Srimandir Raksha Bandhan / ଆଜି ଶ୍ରୀମନ୍ଦିରରେ ରକ୍ଷାବନ୍ଧନ; ମଧ୍ୟାହ୍ନଧୂପ ପରେ ଦୁଇ ଭାଇଙ୍କୁ ରାକ୍ଷୀ ପିନ୍ଧାଇବେ ଭଉଣୀ ସୁଭଦ୍ରା

ପୁରୀ: ଗତକାଲି ଜନସାଧାରଣ ପବିତ୍ର ରାକ୍ଷୀ ପୂର୍ଣ୍ଣିମା ପାଳନ କରିସାରିଥିବାବେଳେ ଆଜି ଶ୍ରୀମନ୍ଦିରରେ ପାଳିତ ହେବ ରାକ୍ଷୀ ପୂର୍ଣ୍ଣିମା । ଶ୍ରୀମନ୍ଦିରରେ ସମସ୍ତ ନୀତିକାନ୍ତି ସ୍କନ୍ଦ ପୁରାଣ ଆଧାରରେ ଉଦୟ କାଳୀନ ପର୍ବକୁ ନେଇ ହୁଏ । ଏଣୁ ଆଜି ହିଁ ଶ୍ରୀମନ୍ଦିରରେ ରକ୍ଷା ବନ୍ଧନ, ଗହ୍ମା ପୂର୍ଣ୍ଣିମା, ବଳଭଦ୍ର ଜନ୍ମ ନୀତି, ଚାରି ଆଶ୍ରମ ବିଜେ ନୀତି ଅନୁଷ୍ଠିତ ହେବ। ମଧ୍ୟାହ୍ନଧୂପ ପରେ ଦୁଇ ଭାଇଙ୍କୁ ରାକ୍ଷୀ ପିନ୍ଧାଇବେ ଭଉଣୀ ସୁଭଦ୍ରା ।

ଆଜି ଗହ୍ମା ପୂର୍ଣ୍ଣିମା ଓ ବଳଭଦ୍ର ଜନ୍ମ ଉପଲକ୍ଷେ ଶ୍ରୀମନ୍ଦିରରେ ହେବ ସ୍ବତନ୍ତ୍ର ନୀତିକାନ୍ତି ଅନୁଷ୍ଠିତ ହେବ । ମଧ୍ୟାହ୍ନଧୂପ ପରେ ବଳଭଦ୍ର ଓ ଶ୍ରୀଜଗନ୍ନାଥଙ୍କୁ ରାକ୍ଷୀ ପିନ୍ଧାଇବେ ଭଉଣୀ ସୁଭଦ୍ରା । ସେପଟେ ମାର୍କଣ୍ଡ ପୁଷ୍କରିଣୀରେ ଅନୁଷ୍ଠିତ ହେବ ବଳଭଦ୍ରଙ୍କ ଜନ୍ମନୀତି ।

• ଆଜି କେବଳ ଶ୍ରୀମନ୍ଦିରରେ କାହିଁକି ରାକ୍ଷୀ ପୂର୍ଣ୍ଣିମା ?

ଗତକାଲି (ଗୁରୁବାର) ସକାଳ ୯ଟା ୮ ପରଠାରୁ ପୂର୍ଣ୍ଣିମା ତିଥି ପ୍ରବେଶ କରିଥିଲା । ଦିନ ତମାମ ଗତକାଲି ପୂର୍ଣ୍ଣିମା ତିଥି ରହିଥିଲା । ମଧ୍ୟାହ୍ନ କାଳୀନ ପର୍ବ ଭାବରେ ଗୁରୁବାର ରାକ୍ଷୀ ଉତ୍ସବ ପାଳନ କରିଥିଲେ ଜନ ସାଧାରଣ । ତେବେ ପୂର୍ଣ୍ଣିମା ତିଥି ଆଜି ସକାଳ ୯ଟା ୪୮ ପର୍ଯ୍ୟନ୍ତ ଅଛି । ଶ୍ରୀମନ୍ଦିରରେ ସମସ୍ତ ନୀତିକାନ୍ତି ସ୍କନ୍ଦ ପୁରାଣ ଆଧାରରେ ଉଦୟ କାଳୀନ ପର୍ବକୁ ନେଇ ହୁଏ । ତେଣୁ ଗତକାଲି ସୂର୍ଯ୍ୟ ଉଦୟ ସମୟରେ ପୂର୍ଣ୍ଣିମା ତିଥି ନଥିବାରୁ କାଲି ଶ୍ରୀମନ୍ଦିରରେ ପର୍ବ ପାଳିତ ହୋଇନଥିଲା ।

