Orangutans In Stress / ଏକାଠି ରହୁଛନ୍ତି, ସାଙ୍ଗ ହୋଇ ଶୋଉଛନ୍ତି; ମା'କୁ ଖୋଜି ଷ୍ଟ୍ରେସ୍‌ରେ ଓରାଙ୍ଗଉଟାନ୍‌

ଭୁବନେଶ୍ଵର: ବାଲେଶ୍ୱର ଜଙ୍ଗଲରୁ ଓରାଙ୍ଗଉଟାନ ଉଦ୍ଧାର ଘଟଣା । ମାଆକୁ ଖୋଜିଖୋଜି ଷ୍ଟ୍ରେସ୍‌ରେ ଅଛନ୍ତି । ଯାହାକୁ ଦେଖୁଛନ୍ତି ବିକଳ ନୟନରେ ଚାତକ ପରି ଚାହୁଁଛନ୍ତି । ସମସ୍ତେ ଏକାଠି ଖେଳୁଛନ୍ତି, ଏକାଠି ଶୋଉଛନ୍ତି । ନନ୍ଦନକାନନରେ ରଖାଯାଇଥିବା ଓରାଙ୍ଗଉଟାନଙ୍କ ସ୍ୱାସ୍ଥ୍ୟାବସ୍ଥା ଏବେ ଠିକ୍ ଅଛି । ଜ୍ୱର କମିଥିଲେ ବି ଆକ୍ଟିଭ ହେଉନାହାନ୍ତି ଓରାଙ୍ଗଉଟାନ । ସେମାନେ ନିଜ ମାଆକୁ ଖୋଜୁଥିବା ଡାକ୍ତର କହିଛନ୍ତି ।

• ଆଗକୁ ଦିଆଯିବ ମ୍ୟୁଜିକ୍ ଥେରାପି

ଓରାଙ୍ଗଉଟାନମାନେ ପ୍ରାୟ ୮ରୁ ୧୦ ବର୍ଷ ପର୍ଯ୍ୟନ୍ତ ମାଆ ସହ ହିଁ ରହିଥାନ୍ତି । ଓଡ଼ିଶା ଜଙ୍ଗଲରେ ମିଳିଥିବା ୫ଟି ଓରାଙ୍ଗଉଟାନ୍ ଛୋଟ ଥିବାରୁ ସେମାନେ ନିଜ ମାଆକୁ ଖୋଜୁଛନ୍ତି । ମାଆକୁ ଖୋଜି ଖୋଜି ବେଶ ଚିନ୍ତାରେ ଅଛନ୍ତି । ସେମାନଙ୍କ ଷ୍ଟ୍ରେସ୍ କମାଇବା ଲାଗି ସେମାନଙ୍କୁ ଖେଳନା ଦିଆଯାଉଛି । ଆଗକୁ ମ୍ୟୁଜିକ୍ ଥେରାପି ଦିଆଯିବ ବୋଲି ପଶୁ ଡାକ୍ତର କହିଛନ୍ତି । ତେବେ ଷ୍ଟ୍ରେସ୍ କମିବା ପରେ ସେମାନଙ୍କ ରକ୍ତ ନମୁନା ସଂଗ୍ରହ କରାଯିବ ଓ ଏହାପରେ ସେମାନଙ୍କ ପ୍ରକୃତ ସ୍ଥାନ ଓ ବାପାମାଆଙ୍କୁ ଚିହ୍ନଟ କରାଯିବ ।

