Crime In Odisha / ଦୁଷ୍କର୍ମ ଅଭିଯୁକ୍ତ ଶରଣକୁଳ ଥାନାର ପୂର୍ବତନ IIC ଫେରାର୍; ଗିରଫ ପାଇଁ କ୍ରାଇମବ୍ରାଞ୍ଚର ରେଡ୍

ଭୁବନେଶ୍ଵର: ବନ୍ଧାହେବେ ପୂର୍ବତନ ଆଇଆଇସି । ଖୋଜୁଛି କ୍ରାଇମବ୍ରାଞ୍ଚ । ନୟାଗଡ଼ ଶରଣକୁଳ ଥାନାର ପୂର୍ବତନ ଆଇଆଇସି ସୁଜିତ କୁମାର ଦାସଙ୍କୁ ଖୋଜୁଛି କ୍ରାଇମବ୍ରାଞ୍ଚ ଟିମ୍ । କ୍ରାଇମବ୍ରାଞ୍ଚ ପକ୍ଷରୁ ସୁଜିତଙ୍କ ଭୁବନେଶ୍ୱର ଚନ୍ଦ୍ରଶେଖରପୁର ସ୍ଥିତ ଘରେ ଚଢ଼ାଉ କରାଯାଇଛି ।

ଶରଣକୁଳ ଥାନାର ପୂର୍ବତନ ଆଇଆଇସି ସୁଜିତ କୁମାର ଦାସଙ୍କ ନାଁରେ ଜାମିନ ବିହୀନ ଗିରଫ ଫରୱାନା (NBW) ଜାରି ପରେ କ୍ରାଇମବ୍ରାଞ୍ଚ ରେଡ୍ ଆରମ୍ଭ କରିଛି । ଦୁଷ୍କର୍ମ ଅଭିଯୋଗର ଅଭିଯୁକ୍ତ ପୂର୍ବତନ ଶରଣକୁଳ ଥାନା ଆଇଆଇସି ସୁଜିତ କୁମାର ଦାସ ଏବେ ଫେରାର ଅଛନ୍ତି ।

ଏଥିସହ ପଢ଼ନ୍ତୁ: ରାଜଧାନୀରେ ଘର ଆଗରୁ ଲୁଟିନେଲେ ଚେନ୍; ପୂଜା କରୁଥିଲେ ମହିଳା 

ପୂର୍ବରୁ ମହିଳା ଜଣଙ୍କ ନୟାଗଡ଼ ଏସ୍‌ପିଙ୍କୁ ଦେଖା କରି ଶରଣକୁଳ ଥାନାର ଆଇଆଇସିଙ୍କ ନାଁରେ ଅଭିଯୋଗ କରିଥିଲେ । ଯାହାପରେ ସୁଜିତଙ୍କୁ ଜିଲ୍ଲା ପୋଲିସ ମୁଖ୍ୟାଳୟକୁ ବଦଳି କରାଯାଇଥିଲା ମହିଳାଙ୍କ ଅଭିଯୋଗ ଆଧାରରେ ଶରଣକୁଳ ଥାନା ଅଧିକାରୀ ସୁଜିତଙ୍କ ନାମରେ ମାମଲା ରୁଜୁ କରାଯାଇଥିଲା ।

ସୂଚନା ଅନୁସାରେ, ଶରଣକୁଳ ଥାନା ଅଞ୍ଚଳର ଜଣେ ମହିଳାଙ୍କ ପରିବାର ଓ ଗ୍ରାମବାସୀଙ୍କ ମଧ୍ୟରେ ଏକ ଜାଗାକୁ କେନ୍ଦ୍ର କରି ଗଣ୍ଡଗୋଳ ହୋଇଥିଲା । ଗ୍ରାମବାସୀ ମହିଳାଙ୍କ ଘର ଭାଙ୍ଗି ଦେଇଥିଲେ । ମହିଳା ଶରଣକୁଳ ଥାନାର ଦ୍ୱାରସ୍ଥ ହୋଇଥିଲେ । ଶରଣକୁଳ ଥାନା ଅଧିକାରୀ ସୁଜିତ କୁମାର ଦାସ ମହିଳାଙ୍କୁ ମାମଲାରେ ସହଯୋଗ କରିବାକୁ କହି ଫୋନ୍ ନମ୍ବର ନେଇଥିଲେ । କିଛି ଦିନ ଫୋନ୍‌ରେ କଥା ହେବା ପରେ ମହିଳାଙ୍କ ଫୋନ୍‌କୁ ଅଶ୍ଳୀଳ ଫଟୋ ପଠାଇଥିଲେ ।

