Dharmendra Pradhan / NH କଡ଼ରେ ସାଇକେଲ ଧରି ସ୍କୁଲ ପିଲା; ଅଟକିଗଲା ସାଂସଦ ଧର୍ମେନ୍ଦ୍ର ପ୍ରଧାନଙ୍କ କନଭୟ

ଅନୁଗୋଳ: ଜାତୀୟ ରାଜପଥ କଡ଼ରେ ପିଲାଙ୍କୁ ଦେଖି ଅଟକିଗଲା ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କନଭୟ । କୁନି କୁନି ସ୍କୁଲ ପିଲାଙ୍କ ସୁରକ୍ଷାକୁ ନେଇ ସଙ୍ଗେସଙ୍ଗେ ତତ୍ପରତା ଦେଖାଇଲେ ସାଂସଦ । ବିପଦ ଅବସ୍ଥାରେ କୁନି ପିଲାମାନେ ଜାତୀୟ ରାଜପଥ ଅତିକ୍ରମ କରୁଥିବା ଦେଖି ତୁରନ୍ତ ଏକ ଓଭରବ୍ରିଜ୍ ନିର୍ମାଣ କରିବା ପାଇଁ ସାଂସଦ ନିଷ୍ପତ୍ତି ନେଇଛନ୍ତି । ଏପରି ଘଟଣା ଦେଖିବାକୁ ମିଳିଛି ଅନୁଗୋଳ ଜିଲ୍ଲା ନୂଆହାଟ ଛକ ନିକଟ ଜାତୀୟ ରାଜପଥ-୫୫ରେ ।

ନୂଆହାଟ ଛକ ଜାତୀୟ ରାଜପଥ-୫୫ ଦେଇ ପ୍ରତିଦିନ ମାଲବାହୀ ଗାଡ଼ିଠୁ ଆରମ୍ଭ କରି ଚାରି ଚକିଆ ଯାତାୟାତ କରୁଛି । ସେପଟେ ଏହି ରାସ୍ତା ପାଲଟିଛି ସ୍କୁଲ ଛାତ୍ରଛାତ୍ରୀଙ୍କ ନିତିଦିନିଆ ରାସ୍ତା । କୁନି କୁନି ପିଲାମାନେ ସ୍କୁଲ ଛୁଟି ହେବାପରେ ଏହି ରାସ୍ତା ପାର ହୋଇ ଘରକୁ ଯାଉଛନ୍ତି । ତେବେ ଗୁରୁବାର (ସେପ୍ଟେମ୍ବର ୧୦) ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ସେହି ରାସ୍ତା ଦେଇ ଭୁବନେଶ୍ଵର ଫେରୁଥିବା ସମୟରେ ହଠାତ୍ ତାଙ୍କ ନଜର ରାସ୍ତାକଡ଼ରେ ଠିଆ ହୋଇଥିବା ପ୍ରାୟ ୩୦ରୁ ୪୦ ଜଣ ସ୍କୁଲ ପିଲାଙ୍କ ଉପରେ ପଡ଼ିଥିଲା ।

• ସଙ୍ଗେସଙ୍ଗେ ଜିଲ୍ଲାପାଳଙ୍କ ସହ କଥାହେଲେ

ଏତେ ସଂଖ୍ୟାରେ ସ୍କୁଲ ଛାତ୍ରଛାତ୍ରୀ ଏନଏଚ୍ କଡ଼ରେ ଠିଆ ହୋଇଥିବା ଦେଖି ଅଟକିଥିଲା ସାଂସଦଙ୍କ କାର । ତେବେ ଧର୍ମେନ୍ଦ୍ର ଗାଡ଼ିରୁ ଓହ୍ଲାଇ ପିଲାଙ୍କ ସହ କଥାବାର୍ତ୍ତା ହୋଇଥିଲେ । ନିତି ସ୍କୁଲ ପିଲାଙ୍କଠୁ ଆରମ୍ଭ କରି ସ୍ଥାନୀୟ ବାସିନ୍ଦା ଏହି ଜାତୀୟ ରାଜପଥ ବିପଦ ଅବସ୍ଥାରେ ପାର କରୁଥିବା ସେ ଜାଣିବାକୁ ପାଇଥିଲେ । ବନରପାଲ ବ୍ଲକର ବାସିନ୍ଦାମାନେ ଏହି ସୁବିଧା ନେଇ ବାରମ୍ବାର ଅଭିଯୋଗ ଉଠାଇ ଆସିଛନ୍ତି । ଏଠାରେ ଆବଶ୍ୟକୀୟ ଭିତ୍ତିଭୂମିର ଅଭାବ ଯୋଗୁଁ ସ୍ଥାନୀୟ ଲୋକେ ପ୍ରତିଦିନ ଭାରି ଯାନବାହାନ ଚଳାଚଳ ମଧ୍ୟରେ ରାସ୍ତା ପାର ହେବାକୁ ବାଧ୍ୟ ହେଉଛନ୍ତି, ଯାହା ଫଳରେ ଦୁର୍ଘଟଣା ଘଟିବାର ନିରନ୍ତର ଆଶଙ୍କା ସୃଷ୍ଟି ହେଉଛି ।

