ରାଜଧାନୀ ଭୁବନେଶ୍ଵର ଉପକଣ୍ଠରେ ଚାଞ୍ଚଲ୍ୟ । ପୋଲିସକୁ ଖୋଲା ଚାଲେଞ୍ଜ ଦେଇ କ୍ୟାନ୍ସର ପୀଡ଼ିତଙ୍କ ଘରୁ ଲୁଟ୍ । ସ୍ଵାମୀ ସ୍ତ୍ରୀ ଶୋଇଥିବା ବେଳେ ବାହାରୁ ତାଲା ପକାଇ ନେଇଗଲେ ୨୦ଲକ୍ଷର ସୁନା ଅଳଙ୍କାର । ଘଟଣା ପରେ ଖୋର୍ଦ୍ଧା ଜିଲ୍ଲା ଜାମୁକୋଳି ଗାଁ ବାରିକ ସାହିରେ ଲୋକେ ଭୟରେ ଥିବାବେଳେ ସିସିଟିଭି ଯାଞ୍ଚ ସହ ତଦନ୍ତ ଆରମ୍ଭ କରିଛି କମିଶନରେଟ୍ ପୋଲିସ । ଗାଁରେ ପହଞ୍ଚିଛି ସନ୍ଧାନୀ କୁକୁର ।

ତେବେ ରାତି ନୁହେଁ ବଡ଼ି ଭୋରୁ ଲୁଟ୍ ହୋଇଛି । ରବିବାର ଭୋର୍ ୪ଟା ସମୟରେ ଏୟାରଫିଲ୍ଡ ଥାନା ଅଧିନସ୍ଥ ଜାମୁକୋଳି ବାରିକସାହି ଅଞ୍ଚଳରେ ଏହି ଲୁଟ୍ ହୋଇଛି । ସ୍ୱାମୀଙ୍କ କ୍ୟାନ୍ସର ଚିକିତ୍ସା ପାଇଁ ରଖିଥିବା ଟଙ୍କା ଲୁଟି ନେଇଛନ୍ତି । ଲୁଟେରାଙ୍କୁ ଧରିବାକୁ କମିଶନରେଟ୍ ପୋଲିସର ତନାଘନା କରୁଛି ।

• ଘର ପଛପଟୁ ଆସିଥିଲେ ଲୁଟେରା

ସ୍ଵାମୀ ସୁଶାନ୍ତ ଏବଂ ସ୍ତ୍ରୀ ପ୍ରଭାତୀ ଶୋଇଥିବା ବେଳେ ଲୁଟେରାମାନେ ଘର ପଛପଟ ରାସ୍ତା ଦେଇ ପ୍ରବେଶ କରିଥିଲେ । ସ୍ଵାମୀ ସ୍ତ୍ରୀ ଶୋଇଥିବା ଦେଖି ତାଙ୍କୁ ବାହାର ପଟୁ ତାଲା ପକାଇ ପାଖ ଘରେ ଲୁଟପାଟ୍ କରିଥିଲେ । ସ୍ତ୍ରୀ ପ୍ରତିଭାଙ୍କ କହିବା ଅନୁସାରେ ଦୁଇଟି ବଡ଼ ହାର, ମଙ୍ଗଳସୂତ୍ର, ୪ଟି ମୁଦି, ଗୋଟିଏ ଚେନ୍, ୪ ହଳ ବାହୁଟି, ୪ଟା ସୁନା ଚୁଡ଼ି ସହିତ ନଗଦ ୮୦ହଜାର ଟଙ୍କା ଲୁଟ୍ ହୋଇଛି । ସ୍ୱାମୀଙ୍କ କ୍ୟାନ୍ସର ଚିକିତ୍ସା ପାଇଁ ବନ୍ଧା ପକାଇବାକୁ ଘରେ ରଖିଥିବା ପାଖାପାଖି ୨୦ଲକ୍ଷ ଟଙ୍କାର ସୁନା ଅଳଙ୍କାର ଲୁଟ୍ ହୋଇଥିବା ଅଭିଯୋଗ ହୋଇଛି ।

କ୍ୟାନ୍ସରରେ ପୀଡିତ ସ୍ୱାମୀଙ୍କ ଚିକିତ୍ସା ପାଇଁ ଟଙ୍କା ଓ ଅଳଙ୍କାର ଲୁଟ୍ ପରେ ଭାଙ୍ଗି ପଡିଛନ୍ତି ପରିବାର ଲୋକେ । ସେପଟେ କେବଳ ଏୟାରଫିଲ୍ଡ ଥାନାରୁ ସୁନ୍ଦରପଦା ଓ ମୁଖ୍ୟ ରାସ୍ତା ଉପରେ ପୋଲିସ ପାଟ୍ରୋଲିଂ କରୁଥିବା ବେଳେ ଗାଁର ଗଳିକନ୍ଦିରେ ପିସିଆର୍ ବୁଲୁ ନଥିବାରୁ ଅପରାଧୀଙ୍କୁ ସୁଯୋଗ ମିଳୁଛି ବୋଲି କହିଛନ୍ତି ସ୍ଥାନୀୟ ଗ୍ରାମବାସୀ । ତେବେ ପୋଲିସ ପେଶାଦାର ଅପରାଧୀଙ୍କ ସମ୍ପୃକ୍ତି ଅଛି କି ନାହିଁ ସେ ନେଇ ତନାଘନା କରୁଛି ।

କ୍ରାଇମ ସ୍ପଟରେ ଖୋଳତାଡ଼ କରିବା ସହ ଗ୍ରାମବାସୀଙ୍କୁ ପଚରାଉଚରା କରିଛି । ସନ୍ଧାନୀ କୁକୁର ପଇଁତରା ମାରିବା ସହ ପଡ଼ିଶା ଘରେ ଲାଗିଥିବା ସିସିଟିଭି ଜବତ କରିଛି ପୋଲିସ । ଗତ ୧୫ତାରିଖରେ ମଞ୍ଚେଶ୍ଵର ଅଞ୍ଚଳରେ ବି ହୋଇଥିଲା ଲୁଟ୍ । ଜଣେ ବରିଷ୍ଠ ବ୍ୟକ୍ତି ମର୍ଣ୍ଣିଂୱାକରେ ଯାଇଥିବା ବେଳେ ଘର ତାଲା କାଟି ୧୦ଲକ୍ଷ ଲୁଟି ନେଇଥିଲେ ଲୁଟେରା । ପୋଲିସ ଏଯାବତ ଚୋରଙ୍କୁ ଧରିବାରେ ଅସଫଳ ଅଛି ।

ଅଧିକ ଖବର ପଢନ୍ତୁ...