ବିଏମସି ଓ ବିଡିଏ ପକ୍ଷରୁ ମିଳିତ ଭାବେ ଉଚ୍ଛେଦ ହୋଇଛି ସାଲିଆ ସାହିର କିଛି ଅଞ୍ଚଳ । ଏକାମ୍ର କାନନରୁ ଅନ୍ଧାରୁଆ ପାଖାପାଖି ୧୩ କିଲୋମିଟର ପର୍ଯ୍ୟନ୍ତ ଲେଫ୍ଟ ପାରାଲାଲ ରାସ୍ତା ପାଇଁ ବିଏମ୍‌ସି ଓ ବିଡିଏ ଏହି ଉଚ୍ଛେଦ କରୁଛି । ପୂର୍ବରୁ ମଧ୍ୟ ଉଛେଦ କରିଥିଲା ବିଡିଏ ଓ ବିଏମସିର ମିଳିତ ଟିମ୍‌ । କାଲିଠାରୁ ଆରମ୍ଭ ହୋଇ ଆସନ୍ତା ୨୪ ତାରିଖ ପର୍ଯ୍ୟନ୍ତ ବାକି ଥିବା ଘର ଉଚ୍ଛେଦ କରିବେ । ସେପଟେ ଏହି ଉଚ୍ଛେଦକୁ ବିରୋଧ କରିଛନ୍ତି ସାଲିଆ ସାହି ବାସିନ୍ଦା ।

ଗତକାଲି ଘର ଭାଙ୍ଗିବା ପରେ ଖୋଲା ପଡ଼ିଆରେ ମୁଣ୍ଡ ଉପରେ ଜରି ପାଲ ଟାଣି ରହିଛନ୍ତି କିଛି ବାସିନ୍ଦା । ଖୋଲା ପଡ଼ିଆରେ ମୁଣ୍ଡ ଗୁଞ୍ଜିବା ପାଇଁ ବାଉଁଶ ପୋତି ଜରି ପାଲ ଟାଣୁଛନ୍ତି । ଗତକାଲିଠୁ କିଛି ସାଲିଆ ସାହି ବାସିନ୍ଦା ନିଜ ଘର ଭଙ୍ଗା ଯିବା ପରେ ଖୋଲା ଆକାଶ ତଳେ ଜରିପାଲ ଟାଣି ନିଜର ଆସବାବପତ୍ର ରଖି ରାତି କାଟିଛନ୍ତି । ଯେଉଁ ଘର ବିଏମ୍‌ସି ଯୋଗାଇ ଦେଇଛି ସେହି ଘରେ ରହିବା ସମ୍ଭବ ନୁହେଁ ବୋଲି ଅଭିଯୋଗ କରିଛନ୍ତି ଘର ହରାଇଥିବା ବସ୍ତି ବାସିନ୍ଦା ।

ଅଧିକ ପଢ଼ନ୍ତୁ: ଚିପ୍ସ୍ ନେଇଗଲା ୪ ବର୍ଷ ଶିଶୁର ଜୀବନ

ସେପଟେ ସାଲିଆ ସାହି ଉଚ୍ଛେଦ ନେଇ ପ୍ରତିକ୍ରିୟା ରଖିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ସେ କହିଛନ୍ତି, ଯାହା ହେଉଛି ନିୟମ ଅନୁଯାୟୀ ହେଉଛି ।

ସାଇମନ୍ଦିର ରୁ ଏକାମ୍ରକାନନ ପର୍ଯ୍ୟନ୍ତ ୧୩ କିଲୋମିଟର ଦୁଇଶହ ଫୁଟିଆ ରାସ୍ତା ନିର୍ମାଣ ନେଇ ଯୋଜନା ହୋଇଥିଲା। ଏବେ ସାଲିଆ ସାହି ରାସ୍ତା ଦେଇ ୧ କିଲୋମିଟର ଉଚ୍ଛେଦ ବାକି ରହିଥିଲା । ସାଲିଆ ସାହି ଭିତରେ ଏକ କିଲୋମିଟର ରାସ୍ତା ଉଚ୍ଛେଦ ହୋଇଗଲେ ଯୋଗଯୋଗର ବାଟ ଫିଟିବା ସହିତ ଟ୍ରାଫିକ ଯନ୍ତ୍ରଣା ବି କମିବ ।

ତେବେ ମଙ୍ଗଳବାର ସାଲିଆ ସାହି ଉଚ୍ଛେଦ ବେଳେ ମିଳିଥିଲା ଆଧାର କାର୍ଡର ଭଣ୍ଡାର । ଆନ୍ଦୋଳନ ଚାଲିଥିବା ଘରୁ ମିଳିଥିଲା ପୁଳା ପୁଳା ଆଧାର କାର୍ଡ । ଏସବୁ ଆଧାର କାର୍ଡ ମିଳିବା ପରେ ପୋଲିସ୍‌ ପକ୍ଷରୁ ତଦନ୍ତ ଜାରି ରହିଛି । ତେବେ କାହାର ଏସବୁ ଆଧାର କାର୍ଡ ତାକୁ ନେଇ ଯାଞ୍ଚ ଆରମ୍ଭ ହୋଇଛି । ଯେଉଁ ଘରୁ ବାହାରିଛି ସେ ଲୋକଙ୍କୁ ଡାକି ପୋଲିସ୍‌ ପଚରା ଉଚରା କରିବ ।

ତେବେ କାହିଁକି ଏତେ ପରିମାଣର ଆଧାର କାର୍ଡ ଘରେ ରଖିଥିଲେ ତାକୁ ନେଇ ପୋଲିସ୍‌ ଖୋଳତାଡ଼ କରିବ ବୋଲି ସୂଚନା ମିଳିଛି । ସୂଚନା ଅନୁସାରେ, ଆଜି ସାଲିଆ ସାହିରେ ଜବରଦଖଲ ଉଚ୍ଛେଦ ବେଳେ ଏହାକୁ ବିରୋଧ କରି ରାସ୍ତାରେ ବସିଥିଲେ ବସ୍ତି ବାସିନ୍ଦା । ବିକ୍ଷୋଭ ସ୍ଥାନରୁ ପ୍ରାୟ ୩୦ ଜଣଙ୍କୁ ପୋଲିସ୍‌ ଅଟକ ରଖିଛି ।