ରାଜଧାନୀରେ ମଦ ବିକ୍ରିର ନୂଆ ତରିକା । ଘର ଉପରେ ଉଡୁଥିଲା ନାଲି ପତାକା, ଯାହାକୁ ଦେଖି ମଦ ପ୍ରସ୍ତୁତିର ଠିକଣା ଜାଣିପାରୁଥିଲେ ନିଶାଡି । ଭୁବନେଶ୍ୱର ସାଲିଆସାହି ବସ୍ତି ଭିତରେ ବେଧଡ଼କ ଚାଲିଥିଲା ମଣିଷ ମରା ଦେଶୀ ମହୁଲି ମଦର କାରଖାନା । ରଜ ବଜାରରେ ଏହାକୁ ଚଢ଼ା ଦରରେ ବିକ୍ରି ପାଇଁ ମାଫିଆମାନେ ସୁପର ମାଷ୍ଟରପ୍ଲାନ କରିଥିଲେ । ହେଲେ ରଜ ମାର୍କେଟ୍ ଜମିବା ପୂର୍ବରୁ ଅବକାରୀ ବିଭାଗ ମାରିଛି ବଡ଼ ରେଡ୍ । ନଷ୍ଟ ହୋଇଛି ହଜାର ହଜାର ଲିଟର ଦେଶୀ ମଦ ଏବଂ ବ୍ୟାରେଲ୍ । ଏହି ଘଟଣାରେ ୪ ଜଣ ଗିରଫ ମଧ୍ୟ ହୋଇଛନ୍ତି ।

ଘର ଭିତରେ ବେଧଡ଼କ ତିଆରି ହେଉଥିଲା ଦେଶୀ ମହୁଲି ମଦ । ମହୁଲ ଫୁଲ ସହ ମିଶୁଥିଲା ଚିନି ଆଉ ୟୁରିଆ । ପ୍ରସ୍ତୁତ ହେଉଥିଲା ମଣିଷ ମରା ଦେଶୀ ମଦ । ଗୋଟିଏ ରୁମ୍‌ରେ ଥାକ ଥାକ କରି ଡ୍ରମ୍ ଉପରେ ଡ୍ରମ୍ ପ୍ରସ୍ତୁତ କରି ରଖାଯାଇଥିବା ବେଳେ, ଅନ୍ୟ ରୁମ୍‌ରେ ହୋଇଥିଲା ସ୍ୱତନ୍ତ୍ର ଚାମ୍ବର । ଚୁଲିରୁ ଯେଉଁ ବାଷ୍ପ ବାହାରୁଥିଲା ତାହା ଥଣ୍ଡା ଚାମ୍ବର ଦେଇ ବୋତଲରେ ମଦ ସାଉଣ୍ଟୁଥିଲା । ଆଗକୁ ରଜ ବଜାର ଥିବାରୁ ଏହାକୁ ବଡ଼ ପରିମାଣରେ ବିକ୍ରି କରିବାକୁ ପ୍ରସ୍ତୁତି ଚାଲିଥିଲା । ହେଲେ ତା’ ପୂର୍ବରୁ ଅବକାରୀ ବିଭାଗ ମାରିଛି ରେଡ୍‌ । ନଷ୍ଟ ହୋଇଛି ହଜାର ହଜାର ଲିଟର ବିଷାକ୍ତ ଦେଶୀ ମହୁଲି ମଦ ।

ଅଧିକ ପଢ଼ନ୍ତୁ: ରଥଯାତ୍ରା ପୂର୍ବରୁ ଅଠରନଳାରୁ ବଡ଼ଦାଣ୍ଡ ହେବ ‘ଫିକା ଗୋଲାପୀ’; ଖର୍ଚ୍ଚ ହେବ ୨ କୋଟି ୩୫ ଲକ୍ଷ

ସାଲିଆସାହି ବସ୍ତିର ଶତାଧିକ ଘର ଭିତରେ ଦୀର୍ଘ ବର୍ଷ ଧରି ଏମିତି ବେଧଡ଼କ ଭାବେ ଚାଲିଥିଲା ମଦ ପ୍ରସ୍ତୁତି । କଳାହାଣ୍ଡି, କୋରାପୁଟ ଓ ମୟୁରଭଞ୍ଜରୁ ଆସୁଥିଲା କୁଢ଼ କୁଢ଼ ମହୁଲ ଫୁଲ । ଆଉ ଏଠାରେ ନିଶା ମାଫିଆ ପ୍ରସ୍ତୁତ କରୁଥିଲେ ମଦ । କେହି ଏହାର ଟେର ପାଉନଥିଲେ । ହେଲେ ଏହି କଳା ସାମ୍ରାଜ୍ୟ ଉପରେ ଏବେ ଅବକାରୀ ବିଭାଗର ଚଢ଼ାଉ ପରେ ସବୁ ପ୍ଲାନ ଫ୍ଲପ୍ ହୋଇଯାଇଛି । ଆଜି ବୁଲଡୋଜର ଲଗାଇ ଭଙ୍ଗା ହୋଇଛି ମଦ ଭାଟି ଆଉ ନଷ୍ଟ କରାଯାଇଛି ମଦ ପୋଚ ।

ରାଜଧାନୀ ଛାତି ଉପରେ ସାଲିଆସାହି ବସ୍ତି ଭିତରେ ଚାଲିଥିଲା ମଦ ବିକ୍ରିର ଏହି ନୂଆ ତରିକା । ଘର ଉପରେ ଉଡୁଥିବା ନାଲି ପତାକାକୁ ଦେଖି ଠିକଣା ବାରି ନେଉଥିଲେ ନିଶାଡି । ଏହି ଘଟଣାରେ ଅବକାରୀ ବିଭାଗ ୪ ଜଣଙ୍କୁ ଗିରଫ କରିଥିବା ବେଳେ ଆହୁରି ଅନେକ ଅଭିଯୁକ୍ତ ଏବେ ଫେରାର ଅଛନ୍ତି ।