ଭଞ୍ଜନଗର: ଗଞ୍ଜାମ ଭଞ୍ଜନଗର ବ୍ଲକର ଉପାନ୍ତ ଅଞ୍ଚଳ ବାଇବାଲି ପଞ୍ଚାୟତର ଗିଡ଼ିପାବାଲି ଗାଁରେ ଭୂସ୍ଖଳନ ଯୋଗୁଁ ୧୨ ଜଣ ନିଖୋଜ ଘଟଣା । ପ୍ରଖର ବନ୍ୟାସ୍ରୋତରୁ ୧୦ ଜଣଙ୍କୁ ଉଦ୍ଧାର କରି ସାହସିକତା ଦେଖାଇଲା ରାଉରକେଲା ଅଗ୍ନିଶମ ବାହିନୀ । ଗିଡ଼ିପାବଳି ଯିବା ବାଟରେ ତଡ଼ମା କେନାଲରେ ଅଗ୍ନିଶମ ଟିମ୍ର ତୁରନ୍ତ ହସ୍ତକ୍ଷେପ କରି ୧୦ ଜଣଙ୍କ ଅମୂଲ୍ୟ ଜୀବନ ବଞ୍ଚାଇଛି । ଏଯାଏଁ ଆଉ ୨ ଜଣଙ୍କ ପତ୍ତା ମିଳିନି ।
- ୧୨ ନିଖୋଜଙ୍କ ମଧ୍ୟରୁ ୧୦ ଉଦ୍ଧାର
ଅନ୍ୟ ଏକ ଜରୁରୀକାଳୀନ ଉଦ୍ଧାର କାର୍ଯ୍ୟ ପାଇଁ ଯାଉଥିବା ବେଳେ ଅଗ୍ନିଶମ ବାହିନୀର ତ୍ୱରିତ ଓ ସାହସିକ ପଦକ୍ଷେପ ଯୋଗୁଁ ଆଜି ଟଳିଯାଇଛି ଏକ ବଡ଼ ଅଘଟଣ । ତୀବ୍ର ଜଳସ୍ରୋତ ମଧ୍ୟରେ ଫସିରହିଥିବା ୧୦ ଜଣ ବ୍ୟକ୍ତିଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି ରାଉରକେଲା ଅଗ୍ନିଶମ ବାହିନୀ । ଭଞ୍ଜନଗର ଗିଡ଼ିପାବଳିଠାରେ ଘଟିଥିବା ଭୂସ୍ଖଳନ ଅଞ୍ଚଳରେ ଉଦ୍ଧାର କାର୍ଯ୍ୟ ପାଇଁ ରାଉରକେଲା ଅଗ୍ନିଶମ ବାହିନୀର ଏକ ସ୍ୱଶସ୍ତ୍ର ଦଳ ଘଟଣାସ୍ଥଳକୁ ଯାଉଥିଲେ । ତେବେ ତଡ଼ମା ନିକଟସ୍ଥ ଏକ କେନାଲ ଦେଇ ଯାଉଥିବା ସମୟରେ, ପ୍ରବଳ ଜଳସ୍ରୋତ ମଧ୍ୟରେ ୧୦ ଜଣ ବ୍ୟକ୍ତି ବିପଜ୍ଜନକ ଅବସ୍ଥାରେ ଫସି ରହିଥିବା ଅଗ୍ନିଶମ କର୍ମଚାରୀଙ୍କ ନଜରକୁ ଆସିଥିଲା ।
- ପୁଣି ଘରକୁ ଯାଇ ଜଳସ୍ରୋତରେ ଭାସିଯାଇଥିଲେ
ବନ୍ୟା ପରିସ୍ଥିତି ଯୋଗୁଁ ପ୍ରଶାସନ ପୂର୍ବରୁ ସେମାନଙ୍କୁ ନିଜ ଘରୁ ନିରାପଦ ସ୍ଥାନକୁ ସ୍ଥାନାନ୍ତର କରିସାରିଥିଲା। ମାତ୍ର ଘରକରଣା ସାମଗ୍ରୀ ଓ ଅନ୍ୟାନ୍ୟ ଆସବାବପତ୍ର ଆଣିବା ପାଇଁ ସେମାନେ ପୁନର୍ବାର ନିଜ ଗାଁକୁ ଫେରିଥିଲେ । ଫେରିବା ସମୟରେ ହଠାତ୍ କେନାଲର ଜଳସ୍ତର ବୃଦ୍ଧି ପାଇବାରୁ ପ୍ରଖର ସ୍ରୋତରେ ସେମାନେ ଅଟକି ଯାଇଥିଲେ । ସେମାନଙ୍କର ଏଭଳି ଜୀବନମରଣ ସମସ୍ୟା ଦେଖି ASO ପ୍ରଦୀପ କୁମାର ନାୟକଙ୍କ ନେତୃତ୍ୱରେ ଅଗ୍ନିଶମ ଦଳ ବିନା ବିଳମ୍ବରେ ତୁରନ୍ତ ଉଦ୍ଧାର ଅପରେସନ୍ ଆରମ୍ଭ କରିଥିଲେ । ଦଳର ସମନ୍ୱିତ, ଦକ୍ଷ ଓ ତ୍ୱରିତ ପ୍ରୟାସ ଫଳରେ ପ୍ରବଳ ଜଳସ୍ରୋତ ଭିତରୁ ସମସ୍ତ ୧୦ ଜଣଙ୍କୁ ସୁରକ୍ଷିତ ଭାବେ ବାହାର କରାଯାଇ ନିରାପଦ ସ୍ଥାନକୁ ଅଣାଯାଇଥିଲା । ଅଗ୍ନିଶମ ବାହିନୀର ଏହି ଉଚ୍ଚାଙ୍ଗ ସାହସିକତା ଓ ତୁରନ୍ତ ନିଷ୍ପତ୍ତି ପାଇଁ ସ୍ଥାନୀୟ ଅଞ୍ଚଳରେ ସେମାନଙ୍କୁ ବ୍ୟାପକ ପ୍ରଶଂସା କରାଯାଉଛି ।
ପଢନ୍ତୁ ଏହି ଖବର: ଭଞ୍ଜନଗରରେ ନିଖୋଜଙ୍କୁ ଖୋଜିବ ନାଭାଲ ହେଲିକପ୍ଟର - ଲାଇଭ୍ ଡିଟେକ୍ସନରେ ଖୋଜିଥାନ୍ତା ହେଲିକପ୍ଟର
କନ୍ଧମାଳ ସୀମାନ୍ତ ଭଞ୍ଜନଗର ବ୍ଲକର ଉପାନ୍ତ ଅଞ୍ଚଳ ବାଇବାଲି ପଞ୍ଚାୟତର ଗିଡ଼ିପାବାଲି ଗାଁରେ ଭୂସ୍ଖଳନ ଯୋଗୁଁ ନିଖୋଜ ଥିବା ଏହି ୧୨ ଜଣଙ୍କୁ ଖୋଜିବା ଲାଗି ନାଭାଲ ହେଲିକପ୍ଟରର ସହାୟତା ନେଇଥାନ୍ତେ ରାଜ୍ୟ ସରକାର । ତେବେ ଏହା ପୂର୍ବରୁ ୧୦ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ମାତ୍ର ଏଯାବତ୍ ଆଉ ୨ ଜଣଙ୍କ ପତ୍ତା ମିଳିନାହିଁ । ବାକି ୨ ଜଣ ନିଖୋଜଙ୍କୁ ଖୋଜିବାକୁ ପ୍ରୟାସ କରାଯାଉଛି ।
