ମହାପ୍ରଭୁଙ୍କ ବିଶ୍ବ ପ୍ରସିଦ୍ଧ ଘୋଷଯାତ୍ରା ପାଇଁ ସଜେଇ ହେଉଛି ଶ୍ରୀକ୍ଷେତ୍ର । ଆଇନ ମନ୍ତ୍ରୀଙ୍କ ଅଧ୍ୟକ୍ଷତାରେ ଶେଷ ହୋଇଛି ରଥଯାତ୍ରା ଦ୍ୱିତୀୟ ସମନ୍ୱୟ ବୈଠକ । ସବୁ ଲାଇନ୍ ଡିପାର୍ଟମେଣ୍ଟର ରିପୋର୍ଟ ଦେଖିବା ପରେ ଅଧିକାରୀମାନଙ୍କୁ କଡ଼ା ଟାସ୍କ ଦେଇଛନ୍ତି ଆଇନ ମନ୍ତ୍ରୀ । ଗତବର୍ଷର ତ୍ରୁଟି ସୁଧାରିବାକୁ ଚଳିତ ଜାନୁଆରୀରୁ ପ୍ରସ୍ତୁତି ଚାଲିଥିବା ବେଳେ ମନ୍ତ୍ରୀ, ସଚିବ ଓ ମୁଖ୍ୟ ଶାସନ ସଚିବଙ୍କ ମଧ୍ୟରେ ୱାନ-ଟୁ-ୱାନ ଆଲୋଚନା ହୋଇଛି ।

ଆସନ୍ତା ଜୁଲାଇ ୫ ତାରିଖ ପରେ ପୁରୀ ସହରରେ କୌଣସି ପ୍ରକାର ଖନନ କାର୍ଯ୍ୟ କରାଯିବ ନାହିଁ ବୋଲି ସ୍ପଷ୍ଟ ଚେତାବନୀ ଦିଆଯାଇଛି । ଏଥର ରଥଯାତ୍ରାରେ ଭକ୍ତଙ୍କ ସ୍ୱାସ୍ଥ୍ୟ ସେବା ଉପରେ ବିଶେଷ ଫୋକସ୍‌ କରାଯାଇଛି । ବଡ଼ଦାଣ୍ଡର ଦୁଇ ପାର୍ଶ୍ୱରେ ୮ଟି ଅସ୍ଥାୟୀ ମେଡିକାଲ ସହ ସହରର ୩୦ଟି ସ୍ଥାନରେ ରହିବ ଫାଷ୍ଟ ଏଡ୍ ସେଣ୍ଟର । ପୁରୀ ମୁଖ୍ୟ ଚିକିତ୍ସାଳୟରେ ୧୦ଟି ICU ଏବଂ ୧୦ଟି ଟ୍ରମା ବେଡ୍ ସହ ନୂଆ ବିଲ୍ଡିଂରେ ୧୫୦ ବେଡ୍ ପ୍ରସ୍ତୁତ ରଖାଯାଇଛି । ଜରୁରୀକାଳୀନ ପରିସ୍ଥିତିରେ ଆମ୍ବୁଲାନ୍ସ ଯାତାୟାତ ପାଇଁ ବଡ଼ଦାଣ୍ଡରେ ସ୍ୱତନ୍ତ୍ର ‘ଗ୍ରୀନ କରିଡର୍’ ବ୍ୟବସ୍ଥା କରାଯିବ । ଜୁନ୍ ୨୫ରୁ ଜୁଲାଇ ୨୭ ପର୍ଯ୍ୟନ୍ତ ସମସ୍ତ ସ୍ୱାସ୍ଥ୍ୟ ଅଧିକାରୀ ଡ୍ୟୁଟିରେ ରହିବେ ।

ଅଧିକ ପଢ଼ନ୍ତୁ: ଜୁଲାଇ ପ୍ରଥମ ସପ୍ତାହରେ ଲଘୁଚାପ ସମ୍ଭାବନା; ୫ ଦିନ ବର୍ଷା ନେଇ ଆଲର୍ଟ ଜାରି

ସେପଟେ ଗମନାଗମନକୁ ସୁଗମ କରିବା ପାଇଁ ରଥଯାତ୍ରାରେ ଗଡ଼ିବ ୩୭୦ ସ୍ୱତନ୍ତ୍ର ଟ୍ରେନ୍ ସମେତ ମୋଟ ୧୨୦୦ରୁ ଉର୍ଦ୍ଧ୍ୱ ଟ୍ରେନ୍ । ଷ୍ଟେସନରେ ସୁରକ୍ଷା ପାଇଁ ୨୫୦ଟି ଫେସ୍ ରେକଗ୍ନିସନ କ୍ୟାମେରା ଲଗାଯିବ । ଦେଢ଼ ଲକ୍ଷ ଭକ୍ତଙ୍କ ପାଇଁ ଖାଦ୍ୟ ବ୍ୟବସ୍ଥା ସହ ୨୫ ହଜାର କ୍ଷମତାର ହୋଲ୍ଡିଂ ଏରିଆ, ୧୦୦ ଟଏଲେଟ୍, ୬୫ ୱାଟର କୁଲର୍ ଏବଂ ଅତିରିକ୍ତ ୩୫ଟି ଟିକେଟ କାଉଣ୍ଟର ପ୍ରସ୍ତୁତ ରହିବ । ଶ୍ରୀକ୍ଷେତ୍ରର ସୁରକ୍ଷା ବ୍ୟବସ୍ଥାକୁ ଏଥର ଅଭେଦ୍ୟ କରାଯାଇଛି। ପୋଲିସ ପକ୍ଷରୁ ସହରରେ ୪୭୩ଟି ସିସିଟିଭି କ୍ୟାମେରା ଲଗାଯିବ ।