ଆଜି ଗୋଟିଏ ଦିନ ପାଇଁ ହେବ ଶ୍ରୀଜିଉଙ୍କ ରତ୍ନ ଗଣତି କାର୍ଯ୍ୟ । ଶ୍ରୀଜିଉମାନଙ୍କ ଶ୍ରୀଅଙ୍ଗରେ ବ୍ୟବହୃତ ଏବଂ ସ୍ନାନ ପୂର୍ଣ୍ଣିମା ଅବସରରେ ଓଲାଗି ହୋଇଥିବା ଅଳଙ୍କାରାଦିର ଗଣତି ହେବ । ଗତ ୨୩ ମେ' ୨୦୨୬ ତାରିଖଠାରୁ ଶ୍ରୀମନ୍ଦିର ରତ୍ନଭଣ୍ଡାରରେ ଗଚ୍ଛିତ ଅଳଙ୍କାର ଓ ଅନ୍ୟାନ୍ୟ ମୂଲ୍ୟବାନ ସାମଗ୍ରୀର ଗଣତି କାର୍ଯ୍ୟ ସ୍ଥଗିତ ରହିଥିଲା ।

ଶ୍ରୀଜିଉମାନଙ୍କ ଶ୍ରୀଅଙ୍ଗରେ ବ୍ୟବହୃତ ଏବଂ ସ୍ନାନ ପୂର୍ଣ୍ଣିମା ଅବସରରେ ଓଲାଗି ହୋଇଥିବା ଅଳଙ୍କାରାଦିର ଗଣତି ହୋଇପାରିନଥିଲା । ଏହି ଗଣତି କାର୍ଯ୍ୟ ରାଜ୍ୟ ସରକାରଙ୍କ ଅନୁମୋଦିତ ବ୍ୟବସ୍ଥାବଳୀ ଓ SOP ଅନୁଯାୟୀ ସମ୍ପାଦନ କରାଯିବ । ଭିତର ରତ୍ନଭଣ୍ଡାରରେ ଗଚ୍ଛିତ ଅବଶିଷ୍ଟ ଅଳଙ୍କାର ଓ ମୂଲ୍ୟବାନ ସାମଗ୍ରୀର ଗଣତି କାର୍ଯ୍ୟର ତାରିଖ ପରବର୍ତ୍ତୀ ସମୟରେ ଅବଗତ କରାଯିବ । ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟର ସୂଚାରୁରୂପେ ସମ୍ପାଦନ ପାଇଁ ପୂର୍ବଭଳି ସମସ୍ତ ସେବାୟତ ଏବଂ ସଦସ୍ୟମାନଙ୍କ ଆନ୍ତରିକ ସହଯୋଗ କାମନା କରିଛି ଶ୍ରୀମନ୍ଦିର ପ୍ରଶାସନ ।

ଅଧିକ ପଢ଼ନ୍ତୁ: ମହାପ୍ରଭୁଙ୍କ ବିନା ଟାହିଆ ପହଣ୍ଡି ପ୍ରସଙ୍ଗ; କଣ ହୋଇଥିଲା କହିଲେ ବାଡଗ୍ରାହୀ ସେବକ

ସେପଟେ ଆଡ଼ପ ଦର୍ଶନ ପାଇଁ ଶ୍ରୀକ୍ଷେତ୍ରରେ ଭକ୍ତଙ୍କ ଗହଳି । ଗୁଣ୍ଡିଚା ମନ୍ଦିରରେ ସକାଳୁ ସକାଳୁ ଭକ୍ତଙ୍କ ଭିଡ଼ । ୧୧ ଟା ୩୦ ରେ ପହଣ୍ଡି ଶେଷ ହେବାପରେ ରାତ୍ର ୩ ଟା ୩୦ ସୁଦ୍ଧା ଶ୍ରୀବିଗ୍ରହଙ୍କ ରୁନ୍ଧା ଶେଷ ହୋଇଛି । ଆଡ଼ପ ମଣ୍ଡପରେ ରୁନ୍ଧା ହୋଇଛନ୍ତି ଚତୁର୍ଦ୍ଧାମୂର୍ତ୍ତି। ସକାଳ ୬ ଟା ୨୦ ସୁଦ୍ଧା ଦଇତାପତି ସର୍ବାଙ୍ଗ ହୋଇଥିବା ବେଳେ କୋଠ ସୁଆଁସିଆ ମାନେ ସକାଳ ୬ ଟା ୩୫ ବେଳକୁ ଭିତରକୁ ପ୍ରବେଶ କରିଛନ୍ତି । ଚାରମାଳ ଫିଟାଯିବା ପରେ ଦ୍ୱାରଫିଟା, ମଙ୍ଗଳ ଆଳତୀ ହେବ । ପୂର୍ବାହ୍ନ ୧୦ ଟା ପରେ ଚଳିତ ବର୍ଷ ଆଡ଼ପ ମଣ୍ଡପରେ ମହାପ୍ରଭୁଙ୍କ ପ୍ରଥମ ଦର୍ଶନ ପାଇବେ ଶ୍ରଦ୍ଧାଳୁ । ଆଡ଼ପ ଦର୍ଶନ ପାଇଁ ବଡ଼ଦାଣ୍ଡରେ ଜନସମୁଦ୍ର । ଶ୍ରୀ ଗୁଣ୍ଡିଚା ମନ୍ଦିର ସମ୍ମୁଖରୁ ଡାକ୍ତରଖାନା ଛକ ପର୍ଯ୍ୟନ୍ତ ଭକ୍ତଙ୍କ ଭିଡ଼। ଲମ୍ବା ଲାଇନରେ ଅପେକ୍ଷା କରିଛନ୍ତି ହଜାର ହଜାର ଭକ୍ତ। ତିନି ଟିକିଆ ଲାଇନରେ ଠିଆ ହୋଇଛନ୍ତି ଶ୍ରଦ୍ଧାଳୁ ।