଉଜ୍ଜୀବିତ ରହିବ ଶ୍ରୀମନ୍ଦିରରେ ସେବାୟତଙ୍କ ସେବାପୂଜାର ପରମ୍ପରା ଓ ଶୃଙ୍ଖଳିତ ହେବ ଶ୍ରୀଜୀଉଙ୍କ ନୀତିକାନ୍ତି । ଏଥିପାଇଁ ସେବାୟତ ସମ୍ପ୍ରଦାୟରେ ଝିଅଙ୍କ ସଂଖ୍ୟା ବୃଦ୍ଧି ପାଇଁ ବିଭିନ୍ନ ନିଯୋଗ ପକ୍ଷରୁ ଆରମ୍ଭ ହୋଇଛି ଅନେକ ଯୋଜନା ।

ଏଥିସହ ପଢ଼ନ୍ତୁ: ଶିଆଳିଆ ଗାଁକୁ ଭରସା ମା' ଖରାଖାଇ; ଘରେ କବାଟ, ଝରକା ନଥିଲେ ବି ହେଉନି ଚୋରି

ସେବାୟତ ପରିବାରର ପୁଅ ଅନ୍ୟ କୌଣସି କୂଳରେ ବିବାହ କଲେ ତାଙ୍କର ପରପିଢ଼ି ମହାପ୍ରଭୁଙ୍କ ସେବା କରିପାରିବେ ନାହିଁ ବୋଲି ବିଧି ରହିଛି । ପୂଜାପଣ୍ଡା, ତଳୁଛ, ପୁଷ୍ପାଳକ, ସିଂହାରି, ଗରାବଡୁ, ପତ୍ରିବଡୁ, ପ୍ରତିହାରୀ, ସୁଆରବଡୁଙ୍କ ସହ ଭିତର ସେବାୟତ ନିଯୋଗ ଆଦି ସେବାୟତଙ୍କ ପରିବାର କେବଳ ଶ୍ରୀମନ୍ଦିର ସେବାୟତଙ୍କ ମଧ୍ୟରେ ବିବାହ ଛଡ଼ା ବାହାରେ ବିବାହ କରିପାରିବେ ନାହିଁ । ପୁଣି ଝିଅଙ୍କ ସଂଖ୍ୟା କମ୍ ଥିବାରୁ ଏବେ ବି ଅନେକ ସେବାୟତ ଅବିବାହିତ ରହିଛନ୍ତି ।

୨୦୦୫ରେ ଗଣନା ଅନୁଯାୟୀ ପୁରୀରେ ୧, ୩୨୧ ସେବାୟତ ପରିବାର ରହିଥିବା ବେଳେ ୨୦୧୩ରେ ଏହା ୧, ୪୬୨କୁ ବୃଦ୍ଧି ପାଇଥିଲା । ପରିବାର ସଂଖ୍ୟା ସିନା ବଢ଼ିଲା, କିନ୍ତୁ ଖସିଥିଲା ସେବାୟତ ପରିବାରର ଲୋକ ସଂଖ୍ୟା । ୨୦୦୫ରେ ୮, ୧୮୩ ଲୋକ ସେବାୟତ ପରିବାରରେ ଥିବା ବେଳେ ୨୦୧୩ରେ ଏହା ୮, ୧୧୦କୁ ଖସି ଆସିଥିଲା ।

ଏଥିସହ ପଢ଼ନ୍ତୁ: ସିଡନୀରେ କୋହଲିଙ୍କ 'ବିରାଟ ଅବତାର', ଭାଙ୍ଗିଲେ ତେନ୍ଦୁଲକରଙ୍କ ରେକର୍ଡ

୨୦୦୫ ଓ ୨୦୧୩ର ସର୍ଭେ ରିପୋର୍ଟକୁ ତୁଳନା କଲେ ରାଜଗୁରୁ, ପୁଷ୍ପାଳକ, ଖୁଣ୍ଟିଆ, ପ୍ରତିହାରୀ, ଦଇତାପତି, ରୋଷକୋଠ ଭୋଗ ପାଣିଆ, ପାଣିଆ ଆପଟ୍ଟ, ଦତ୍ତ ମହାପାତ୍ର ଆଦି ସେବାୟତ କୂଳରେ ଝିଅ ସଂଖ୍ୟା ହ୍ରାସ ପାଇଛି । ତେବେ ୨୦୧୭ର ସର୍ଭେ ରିପୋର୍ଟରେ ୮, ୩୮୫ ଜଣ ସେବାୟତ ରହିଥିବା ବେଳେ ୨୦୧୯ ଓ ୨୦୨୧ରେ ୮, ୬୮୦ ଜଣ ରହିଥିଲେ । ସେଥିରେ ୪, ୫୧୨ ପୁରୁଷ ଓ ୪, ୧୬୮ ମହିଳା ଥିଲେ । ୨୦୨୧ରେ ପ୍ରତି ୧ ହଜାର ପୁରୁଷ ସେବାୟତଙ୍କ ତୁଳନାରେ ୯୨୪ ଜଣ ମହିଳା ଅଛନ୍ତି ।

ଝିଅଙ୍କ ସଂଖ୍ୟା କମୁଥିବାରୁ ଅନେକ ସେବାୟତ ପୁଅଙ୍କ ବିବାହ ପାଇଁ ସମସ୍ୟାରେ ପଡୁଛନ୍ତି । ତେଣୁ ଏଥିପାଇଁ କନ୍ୟାରତ୍ନକୁ ଗୁରୁତ୍ଵ ଦେବା ଆବଶ୍ୟକ ବୋଲି ମତ ପ୍ରକାଶ ପାଇଛି ।