Scrub Typhus Death / ଅନୁଗୋଳରେ ସ୍କ୍ରବ୍ ଟାଇଫସ୍ ନେଲା ଜୀବନ; କେମିତି ଚିହ୍ନିବେ ଲକ୍ଷଣ

ଅନୁଗୋଳ: ପୁଣି ଆଖି ଦେଖାଇଲାଣି ସ୍କ୍ରବ୍ ଟାଇଫସ୍ । କଣିହାଁରେ ସ୍କ୍ରବ୍ ଟାଇଫସ୍ ନେଲା ଜୀବନ। କଟକ ଶିଶୁଭବନରେ ଚିକିତ୍ସାଧୀନ ଅବସ୍ଥାରେ ୧୧ ବର୍ଷୀୟ ନାବାଳକର ମୃତ୍ୟୁ ଘଟିଛି । ଏହି ଅକାଳ ମୃତ୍ୟୁ ପରେ ଅନୁଗୋଳ ଜିଲ୍ଲା କଣିହାଁ ବ୍ଲକ ଅନ୍ତର୍ଗତ ରେଙ୍ଗାଳି ଗାଁରେ ଶୋକର ଛାୟା ଖେଳିଯାଇଛି । ଗତକାଲି କଟକ ଶିଶୁଭବନରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।

• ଅକାଳରେ ନାବାଳକର ମୃତ୍ୟୁ

ସ୍କ୍ରବ୍ ଟାଇଫସ୍‌ରେ ଆକ୍ରାନ୍ତ ହୋଇ ୧୧ ବର୍ଷୀୟ ନାବାଳକ ଅଶ୍ୱିନ ସାମଲଙ୍କ ମୃତ୍ୟୁ ହୋଇଛି । ଅଶ୍ୱିନଙ୍କୁ ଜ୍ୱର ହେବାରୁ ପ୍ରଥମେ ସ୍ଥାନୀୟ ଡାକ୍ତରଖାନାରେ ଚିକିତ୍ସା କରାଯାଇଥିଲା । ପରେ ତାଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରୁ ଅଧିକ ଚିକିତ୍ସା ପାଇଁ କଟକ ଶିଶୁଭବନକୁ ସ୍ଥାନାନ୍ତର କରାଯାଇଥିଲା । ଏକ ମାସରୁ ଊର୍ଦ୍ଧ୍ୱ ସମୟ ଧରି ଚିକିତ୍ସା ଚାଲିଥିବା ସତ୍ତ୍ୱେ ଶେଷରେ ଅଶ୍ୱିନଙ୍କ ମୃତ୍ୟୁ ହୋଇଛି । ଏହି ଘଟଣା ପରେ ଅଞ୍ଚଳରେ ସ୍କ୍ରବ୍ ଟାଇଫସ୍‌କୁ ନେଇ ଭୟର ବାତାବରଣ ସୃଷ୍ଟି ହୋଇଛି । ଜଣେ ନାବାଳକଙ୍କ ଅକାଳ ମୃତ୍ୟୁରେ ରେଙ୍ଗାଲି ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି । ତେବେ ଏହି ରୋଗର ଲକ୍ଷଣ କଣ ଓ କିପରି ଆପଣ ସତର୍କ ରହିବେ ଜାଣିରଖନ୍ତୁ ।

• ସ୍କ୍ରବ୍ ଟାଇଫସ୍‌ କାହିଁକି ହୁଏ ?

ସ୍କ୍ରବ୍ ଟାଇଫସ୍‌ ହେଉଛି ଓରିଏଣ୍ଟିଆ ସୁସୁଗାମୁସି ନାମକ ଏକ ଜୀବାଣୁ ଦ୍ୱାରା ବ୍ୟାପୁଥିବା ଏକ ଜୀବାଣୁ ଜନିତ ରୋଗ । ଏହା ସଂକ୍ରମିତ ଛୋଟ କୀଟ ବା ଚିଚିଙ୍ଗି (ଲାଭା ଅବସ୍ଥାରେ ଥିବା ପୋକ) କାମୁଡ଼ିବା ଦ୍ୱାରା ମଣିଷକୁ ବ୍ୟାପିଥାଏ । ସାଧାରଣତଃ ଝାଡ଼ଜଙ୍ଗଲ, ଘାସବଣ କିମ୍ବା ଖେତବାଡ଼ିରେ କାମ କରୁଥିବା ଲୋକଙ୍କୁ ଏହା ଅଧିକ ହୋଇଥାଏ ।

କଣ ହୋଇଥାଏ ଲକ୍ଷଣ ?
• ଅଧିକ ଜ୍ୱର ଏବଂ ଥଣ୍ଡା ଲାଗିବା
• ମୁଣ୍ଡବିନ୍ଧା ଏବଂ ଦେହହାତ ଘୋଳାବିନ୍ଧା ହେବା
• କୀଟ କାମୁଡ଼ିଥିବା ସ୍ଥାନରେ କଳା କ୍ଷତ ଚିହ୍ନ ଦେଖାଦେବା
• ଲସିକା ଗ୍ରନ୍ଥି ଫୁଲିଯିବା

ପଢନ୍ତୁ ଏହି ଖବର: ସୁନ୍ଦରଗଡ଼ରେ ଥମୁନି ସ୍କ୍ରବ୍ ଟାଇଫସ୍, ଆକ୍ରାନ୍ତଙ୍କ ସଂଖ୍ୟା ୯୧୦କୁ ବୃଦ୍ଧି

ଏହା ବ୍ୟତୀତ, ସ୍କ୍ରବ୍ ଟାଇଫସର ଏକ ସାଧାରଣ ଲକ୍ଷଣ ହେଉଛି ଚର୍ମରେ ବଡ ଧରଣର ଏକ ଘା' ହେବା । ଯେଉଁ ସ୍ଥାନରେ ଏହି କୀଟ କାମୁଡିଥାଏ, ସେହି ସ୍ଥାନରେ କଳା ହୋଇ ବଡ ଧରଣର କ୍ଷତ ହୋଇଥାଏ । କେତେକ କ୍ଷେତ୍ରରେ ଶ୍ୱାସକ୍ରିୟା ଏବଂ ଅର୍ଗାନ ଫେଲ୍ଯୁର ହେବାର ସମ୍ଭାବନା ମଧ୍ୟ ରହିଥାଏ । ଏଣୁ ଏପରି ଲକ୍ଷଣ ଦେଖାଦେଲେ ଆଦୌ ଅଣଦେଖା କରନ୍ତୁନି । ତୁରନ୍ତ ନିକଟସ୍ଥ ହସ୍ପିଟାଲକୁ ଯାଇ ଡାକ୍ତରଙ୍କ ପରାମର୍ଶ ନିଅନ୍ତୁ ।