Son Killed Mother / ମାଆକୁ ହତ୍ୟା କରି ପ୍ଲାଷ୍ଟର କରିବା ଘଟଣା; ୫ ଦିନ ତଳୁ ଘଟିଥିଲା ନାରକୀୟ କାଣ୍ଡ

ପୁରୀ: କୁମ୍ଭାରପଡ଼ାରେ ଛାତିଥରା ଘଟଣା ପରେ ଅଞ୍ଚଳରେ ହଇଚଇ । ମାତ୍ର ୪ ମାସ ତଳେ ଭଡ଼ା ନେଇ ରହୁଥିବା ଜହ୍ଲାଦ ପୁଅ ମାଆର ହତ୍ୟାକାରୀ ସାଜିଛି । ଛତିଶଗଡ, ବିହାର, ଭୋଜପୁରରେ ଘଟୁଥିବା ଘଟଣା ପରି ଓଡ଼ିଶାରେ ବି ପ୍ରଥମ ଥର ଘଟିଛି ଏଭଳି ଅମାନୁଷିକ କାଣ୍ଡ । ମାଆକୁ ମାରି ସ୍ଲାବ ତଳେ ପ୍ଲାଷ୍ଟର କରିଥିବା ଜହ୍ଲାଦ ପୁଅକୁ ଖୋଜୁଛି ପୋଲିସ । ଏଥିଲାଗି ଗଠନ ହେଲା ମଲ୍ଟିପୁଲ ରେଡ୍ ଟିମ୍ । ଆଜି ମୃତଦେହର ଶବ ବ୍ୟବଚ୍ଛେଦ ହୋଇଥବାବେଳେ ରିପୋର୍ଟକୁ ରହିଛି ଅପେକ୍ଷା ।

ପୁରୀରେ ଭଡ଼ା ଘରେ ରହୁଥିବା ଏହି ଜହ୍ଲାଦ ପୁଅର ପରିଚୟ ମଦନ ଦଳାଇ ବୋଲି ଜଣାପଡ଼ିଛି, ଯିଏକି ପାରଳାଖେମୁଣ୍ଡିର ଅଧିବାସୀ । ନିଜ ମାଆକୁ ହତ୍ୟା କରି ରୋଷେଇ ଘରେ ପ୍ଲାଷ୍ଟର କରି ଫେରାର ହେବା ପରେ ମଦନକୁ ଖୋଜୁଛି ପୋଲିସ । ପାରଳାଖେମୁଣ୍ଡି ପୋଲିସକୁ ଫଟୋ ଜାରି କରିଛି ପୁରୀ ପୋଲିସ । ଭଡାଟିଆ ଅଭିଯୁକ୍ତର ପରିଚୟ ସମ୍ବନ୍ଧୀୟ କୌଣସି ଡକ୍ୟୁମେଣ୍ଟ ଦେଇପାରିନାହାନ୍ତି ଘର ମାଲିକ । ତେବେ ପୋଲିସ ଫୋନ୍ ନମ୍ବର ଓ ସିସିଟିଭି ଆଧାରକୁ ନେଇ ତଦନ୍ତ କରୁଛି ।

• ୫ଦିନ ତଳେ ଘଟାଇଛି ଜଘନ୍ୟକାଣ୍ଡ

ଗତ ୫ ଦିନ ତଳୁ ଏଭଳି ନାରକୀୟ ଘଟଣା ଘଟିଥିବା କଥା ସାଇଣ୍ଟିଫିକ୍ ଟିମ୍ ତଦନ୍ତ ପରେ ଅନୁମାନ କରୁଛି । ମୃତ ଶରୀର ଜବତ କରାଯାଇଥିବା ଭଡ଼ା ଘରକୁ ସିଲ୍ କରିଛି ପୋଲିସ୍ । ଜଣେ ଗୃହରକ୍ଷୀଙ୍କୁ ମଧ୍ୟ ସେଠାରେ ମୁତୟନ କରାଯାଇଛି । ତେବେ ଘର ମାଲିକ ରଖିଥିବା ସିସିଟିଭିରେ ଲୁଚି ରହିଛି ଅନେକ ଅକୁହା କଥା । ମାଆ ପୁଅଙ୍କୁ ପୂର୍ବରୁ କେବେ ସାହିରେ ଦେଖିନଥିବା କଥା ପଡ଼ୋଶୀ ମାନେ କହୁଥିବା ବେଳେ ସିସିଟିଭିରୁ ଏଭିଡେନ୍ସ ଓ ଆକ୍ଟିଭିଟି ସଂଗ୍ରହ କରୁଛି ପୋଲିସ୍ ।

ପଢନ୍ତୁ ଏହି ଖବର: ରୋଷେଇ ଘର ସ୍ଲାବ ତଳେ ମାଆର ଶବ; ହତ୍ୟା କରି ପ୍ଲାଷ୍ଟର କରିଦେଲା ପୁଅ

• ଜହ୍ଲାଦ ପୁଅକୁ ଖୋଜୁଛି ସ୍ଵତନ୍ତ୍ର ଟିମ୍

ସେପଟେ ଅଭିଯୁକ୍ତକୁ ଖୋଜିବା ପାଇଁ ପୁରି ସିଟି ଡିଏସପିଙ୍କ ନେତୃତ୍ୱରେ ପୋଲିସ ଗଠନ କରିଛି ମଲ୍ଟିପୁଲ ଟିମ୍ । ପାରଳାଖେମୁଣ୍ଡି ପୋଲିସ ସହ ଯୋଗାଯୋଗରେ ଅଭିଯୁକ୍ତକୁ ଖୋଜା ଯାଉଥିବା ବେଳେ ପାରଳାଖେମୁଣ୍ଡି ପୋଲିସକୁ ଅଭିଯୁକ୍ତର ଫଟୋ ଜାରି କରାଯାଇଛି । ଘଟଣା ସ୍ଥଳରୁ ଜବତ ଛୁରୀ, ବାସନ କୁସନ ଇତ୍ୟାଦି ନମୁନା ସଂଗ୍ରହ କରିଛି ସାଇଣ୍ଟିଫିକ୍ ଟିମ୍ । ଯଦି କେହି ଘରକୁ ଭଡ଼ାରେ ଲଗାଉଛନ୍ତି, ତେବେ ଭଡ଼ାଟିଆଙ୍କ ପରିଚୟ ପତ୍ରର କାଗଜପତ୍ର ରଖିବାକୁ ପୋଲିସ ସମସ୍ତଙ୍କୁ ଅନୁରୋଧ କରିଛି ।