ପୁରୀ: ଆସନ୍ତାକାଲି ସୋମବାର ଦେବସ୍ନାନ ପୂର୍ଣ୍ଣିମା । ସ୍ନାନ ପୂର୍ଣ୍ଣିମାକୁ ଦୃଷ୍ଟିରେ ରଖି ଆସନ୍ତକାଲି ବନ୍ଦ ରହିବ ସମସ୍ତ ବିଦ୍ୟାଳୟ । ଏନେଇ ପ୍ରଶାସନ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ଜ୍ୟେଷ୍ଠ ଶୁକ୍ଳ ପୂର୍ଣ୍ଣିମା ତିଥିରେ ସ୍ନାନଯାତ୍ରା ଅନୁଷ୍ଠିତ ହେବ । ଏହି ସମୟରେ ଭିଡ଼କୁ ନଜରକୁ ରଖି ବନ୍ଦ ରହିବ ସମସ୍ତ ସ୍କୁଲ୍ ।

ଏନେଇ ପୁରୀ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । DEO କାର୍ଯ୍ୟାଳୟରୁ ଜାରି ନିର୍ଦ୍ଦେଶ ଅନୁସାରେ, ଦେବସ୍ନାନ ପୂର୍ଣ୍ଣିମାରେ ପୁରୀ ପୌର ପରିଷଦ ଅଞ୍ଚଳରେ ଥିବା ସମସ୍ତ ସ୍କୁଲ୍ ଛୁଟି ରହିବ ।

ଏଥିସହ ପଢ଼ନ୍ତୁ: ଆସନ୍ତାକାଲି ଦେବସ୍ନାନ ପୂର୍ଣ୍ଣିମା, ଭକ୍ତଙ୍କ ପାଇଁ ଗାଇଡଲାଇନ ଜାରି କଲା ପୁରୀ ପୋଲିସ 

ସରକାରୀ ବିଦ୍ୟାଳୟ, ସରକାରୀ ସହାୟତାପ୍ରାପ୍ତ ବିଦ୍ୟାଳୟ ଏବଂ ଶିଶୁ ବାଟିକାରୁ ଦ୍ଵାଦଶ ପର୍ଯ୍ୟନ୍ତ ପଢ଼ା ଯାଉଥିବା ସମସ୍ତ ଘରୋଇ ବିଦ୍ୟାଳୟ ବନ୍ଦ ରହିବ । ପୁରୀ ମହାନଗର ନିଗମ ବ୍ୟତୀତ ଗୋରୁଆଳର ମଦର୍ସ ପବ୍ଲିକ ସ୍କୁଲ, ମାଳତିପାଟପୁରର ପ୍ରଭୁଶ୍ରୀ ଇଂରାଜୀ ମାଧ୍ୟମ ସ୍କୁଲ୍ ଓ ପୁରୀ ସଦର ଓଡ଼ିଶା ଆଦର୍ଶ ବିଦ୍ୟାଳୟ ମଧ୍ୟ ରହିବ ।

ସ୍ନାନ ପୂର୍ଣ୍ଣିମାରେ ପ୍ରବଳ ଭିଡ଼ ଓ ଟ୍ରାଫିକ କଟକଣାକୁ ଦୃଷ୍ଟିରେ ରଖି ବିଦ୍ୟାଳୟ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି । ପୁରୀ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ବିଜ୍ଞପ୍ତି ଜାରି କରିଛି ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ।

ସେପଟେ ଦେବସ୍ନାନ ପୂର୍ଣ୍ଣିମା ପାଇଁ ଶେଷ ହୋଇଛି ପ୍ରସ୍ତୁତି । ଶ୍ରୀମନ୍ଦିରରେ ଆରମ୍ଭ ହୋଇ ସାରିଛି ଦେବସ୍ନାନ ନୀତି। ଆଜି ଠାରୁ ମହାପ୍ରଭୁଙ୍କ ପାଇଁ ସୁନା କୂଅରୁ ଜଳ କଢ଼ାଯାଇ ସ୍ନାନ ମନ୍ତ୍ର ଉପଚାର କରାଯାଏ ଅଧିବାସ ଜଳକୁ ରଖାଯାଇଛି । ମହାପ୍ରଭୁ ଦୈନନ୍ଦିନ ବିମ୍ବ ସ୍ନାନ କରୁଥିବା ବେଳେ ବର୍ଷକରେ ଥରେ ଦେବସ୍ନାନ ପୂର୍ଣ୍ଣିମାରେ କରିବେ ଜ୍ୟେଷ୍ଠା ସ୍ନାନ ବା ପ୍ରତ୍ୟକ୍ଷ ସ୍ନାନ ।

ଏଥିସହ ପଢ଼ନ୍ତୁ: ରାତି ପାହିଲେ ଦେବସ୍ନାନ ପୂର୍ଣ୍ଣିମା,ଭୋର ୫ଟାରୁ ହେବ ଚତୁର୍ଦ୍ଧା ମୂର୍ତ୍ତିଙ୍କ ପହଣ୍ଡି 

ଗତକାଲି ବାହୁଟ କଣ୍ଟ ପରେ ଆଜି ସରିଛି ସେନାପଟା ଲାଗି ନୀତି । ସେପଟେ ଆଜି ମହାପ୍ରଭୁଙ୍କ ଚତୁର୍ଥୀ ହୋମ ପରେ ହେବ ପହୁଡ଼ । ଭୋର୍ ୫ଟାରୁ ୭ଟା ମଧ୍ୟରେ ପହଣ୍ଡି, ଦିନ ୧୨ଟାରୁ ୨ଟା ମଧ୍ୟରେ ଜଳ ବିଜେ ଓ ସ୍ନାନ ନୀତି, ଅପରାହ୍ଣ ୪ଟାରୁ ୫ଟା ମଧ୍ୟରେ ହାତୀ ବେଶ, ସନ୍ଧ୍ୟା ୭ଟା ୩୦ରୁ ୯ଟା ୩୦ ପର୍ଯ୍ୟନ୍ତ ସାହାଣମେଲା ଦର୍ଶନ, ରାତି ୧୧ରୁ ୨ଟା ମଧ୍ୟରେ ବାହୁଡ଼ା ପହଣ୍ଡି ହେବ ।

ଜଗନ୍ନାଥଙ୍କୁ ୩୫ଗରା, ବଳଭଦ୍ରଙ୍କୁ ୩୩ଗରା, ସୁଭଦ୍ରାଙ୍କୁ ୨୨ଗରା ଓ ସୁଦର୍ଶନଙ୍କୁ ୧୮ଗରା ଜଳ ଲାଗି ହେବ । ଜଳ ବିଜେ ଓ ହାତୀ ବେଶ ଅକ୍ଷତ ପାଇଁ ସ୍ୱତନ୍ତ୍ର ବ୍ୟବସ୍ଥାବଳୀକୁ କଡ଼ାକଡ଼ି ଅନୁପାଳନ ପାଇଁ ବ୍ୟବସ୍ଥା ହୋଇଛି ।