ସ୍ଥାନୀୟ ବାସିନ୍ଦା ଓ ସ୍କୁଲ ପିଲାଙ୍କଠାରୁ ଏ ସମ୍ପର୍କରେ ଜାଣିବାକୁ ପାଇବା ପରେ ସାଂସଦ ଧର୍ମେନ୍ଦ୍ର ଘଟଣାର ଗୁରୁତ୍ଵକୁ ବୁଝି ସଙ୍ଗେସଙ୍ଗେ ଅନୁଗୋଳ ଜିଲ୍ଲାପାଳଙ୍କୁ ଫୋନ ମାଧ୍ୟମରେ ଯୋଗାଯୋଗ କରିଥିଲେ । ବିଶେଷ କରି କୁନି ସ୍କୁଲ ଛାତ୍ରଛାତ୍ରୀଙ୍କ ସୁରକ୍ଷାକୁ ଗୁରୁତ୍ଵ ଦେଇ ତୁରନ୍ତ ଏଠାରେ ଏକ ଓଭରବ୍ରିଜ୍ ନିର୍ମାଣର ଆବଶ୍ୟକତା ଥିବା ଜିଲ୍ଲାପାଳଙ୍କୁ ସୂଚନା ଦେଇଥିଲେ ।

ପଢନ୍ତୁ ଏହି ଖବର: ୨୦୦୦ ବର୍ଷର ପ୍ରାଚୀନ 'ଅସୁରଗଡ଼' ପ୍ରତ୍ନତାତ୍ତ୍ୱିକ ସ୍ଥଳୀ ପରିଦର୍ଶନ କଲେ ଧର୍ମେନ୍ଦ୍ର ପ୍ରଧାନ

• ଧର୍ମେନ୍ଦ୍ରଙ୍କ ତତ୍ପରତାକୁ ସ୍ଵାଗତ

ସ୍ଥାନୀୟ ଅଞ୍ଚଳରେ ଓଭରବ୍ରିଜ୍ ନିର୍ମାଣ ପାଇଁ ବହୁ ଦିନରୁ ଦାବି ରହିଥିଲା । ତେବେ ସାଂସଦ ଧର୍ମେନ୍ଦ୍ର ପ୍ରଧାନ ତୁରନ୍ତ ଘଟଣାର ଗମ୍ଭୀରତାକୁ ବୁଝି ଆବଶ୍ୟକୀୟ ପଦକ୍ଷେପ ନେବାପରେ ସ୍ଥାନୀୟ ଲୋକେ ଏହାକୁ ସ୍ଵାଗତ କରିଥିଲେ । ଏହାସହ ସମ୍ବଲପୁର ସାଂସଦ ଧର୍ମେନ୍ଦ୍ରଙ୍କୁ ଧନ୍ୟବାଦ ଜଣାଇଥିଲେ । ଏହି ଓଭରବ୍ରିଜ୍‌ଟି ନିର୍ମାଣ ହେବାପରେ ସ୍ଥାନୀୟ ଅଞ୍ଚଳରେ ଯାତାୟାତ କରିବା ଆହୁରି ସୁବିଧା ହେବ । କୁନି ପିଲାମାନେ ନିର୍ଭୟରେ ଜାତୀୟ ରାଜପଥ-୫୫କୁ ଅତିକ୍ରମ କରିପାରିବେ । ନୂଆହାଟ ଛକରେ ଏହି ଓଭରବ୍ରିଜ୍ ନିର୍ମାଣ ହେଲେ ସ୍ଥାନୀୟ ବାସିନ୍ଦାଙ୍କ ବ୍ୟତୀତ NH-୫୩ରେ ଯାତାୟାତ କରୁଥିବା ଯାତ୍ରୀଙ୍କୁ ମଧ୍ଯ ସୁବିଧା ହେବ ।