Odisha Bandh / "ଓଡ଼ିଶା ବନ୍ଦ ପ୍ରଭାବହୀନ"; କଂଗ୍ରେସ ସହିତ ଲୋକ ନାହାନ୍ତି କହିଲେ ସାଂସଦ ରବି ନାରାୟଣ

ଭୁବନେଶ୍ଵର/ଭଦ୍ରକ/ ଢେଙ୍କାନାଳ/କେନ୍ଦ୍ରାପଡ଼ା: ଆଜି ଓଡ଼ିଶା ବନ୍ଦ । ୪ ଦଫା ଦାବି ନେଇ ୧୨ ଘଣ୍ଟିଆ ଓଡ଼ିଶା ବନ୍ଦ ଡାକରା ଦେଇଛି ଇଣ୍ଡି ମେଣ୍ଟ । ସକାଳ ୬ଟାରୁ ସନ୍ଧ୍ୟା ୬ଟା ଯାଏଁ ବନ୍ଦ ପାଳନ ହେବ । ତେବେ କଂଗ୍ରେସର ଓଡ଼ିଶା ବନ୍ଦ ପ୍ରଭାବହୀନ ଏବଂ କଂଗ୍ରେସ ସହିତ ଲୋକ ନାହାନ୍ତି ବୋଲି ସ୍ପଷ୍ଟ ଜଣାପଡୁଛି କହିଲେ ବିଜେପି ସାଂସଦ ରବି ନାରାୟଣ ବେହେରା ।

ସେ କହିଛନ୍ତି, "କଂଗ୍ରେସର ଓଡ଼ିଶା ବନ୍ଦ ପ୍ରଭାବହୀନ । କଂଗ୍ରେସ ସହିତ ଲୋକ ନାହାନ୍ତି । ଆମେ ଦେଖୁଛୁ କିଛି ସ୍ଥାନରେ କଂଗ୍ରେସ ଲୋକଙ୍କୁ ବାଧ୍ୟ କରୁଛି । ତାଙ୍କ କାମ ହେଉଛି ଅରାଜକତା ସୃଷ୍ଟି କରିବା । ଅରାଜକତା ସୃଷ୍ଟି କରିକି କ୍ଷମତାରୁ ଗଲେ । ଏମଏମଡିଆର ସଂଶୋଧନ ବାବଦରେ ଓଡ଼ିଶାବାସୀ ସ୍ପଷ୍ଟ ଅଛନ୍ତି । ମୋଦି ସରକାର ଆସିବା ପରେ ଓଡ଼ିଶା ଖଣିରୁ କଣ ପାଇଛି ? ଓଡ଼ିଶାରେ ଡବଲ ଇଂଜିନ ସରକାର ଆସିବା ପରେ ବି ରାଜସ୍ବ ବଢିଛି । ତେଣୁ ରାଜ୍ୟବାସୀ ବୁଝିଛନ୍ତି, ସେଥିପାଇଁ ଓଡ଼ିଶା ବନ୍ଦକୁ ସଫଳ କରିନାହାନ୍ତି ।"

• ବନ୍ଦ ପାଳନକୁ ନିନ୍ଦା କଲେ ଢେଙ୍କାନାଳ ସାଂସଦ

ଢେଙ୍କାନାଳ ସାଂସଦ ତଥା ବରିଷ୍ଠ ବିଜେପି ନେତା ରୁଦ୍ର ନାରାୟଣ ପାଣି ବନ୍ଦ ପାଳନକୁ ନିନ୍ଦା କରିଛନ୍ତି । ସେ କହିଛନ୍ତି, "ନିଜର ତ୍ରୁଟି ଯୋଗୁଁ ଦୀର୍ଘ ଦିନରୁ କ୍ଷମତାରୁ ବାଦ୍‌ ପଡିଥିବା କଂଗ୍ରେସର ବନ୍ଦ ଡାକରା ସମ୍ପୂର୍ଣ୍ଣ ଅଯୌକ୍ତିକ ।" କଂଗ୍ରେସ ହିଂସାକୁ ପସନ୍ଦ କରେ ତେଣୁ ବନ୍ଦ ସମୟରେ ସମ୍ଭାବ୍ୟ ହିଂସା ପ୍ରତି ସାଧାରଣ ଲୋକେ ସତର୍କ ରହିବାକୁ ପରାମର୍ଶ ଦେଇଛନ୍ତି । ଏହାସହ ବିଜେଡିର ଷ୍ଟାଣ୍ଡକୁ ନେଇ ବିଜୁ ଜନତା ଦଳ ଏକ ନିରାଶ ଦଳ ଭାବେ ପରିଗଣିତ ହୋଇଛି ବୋଲି ସେ କହିଛନ୍ତି ।