ଅନେକ ସମୟରେ ଥାନା ଅଧିକାରୀ ଅଭଦ୍ର ଭାଷାରେ କଥା ହେଉଥିଲେ । ଏପରିକି ଭିଡିଓ କଲ୍ କରି ନିଜ ଶରୀର ପ୍ରଦର୍ଶନ କରିବା ସହ ମହିଳାଙ୍କୁ ବି ବାଧ୍ୟ କରୁଥିଲେ । ହେଲେ ମହିଳା ରାଜି ହୋଇ ନଥିଲେ । ଦିନେ ମହିଳା ନୟାଗଡ଼ ପିଟିଏସ୍ ଛକରେ ଠିଆ ହୋଇଥିବା ବେଳେ ଥାନା ଅଧିକାରୀ ତାଙ୍କୁ ଦେଖି ଗାଡ଼ିରେ ନିଜ ଭଡ଼ାଘରକୁ ନେଇ ଦୁଷ୍କର୍ମ କରିଥିବା ଅଭିଯୋଗ କରିଥିଲେ ପୀଡ଼ିତା ।

ହାଇକୋର୍ଟରେ ଆଗୁଆ ଜାମିନ ଖାରଜ ସହ ତଳ କୋର୍ଟରେ ଆତ୍ମସମର୍ପଣ କରିବା ପାଇଁ ସୁଜିତଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ପ୍ରଥମେ ଶରଣକୁଳ ଥାନାରେ ମାମଲା ହୋଇଥିବା ବେଳେ ପରେ କ୍ରାଇମବ୍ରାଞ୍ଚର CAWକୁ ହସ୍ତାନ୍ତର ହୋଇଥିଲା ।

ଏଥିସହ ପଢ଼ନ୍ତୁ: ତହସିଲଦାରଙ୍କ ଉପରେ ଖସିଲା ନିଲମ୍ବନ ଖଣ୍ଡା; ଜମି ଜାଲିଆତି ମାମଲାରେ ଆକ୍ସନ୍ 

ପୂର୍ବରୁ ସୁଜିତ ଆଗୁଆ ଜାମିନ ଆବେଦନ କରିବା ସହ ଅନ୍ତରୀଣ ସୁରକ୍ଷା ପ୍ରଦାନ କରିଥିଲେ ହାଇକୋର୍ଟ । ପରେ କୋର୍ଟଙ୍କ ନିର୍ଦ୍ଦେଶ କ୍ରମେ ସୁଜିତ କ୍ରାଇମବ୍ରାଞ୍ଚ୍ ନିକଟରେ ହାଜର ହୋଇଥିଲେ । ତଦନ୍ତକାରୀ ସଂସ୍ଥା ସୁଜିତଙ୍କ ଡାକ୍ତରୀ ମାଇନା କରିବା ସହ ତାଙ୍କ ବୟାନ ରେକର୍ଡ କରିଥିଲା ।

ଅନ୍ତରୀଣ ସୁରକ୍ଷା ହଟାଇବା ପାଇଁ କ୍ରାଇମବ୍ରାଞ୍ଚ ହାଇକୋର୍ଟଙ୍କୁ ଅନୁରୋଧ କରିବା ସହ ସମସ୍ତ ତଥ୍ୟ ପ୍ରମାଣ ଦାଖଲ କରିଥିଲା । ସମସ୍ତ ତଥ୍ୟ ପ୍ରମାଣ ସହ ଗତ ୨୦ ତାରିଖ ଦିନ ଏହି ମାମଲାର ଶୁଣାଣି କରି ଆଇଆଇସି ସୁଜିତ କୁମାର ଦାସଙ୍କ ଅନ୍ତରୀଣ ସୁରକ୍ଷା ହଟାଇ ଦେଇଛନ୍ତି ହାଇକୋର୍ଟ । ଯାହାପରେ ଗିରଫଦାରୀ ଭୟରେ ସୁଜିତ ଫେରାର୍ ହୋଇ ଯାଇଛନ୍ତି ।