ପୁରୀ ସ୍ବର୍ଗଦ୍ବାରରେ ରାଷ୍ଟ୍ରୀୟ ସମ୍ମାନ ସହ ହେଲା ଶେଷକୃତ୍ୟ ସମ୍ପନ୍ନ

ଅର୍ଗସ ବ୍ୟୁରୋ : ପୂର୍ବତନ ବାଚସ୍ପତି ମହେଶ୍ବର ମହାନ୍ତିଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ପୁରୀ ସ୍ବର୍ଗଦ୍ବାରରେ ରାଷ୍ଟ୍ରୀୟ ସମ୍ମାନ ସହ ହଜାର ହଜାର ଲୋକଙ୍କ ଗହଣରେ ସମସ୍ତ ରୀତି ନୀତିରେ ତାଙ୍କର ଅନ୍ତିମ ସଂସ୍କାର କରାଯାଇଛି । ଅନ୍ତିମ ଯାତ୍ରାରେ ‘ମହେଶ୍ବର ମହାନ୍ତି ଅମର ରହେ’ ନାରାରେ ପ୍ରକମ୍ପିତ ହୋଇଥିଲା ଅଞ୍ଚଳ । ପୁଅ ସୁନୀଲ ମହାନ୍ତି ମୁଖାଗ୍ନି ଦେଇଥିଲେ। ହେଲେ ପତ୍ନୀ ଏବେ ପାଗଳୀପ୍ରାୟ । ସାତ କଳସ ଆଠ ଦୀପକୁ ସାକ୍ଷୀ ରଖି ସେ ଯାହାର ହାତ ଧରିଥିଲେ । ଯାହା ନାଁରେ ସିନ୍ଦୂର ପିନ୍ଧୁଥିଲେ, ଯାହା ପାଇଁ ସମାଜରେ ସଧବାର ଆଖ୍ୟା ପାଇଥିଲେ । ଆଜି ସେ ଅଫେରା ରାଇଜର ଅତିଥି ହୋଇଯିବା ପରେ ପତ୍ନୀ ଘନଘନ ଭୂପତିତା ହେଉଛନ୍ତି । ପୁଅ ତୁନୀ ହେବା ପାଇଁ ବୋଧ କରୁଛି । ହେଲେ ଜୀବନସାଥୀର ଲେଉଟାଣି ପରେ ଯନ୍ତ୍ରଣା ଅସହ୍ୟ । ମାଆ ବି ପୁଅର ଏ ଅବସ୍ଥା ଦେଖି ନିଜକୁ  ବୁଝେଇ ପାରୁନାହାନ୍ତି । 

ଅଧିକ ପଢନ୍ତୁ : ପରଲୋକରେ ମହେଶ୍ୱର ମହାନ୍ତି

ପୁରୀ ସ୍ବର୍ଗଦ୍ବାରରେ ସରିଛି ମହେଶ୍ବର ମହାନ୍ତିଙ୍କ ଅନ୍ତ୍ୟେଷ୍ଟି । ମହେଶ୍ବର ମହାନ୍ତି ଅମର ନାରାରେ ଚତୁର୍ଦ୍ଦିଗ ପ୍ରକମ୍ପିତ ହୋଇଥିବା ବେଳେ ପୁଅ ଲିଟୁ ମହାନ୍ତି ବାପାଙ୍କୁ ମୁଖାଗ୍ନି ଦେଇଛନ୍ତି । ତେବେ ଏହା ପୂର୍ବରୁ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଭୋର୍ ୩ଟା ୨୫ରେ ଶେଷ ନିଃଶ୍ବାସ ତ୍ୟାଗ କରିବା ପରେ ଆଜି ସକାଳେ ପ୍ରଥମେ ତାଙ୍କର ମର ଶରୀରକୁ ବିଧାନସଭା ନିଆଯାଇଥିଲା । ସେଠାରେ ତାଙ୍କୁ ଗାର୍ଡ ଅଫ୍‌ ଅନର ପ୍ରଦାନ କରାଯାଇଥିଲା । ଶଙ୍ଖ ଭବନରେ ଶେଷ ଦର୍ଶନ ସହ ଶ୍ରଦ୍ଧାଞ୍ଜଳି ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବହୁ ବରିଷ୍ଠ ମନ୍ତ୍ରୀ ଓ ନେତା । ଏହା ପରେ ପୁରୀ ବାସଭବନ ଅଭିମୁଖେ ଯାଇଥିଲେ ମହେଶ୍ବରଙ୍କ ପାର୍ଥିବ ଶରୀର । ଯେଉଁଠି ପ୍ରିୟ ନେତାଙ୍କୁ ଶେଷ ବିଦାୟ ଦେବା ପାଇଁ ଦେଖିବାକୁ ମିଳିଥିଲା ପ୍ରବଳ ଜନଗହଳି । ପରେ ଜିଲ୍ଲା ପାର୍ଟି ଅଫିସ ନିଆଯିବା ପରେ ସ୍ବର୍ଗଦ୍ବାରରେ ମହେଶ୍ବର ମହାନ୍ତିଙ୍କର ଅନ୍ତିମ ସଂସ୍କାର କରାଯାଇଥିଲା । 

