Bhubaneswar Market Fire / କାହିଁକି ବାରମ୍ବାର ଜଳୁଛି ୧ ନମ୍ବର ମାର୍କେଟ, ବାରମ୍ବାର ଜଳିବା ପରେ ବି ଭାଙ୍ଗୁନି BMCର ନିଦ

ଅବେଳାରେ ନିଆଁ ଲାଗୁଛି । ହୁତୁ ହୁତୁ ହୋଇ ଜଳୁଛି ରାଜଧାନୀର ଛାତି ଉପରେ ଥିବା ଗୁରୁତ୍ବପୂର୍ଣ୍ଣ ବଜାର ଏକ ନମ୍ବର ମାର୍କେଟ । ବାରମ୍ବାର ସ୍ଥିତି ସମୀକ୍ଷା କରୁଛନ୍ତି ଅଧିକାରୀ । ହେଲେ ନା ଭିତ୍ତିଭୂମି ସୁଧୁରୁଛି ନା ସ୍ଥିତିରେ ହେଉଛି କୌଣସି ପରିବର୍ତ୍ତନ ।

କିଛି ଦିନର ବ୍ୟବଧାନ ପରେ ପୁଣିଥରେ ରାଜଧାନୀ ଭୁବନେଶ୍ବରର ୧ ନଂ ହାଟରୁ ଅଗ୍ନିକାଣ୍ଡର ଖବର ସାମ୍ନାକୁ ଆସିଛି । ସର୍ଟ ସର୍କିଟ ଯୋଗୁଁ ନିଆଁ ଲାଗିଯିବାରୁ ୫ଟି ଦୋକାନରୁ ୨ଟି ସମ୍ପୂର୍ଣ୍ଣ ପୋଡ଼ି ଜଳି ପାଉଁଶ ହୋଇଯାଇଛି । ୩ଟି ଦୋକାନ ଆଂଶିକ କ୍ଷତିଗ୍ରସ୍ତ ହୋଇଛି । ନିଆଁର ଆଁରେ ମିଳେଇ ଯାଇଛି ଲକ୍ଷାଧିକ ଟଙ୍କାର ପୂଜା ସାମଗ୍ରୀ, ପାନ ମସଲା ଓ ଗ୍ରୋସରି । ଖବର ପାଇ ଅଗ୍ନିଶମ ବିଭାଗ କର୍ମଚାରୀ ନିଆଁକୁ ଆୟତ୍ତ କରିଥିଲେ ବି ସେତେବେଳରୁ ପୋଡ଼ି ସାରିଥିଲା ଦୋକାନ । କଳା ପାଉଁଶ ଗଦାରେ ମିଳେଇ ସାରିଥିଲା ଜୀବନ ଯାକର ପୁଞ୍ଜି । ଅର୍ଥ ଉପାର୍ଜନର ମାଧ୍ୟମ ମାଟିରେ ମିଶିବା ପରେ ମୁଣ୍ଡରେ ହାତ ଦେଇଛନ୍ତି ବ୍ୟବସାୟୀ ।

ଅଧିକ ପଢ଼ନ୍ତୁ: ଗଞ୍ଜାମରେ ସଭା ସମିତି ଓ ଶୋଭାଯାତ୍ରା କଲେ ଅନୁମତି ବାଧ୍ୟତାମୂଳକ; ଲାଗୁ ହେଲା ଧାରା-୩୦

ଏହା କେବଳ ଗୋଟିଏ ଘଟଣା ନୁହେଁ । ଗତ ୮ ମାସ ମଧ୍ୟରେ ଚାରି ଚାରି ଥର ଜଳିଲାଣି ୧ ନଂ ହାଟ । ପ୍ରତିଥର ବିଏମସି କର୍ତ୍ତୁପକ୍ଷ ଘଟଣା ସ୍ଥଳକୁ ଯାଇ ସ୍ଥିତି ସମୀକ୍ଷା କରୁଛନ୍ତି । ଭିତ୍ତିଭୂମି ସଜାଡ଼ିବାର କଥା କହୁଛନ୍ତି । ହେଲେ ସମୟ ଗଡ଼ିଗଲେ ଏ ଘଟଣାକୁ ଯେମିତି ପାସୋରି ଦେଉଛନ୍ତି । ତେବେ ପ୍ରଶାସନ ପକ୍ଷରୁ ମଧ୍ୟ ଅଗ୍ନି ନିରାପତ୍ତା ନେଇ ଗାଇଡଲାଇନ ଜାରି ହୋଇଛି । ଅଧିକାଂଶ ବ୍ୟବସାୟୀ ଏହି ନିୟମ ମାନୁନଥିବାର ଅଭିଯୋଗ ହେଉଥିବା ବେଳେ ନିୟମ କଡ଼ାକଡ଼ି ପାଳନ କରିବା ନେଇ ବିଏମସିର କୌଣସି ଆଭିମୁଖ୍ୟ ଥିବା ଜଣାପଡୁନି ।

ତେବେ କେବେ ଏହି ସ୍ଥିତିରେ ସୁଧାର ଆସିବ ? କେବେ ରାଜଧାନୀ ଛାତି ଉପରେ ରହିଥିବା ୧ ନଂ ହାଟରେ କଡ଼ାକଡ଼ି ହେବ ଅଗ୍ନି ନିରାପତ୍ତା ବ୍ୟବସ୍ଥା ? ତାହା ଦେଖିବାକୁ ବାକି ରହିଲା ।