• ଆଜି ସଂଗ୍ରହ ହେବ ରକ୍ତ

ଉଦ୍ଧାର ହୋଇଥିବା ଓରାଙ୍ଗଉଟାନମାନଙ୍କର ସ୍ୱାସ୍ଥ୍ୟ ପରୀକ୍ଷା ପ୍ରକ୍ରିୟା ଜୋରଦାର ହୋଇଛି । ଆଜି ସେମାନଙ୍କର ରକ୍ତ, ସିକିଲ୍ ସେଲ୍ ଏବଂ ଡିଏନଏ ନମୁନା ସଂଗ୍ରହ କରାଯିବ । OUAT ଅଧୀନରେ ଥିବା 'ସେଣ୍ଟର ଫର୍ ୱାଇଲ୍ଡ ଲାଇଫ୍ ହେଲ୍‌ଥ କମିଟି'ର ପରାମର୍ଶ କ୍ରମେ ଏହି ସମସ୍ତ ନମୁନା ସଂଗ୍ରହ କରାଯାଉଛି । ସଂଗୃହିତ ନମୁନାଗୁଡ଼ିକୁ ପରୀକ୍ଷା ପାଇଁ ଲ୍ୟାବ୍‌କୁ ପଠାଯିବ । ଏହି ଟେଷ୍ଟ ଦ୍ୱାରା ଓରାଙ୍ଗଉଟାନମାନଙ୍କ ଶରୀରରେ କୌଣସି ସଂକ୍ରମଣ ଅଛି କି ନାହିଁ, ତାହା ସ୍ପଷ୍ଟ ହେବ । ଏହାସହିତ ସେମାନେ ଗୋଟିଏ ମା'ର ଛୁଆ ନା ଭିନ୍ନ ଭିନ୍ନ ମା'ର, ସେନେଇ ମଧ୍ୟ ସୂଚନା ମିଳିବ । ଡିଏନଏ ପରୀକ୍ଷା ଦ୍ୱାରା ସେମାନଙ୍କର ପ୍ରକୃତ ବୟସ ଏବଂ ବ୍ରିଡ୍ (ପ୍ରଜାତି) ବିଷୟରେ ଜଣାପଡ଼ିବ ।

ପଢନ୍ତୁ ଏହି ଖବର: ଓରାଙ୍ଗଓଟାନ ଉଦ୍ଧାର ଘଟଣାରେ CCTVରେ ଦେଖିବାକୁ ମିଳିଥିବା ଥାରକୁ ନେଇ ତନାଘନା

• ଖୋଳତାଡ଼ କରୁଛି କ୍ରାଇମବ୍ରାଞ୍ଚ

ସେପଟେ ବାଲେଶ୍ୱର ଜଙ୍ଗଲରୁ ଓରାଙ୍ଗଓଟାନ ଉଦ୍ଧାର ଘଟଣାରେ ଚାଲିଛି ଖୋଳତାଡ଼ । ପୁରୁଣା କେସକୁ ନେଇ ଲିଙ୍କ ଖୋଜୁଛି କ୍ରାଇମବ୍ରାଞ୍ଚ STF । ପୂର୍ବରୁ ଭାରତରେ ଏଭଳି ତିନିଟି କେସ ହୋଇଛି । ୨୦୨୨ରେ ଆସାମରୁ ଜବତ ହୋଇଥିଲା ଦୁଇଟି ଓରାଙ୍ଗଉଟାନ । ଯେଉଁଥିରେ ଜଣାପଡିଥିଲା ଇଣ୍ଡୋନେସିଆରୁ ମାଫିଆ ମାନେ ଆଣିଥିଲେ । ସେହିପରି ୨୦୨୩ରେ ମିଜୋରାମରୁ କଷ୍ଟମ ବିଭାଗ ଜବତ କରିଥିଲା ଗୋଟେ ଓରାଙ୍ଗଉଟାନ । ଏହା ମିଆଁମାରରୁ ଆସିଥିବା ଜଣାପଡିଥିଲା । ସେହିପରି ଗତ ୨୦୨୪ରେ ମହାରାଷ୍ଟ୍ର ବନ ବିଭାଗ ଗୋଟିଏ ଓରାଙ୍ଗଓଟାନ ଜବତ କରିଥିଲା । ଏହା ଇଣ୍ଡୋନେସିଆରୁ ଚାଲାଣ ହୋଇଥିଲା । ପୂର୍ବ ଘଟଣାକୁ ନେଇ STF ତଦନ୍ତ କରୁଛି । ସିସିଟିଭିରେ ଦେଖାଯାଇଥିବା ଥାର୍ ଗାଡିକୁ ନେଇ ମଧ୍ୟ ଖୋଳତାଡ଼ ହେଉଛି ।