ଅଧିକ ପଢନ୍ତୁ : ମହେଶ୍ୱର ମହାନ୍ତିଙ୍କ ବିୟୋଗ ଖବର ଶୁଣି ମୁଁ ଦୁଃଖିତ ଓ ମର୍ମାହତ - ଧର୍ମେନ୍ଦ୍ର ପ୍ରଧାନ

୧୯୭୮ରୁ ୨୦୧୯ ମସିହା ପର୍ଯ୍ୟନ୍ତ ମହେଶ୍ୱର ନିର୍ବାଚିତ ଜନପ୍ରତିନିଧି ଭାବେ କାର୍ଯ୍ୟ କରିବାର ସୁଯୋଗ ପାଇଥିଲେ । ୨୦୦୪ ମସିହାରୁ ୨୦୦୮ ପର୍ଯ୍ୟନ୍ତ ବିଧାନସଭାର ବାଚସ୍ପତି ପଦବୀ ସମ୍ଭାଳିଥିଲେ । ୨୦୧୧ରୁ ୨୦୧୯ ପର୍ଯ୍ୟନ୍ତ ଅନେକ ବିଭାଗର ମନ୍ତ୍ରୀ ପଦବୀରେ ଥିଲେ ମହେଶ୍ବର । ପଞ୍ଚାୟତିରାଜ, ରାଜସ୍ବ, ଆଇନ, ପର୍ଯ୍ୟଟନ, ଯୋଜନା ଓ ସଂଯୋଜନା ଭଳି ପ୍ରମୁଖ ବିଭାଗର ମନ୍ତ୍ରୀ ପଦବୀରେ ଥିଲେ ମହେଶ୍ବର । ତାଙ୍କ ବିୟୋଗରେ ରାଜ୍ୟପାଳ ରଘୁବର ଦାସଙ୍କ ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଟ୍ବିଟ୍‌ କରି ଶୋକ ପ୍ରକାଶ କରିଛନ୍ତି । ଲମ୍ବା ସମୟ ଧରି ଜନପ୍ରତିନିଧି ଭାବେ ପୁରୀବାସୀଙ୍କ ପାଇଁ ସେ କରିଥିବା କାର୍ଯ୍ୟ ସବୁ ଦିନ ପାଇଁ ମନେ ରହିବ  ବୋଲି ଧର୍ମେନ୍ଦ୍ର ଟ୍ବିଟରରେ ଲେଖିଛନ୍ତି । ଏପରିକି ବିଧାୟକ ଥିବା ସମୟରେ ୨୦୦୪ରେ ବାଚସ୍ପତି ଥିବା ମହେଶ୍ବର ମହାନ୍ତିଙ୍କ ହାତରୁ ଶ୍ରେଷ୍ଠ ବିଧାୟକ ସମ୍ମାନ ଗ୍ରହଣର ମୁହୂର୍ତ୍ତକୁ ମନେ ପକାଇ ଶୋକ ସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି ଧର୍ମେନ୍ଦ୍ର ।