ପଢନ୍ତୁ ଏହି ଖବର: ରାକ୍ଷୀ ପୂର୍ଣ୍ଣିମାରେ ମହିଳାଙ୍କୁ କ୍ରୁଟ୍‌ର ବଡ଼ ଉପହାର, 'ଆମ ବସ୍‌'ରେ ମାଗଣା ଯାତ୍ରା

ଆଜି ସୂର୍ଯ୍ୟ ଉଦୟ ସମୟରେ ପୂର୍ଣ୍ଣିମା ତିଥି ରହୁଥିବାରୁ ଆଜି ହିଁ ଶ୍ରୀମନ୍ଦିରରେ ରକ୍ଷା ବନ୍ଧନ, ଗହ୍ମା ପୂର୍ଣ୍ଣିମା, ବଳଭଦ୍ର ଜନ୍ମ ନୀତି, ଚାରି ଆଶ୍ରମ ବିଜେ ନୀତି ଅନୁଷ୍ଠିତ ହେବ । ଜ୍ୟୋତିର୍ବିଦଙ୍କ ମତରେ ଆଜି ସକାଳ ୯ଟା ୪୮ ପରେ ଆଉ ତିଥି ନାହିଁ । ତେଣୁ ଶ୍ରୀମନ୍ଦିରକୁ ଛାଡି ଅନ୍ୟ ସ୍ଥାନରେ, ଘରେ ଘରେ ଗତକାଲି ପାଳିତ ହୋଇଯାଇଛି ରାକ୍ଷୀ ପୂର୍ଣ୍ଣିମା ।

• ମାର୍କଣ୍ଡ ପୁଷ୍କରିଣୀରେ ଅନୁଷ୍ଠିତ ହେବ ବଳଭଦ୍ରଙ୍କ ଜନ୍ମନୀତି

ଆଜି ଶ୍ରୀମନ୍ଦିରରେ ଦ୍ୱିପ୍ରହର ଧୂପ ପରେ ମଙ୍ଗଳାର୍ପଣ କରାଯାଇ ଚଉଦଳରେ ଚକ୍ରରାଜ ସୁଦର୍ଶନ ମାର୍କଣ୍ଡ ପୁଷ୍କରିଣୀ ଯାତ୍ରା କରି ବଳଭଦ୍ରଙ୍କ ଜନ୍ମନୀତି କରିବେ । ମାଟିର ବଳଭଦ୍ର ପ୍ରତିମା ନିର୍ମାଣ କରି ଜୀବନ୍ୟାସ ଦେବା ପରେ ଜାତକର୍ମ ଅନୁଷ୍ଠିତ ହେବ । ପଞ୍ଚୋପଚାର, ଶୀତଳ ମଣୋହୀ, ବନ୍ଦାପନା କରାଯାଇ ବଳଭଦ୍ରଙ୍କ ପ୍ରତିମାକୁ ମାର୍କଣ୍ଡ ପୁଷ୍କରିଣୀରେ ବିସର୍ଜନ କରାଯିବ । ପରିଶେଷରେ ବିମାନବଡୁ ସେବକ ସୁଦର୍ଶନଙ୍କୁ ବିମାନରେ ବସାଇ ଚାରି ଆଶ୍ରମ ଭ୍ରମଣ କରି ଶ୍ରୀମନ୍ଦିର ପ୍ରତ୍ୟାବର୍ତ୍ତନ କରିବେ ।