ରାତିପାହିଲେ ପବିତ୍ର ଶିବରାତ୍ରୀ, ଚଳଚଞ୍ଚଳ ରାଜଧାନୀର ବିଭିନ୍ନ ଶୈବପୀଠ
ଅର୍ଗସ ବ୍ୟୁରୋ : ରାତି ପାହିଲେ ପବିତ୍ର ଜାଗର ଯାତ୍ରା । ଉପବାସ ରଖି ମନୋସ୍କାମନା ନେଇ ଜାଗର ବତୀ ଜାଳିବେ ଶୈବଭକ୍ତ । ଯାହାକୁ ନେଇ ଚଳଚଞ୍ଚଳ ହୋଇ ଉଠିଲାଣି ମନ୍ଦିରମାଳୀନି ସହର ଭୁବନେଶ୍ୱର । ରାଜଧାନୀର ଆରାଧ୍ୟ କୁହାଯାଉଥିବା ଲିଙ୍ଗରାଜ ମନ୍ଦିରରେ ସରିଲାଣି ସମସ୍ତ ପ୍ରସ୍ତୁତି । ମନୋଭରି ଭୋଳାନାଥଙ୍କ ଦର୍ଶନ କରିବେ ଭକ୍ତ ଗଣ । ବାବା ଲିଙ୍ଗରାଜଙ୍କ ସ୍ଵତନ୍ତ୍ର ପୂଜାର୍ଚ୍ଚନା ପାଇଁ ଏବେଠୁ ପ୍ରସ୍ତୁତି ଆରମ୍ଭ ହୋଇ ସାରିଥିବା ଦେଖିବାକୁ ମିଳିଛି । ସକାଳ ୩ଟାରୁ ପହଡ ଖୋଲାଯିବାକୁ ଥିବା ବେଳେ ୩.୩୦ ମଙ୍ଗଳ ଆଳତୀ ପରେ ଅନୁଷ୍ଠିତ ହେବ ଅବକାଶ ନୀତି । ପରେ ସକାଳ ୩.୩୦ରୁ ୧୧ଟା ପର୍ଯ୍ୟନ୍ତ ସାହାଣ ମେଳା ଦର୍ଶନ ଅର୍ଥାତ ସାଧାରଣ ଦର୍ଶନ ଆରମ୍ଭ ହେବ ।
ଅନ୍ୟପଟେ ଲିଙ୍ଗରାଜ ମନ୍ଦିରରେ ଶିବରାତ୍ରୀ ପାଇଁ ବିଏମସି ପ୍ରଶାସନ ଏବଂ ସେବାୟତ ମାନଙ୍କ ପକ୍ଷରୁ ମଧ୍ୟ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ମନ୍ଦିର ଚାରିପଟେ ସୌନ୍ଦର୍ଯ୍ୟକରଣ କରାଯାଇଥିବା ବେଳେ ମନ୍ଦିର ପରିସରରେ ଆଲୋକୀକରଣ ବ୍ୟବସ୍ଥା କରିଛି ବିଏମସି । ଭ୍ରମ୍ୟମାଣ ଟଏଲେଟ ସହ ସଫେଇ କର୍ମଚାରୀ ନିଯୁକ୍ତି କରାଯାଇଛି । ଏଥି ସହିତ ଟ୍ରାଫିକ, ପାର୍କିଂ ବ୍ୟବସ୍ଥା ଠାରୁ ନେଇ ଶୌଚାଳୟ ଏବଂ ସ୍ଵଛତା ଉପରେ ମଧ୍ୟ ବିଏମସି ବିଭିନ୍ନ ପଦକ୍ଷେପ ଗ୍ରହଣ କରିଛି ।
ଅଧିକ ପଢନ୍ତୁ ଓଡ଼ିଶା ଖବର
📱 Get Argus News App
✨ଅନ୍ୟପଟେ ଭକ୍ତଙ୍କ ଭିଡକୁ ଦୃଷ୍ଟିରେ ରଖି ପୋଲିସ ପକ୍ଷରୁ ମଧ୍ୟ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ଉପରେ ଧ୍ୟାନ ଦିଆଯାଇଛି । ଆସନ୍ତା କାଲି ଭକ୍ତ ଭଗବାନଙ୍କ ମଧ୍ୟରେ ହେବ ଅପୂର୍ବ ମିଳନ । ଏଥିପାଇଁ ମନ୍ଦିର ସେବାୟତ, ପ୍ରଶାସନ ସମସ୍ତେ ବେଶ ତତ୍ପର ଥିବା ବେଳେ ପ୍ରଭୁ କୃପା ଲାଭ କରିବାକୁ ଶ୍ରଦ୍ଧାଳୁଙ୍କ ମନରେ ମଧ୍ୟ ବେଶ ଉତ୍କଣ୍ଠା ଭରି ରହିଛି ।