• ରୋଗୀଙ୍କୁ ଛାଡିଲେନି ବାଟ

କେନ୍ଦ୍ରାପଡା ଜିଲ୍ଲା ରାଜନଗର ହଂସୁଆ ନଦୀ ଉପର ବ୍ରିଜ ଉପରୁ ଆସିଛି ଏହି ଖବର । ଆନ୍ଦୋଳନ ଆଳରେ ଏକାଧିକ ରୋଗୀଙ୍କୁ ବାଟ ଛାଡିଲେନି କଂଗ୍ରେସ କର୍ମୀ । ଆଜି ସକାଳ ୯ଟା ସମୟରେ ଯେତେବେଳେ ଭାରତ ବନ୍ଦ କରିବାକୁ ହଂସୁଆ ନଦୀ ଉପର ବ୍ରିଜକୁ ସିଲ୍ କରିଥିଲା କଂଗ୍ରେସ । ବ୍ରିଜ ଉପରେ ଫସିକି ରହିଥିଲେ ବୟସ୍କା ବୃଦ୍ଧାଙ୍କଠୁ ନେଇ ଅନେକ ରୋଗୀ । କିଏ ନିଜ ଭଙ୍ଗା ଗୋଡ଼କୁ ଧରି ଛଟପଟ ହେଉଥିବା ବେଳେ ଆଉ କିଏ ଫାଟି ଯାଇଥିବା ମୁଣ୍ଡରେ କପଡା ବାନ୍ଧି ଡାକ୍ତରଖାନା ଯିବକୁ ପ୍ରୟାସ କରୁଥିଲା । ଏପରିକି ଛୋଟ ପିଲାଙ୍କଠୁ ନେଇ କଲେଜ ଛାତ୍ରଛାତ୍ରୀ ସମସ୍ତେ ଏହି ବନ୍ଦ ପାଇଁ ଭୋଗିଥିଲେ ନାନା ସମସ୍ୟା । ଓଡ଼ିଶା ବନ୍ଦ ଆଳରେ କଂଗ୍ରେସର ଏହି ଅମାନବିକତାକୁ ସ୍ଥାନୀୟ ଅଞ୍ଚଳରେ ସମାଲୋଚନା କରାଯାଇଛି ।

ପଢନ୍ତୁ ଏହି ଖବର: ବାହାରିଲା ନିର୍ବାଚନ ବିଜ୍ଞପ୍ତି, ଲାଗିଲାଣି ବ୍ୟାନର ପୋଷ୍ଟର...ଉଷ୍ମ ହେଲାଣି ଛାତ୍ର ରାଜନୀତି

• ଯାତ୍ରୀମାନଙ୍କ କାରକୁ ଭାଙ୍ଗିଲେ ଆନ୍ଦୋଳନକାରୀ

ବନ୍ଦ ବେଳେ ଯାତ୍ରୀମାନଙ୍କ କାରକୁ ଭାଙ୍ଗିଲେ ଆନ୍ଦୋଳନକାରୀ । ଏମିତି ଦୃଶ୍ୟ ଦେଖିବାକୁ ମିଳିଛି ଭଦ୍ରକ ଜିଲ୍ଲା ୧୬ ନଂ ଜାତୀୟ ରାଜପଥ କଲେଜ ଛକ ନିକଟରେ । ଏଠାରେ ଆନ୍ଦୋଳନକାରୀମାନେ ସକାଳୁ ରାସ୍ତା ଅବରୋଧ କରି ରଖିଥିଲେ । ଏହି ରାସ୍ତା ଦେଇ ଯାତ୍ରୀମାନେ ଜରୁରୀ କାମ ପାଇଁ ଯାଉଥିବାବେଳେ ଆନ୍ଦୋଳନକାରୀମାନେ ଗାଡ଼ିକୁ ଅଟକାଇଥିଲେ । ତେବେ ଆନ୍ଦୋଳନକାରୀଙ୍କ ମଧ୍ୟରୁ ଜଣେ ଯାତ୍ରୀଙ୍କ ଗାଡିରେ ଲାଗିଥିବା ମିରରକୁ ଗୋଇଠା ମାରିଥିଲା । ପୋଲିସ ବୁଝାସୁଝା କରିବା ବେଳେ ଅନ୍ୟ ଏକ ଆନ୍ଦୋଳନକାରୀ ଏକ ବାଡ଼ିରେ ଗାଡିଟିର ବନେଟକୁ ମାଡ଼ ମାରିଥିଲେ । ପୋଲିସ ସେହି ଆନ୍ଦୋଳନକାରୀକୁ ଅଟକାଇବା ବେଳେ ପୋଲିସର କଲର ଧରିଥିଲେ ଆନ୍ଦୋଳନକାରୀ । ପରେ ପୋଲିସ ସମ୍ପୃକ୍ତ ଆନ୍ଦୋଳନକାରୀଙ୍କୁ ଅଟକ ରଖିଛି ।