Snake In AC / AC ଭିତରୁ ମୁଣ୍ଡ କାଢିଲା ସାପ; ଘରେ ଏସି ଲଗାଇ ଶୋଉଥିଲେ ହୋଇଯାଆନ୍ତୁ ସାବଧାନ

ରାଜ୍ୟରେ ଏବେ କଲବଲ କରୁଛି ତାତି । ପାରଦ ଏବେ ୪୫ ଡିଗ୍ରୀ ମୁହାଁ ହେଲାଣି । ପ୍ରବଳ ତାତିରୁ ବର୍ତ୍ତିବା ପାଇଁ ଏବେ ଘରେ ଘରେ ଏସି ବ୍ୟବହାର ହେଉଛି । ଦିନ କଣ ରାତି, ଏବେ ସମସ୍ତେ ଏସି ଲଗାଇ ଆରାମ କରୁଛନ୍ତି । ଯଦି ଆପଣ ବି ନିଜ ଘରେ ଏସି ଲଗାଇ ଆରାମରେ ଶୋଉଛନ୍ତି, ତେବେ ଟିକେ ସାବଧାନ ହୋଇଯାଆନ୍ତୁ । କାରଣ ଏସି ଭିତରୁ ବାହାରିଛି ବିଷଧର । ହଠାତ୍ ଏସି ଭିତରେ ସାପ ମୁଣ୍ଡ କାଢିବା ଦେଖି ଶୁଭ୍ରଜିତ ବି ଆଶ୍ଚର୍ଯ୍ୟ ହୋଇଯାଇଥିଲେ ।

• AC ଭିତରେ ବିଷଧର, ଛାନିଆ ଶୁଭ୍ରଜିତ୍

ବୌଦ୍ଧ ଜିଲ୍ଲାରୁ ଆସିଥିବା ଏହି ଘଟଣା ଏବେ ସମସ୍ତଙ୍କୁ ଚମକାଇ ଦେଇଛି । ଘଟଣାଟି ଘଟିଛି ବୌଦ୍ଧ ଜିଲ୍ଲା ତିଳେଶ୍ୱର ଗ୍ରାମର ଶୁଭ୍ରଜିତ ପ୍ରଧାନଙ୍କ ଘରେ। ବାହାରେ ଅସହ୍ୟ ଗରମ ହେଉଥିବାରୁ ଶୁଭ୍ରଜିତ ନିଜ ଶୋଇବା ଘରେ ଏସି ଲଗାଇ ଆରାମ କରୁଥିଲେ । କିନ୍ତୁ କିଛି ସମୟ ପରେ ସେ ଯାହା ଦେଖିଲେ, ସେଥିରେ ତାଙ୍କ ପାଦ ତଳୁ ମାଟି ଖସିଗଲା । ସେ ଦେଖିଲେ, ଏସି ଭେଣ୍ଟ୍ ଭିତରୁ ଏକ ବିଷଧର ସାପ ବାହାରକୁ ମୁଣ୍ଡ କାଢୁଛି । ଏସି ଭିତରୁ ସାପ ବାହାରୁଥିବା ଦେଖି ଘର ଲୋକ ଆତଙ୍କିତ ହୋଇପଡିଲେ ।

• ଘଣ୍ଟାଏ ପରେ ବାହାରିଲା ସାପ

​ଭୟଭୀତ ହୋଇ ଶୁଭ୍ରଜିତ ସଙ୍ଗେ ସଙ୍ଗେ ସ୍ନେକ ହେଲ୍ପ ଲାଇନକୁ ଯୋଗାଯୋଗ କରିଥିଲେ । ସ୍ନେକ୍ ହେଲ୍ପଲାଇନ୍ ସଦସ୍ୟଙ୍କ ପ୍ରାୟ ୧ ଘଣ୍ଟାର କସରତ ପରେ ସାପଟିକୁ ଉଦ୍ଧାର କରିଛି । ପରେ ତାକୁ ସୁରକ୍ଷିତ ଭାବେ ଜଙ୍ଗଲରେ ଛାଡି ଦେଇଥିଲେ । ତେବେ ଏଭଳି ବିପଦରୁ ବର୍ତ୍ତିବା ପାଇଁ ଆମେ ସମସ୍ତେ ସାବଧାନତା ଅବଲମ୍ବନ କରିବା ଜରୁରୀ । ନଚେତ ଅଘଟଣ ଘଟିବାର ବହୁତ ସମ୍ଭାବନା ରହିଛି । ଶୋଇବା ପୂର୍ବରୁ ଘରର ସବୁ ଜିନିଷ ଉପରେ ଟିକେ ନଜର ପକାଇଲେ ହୁଏତ ଆମେ ଏପରି ବିପଦରୁ ବର୍ତ୍ତିପାରିବା ।

ପଢନ୍ତୁ ଏହି ଖବର: ରାଜ୍ୟରେ ୪୫ ଡିଗ୍ରୀ ମୁହାଁ ପାରଦ, ୧୩ ଜିଲ୍ଲାକୁ ଗରମ ଗୁଳୁଗୁଳି ନେଇ ଆଲର୍ଟ

ସୂଚନା ଥାଉ କି, ଏବେ ରାଜ୍ୟରେ ତାତି ବଢିବାରେ ଲାଗିଛି । ବିଶେଷ କରି ପଶ୍ଚିମରେ ସ୍ଥିତି ଅସମ୍ଭାଳ ହେଉଛି । ଆଜି ବି ପଶ୍ଚିମ ଓଡ଼ିଶାରେ କଲବଲ କରିବ ତାତି । ଝାରସୁଗୁଡ଼ା, ସୁନ୍ଦରଗଡ଼, ବରଗଡ଼, ବଲାଙ୍ଗିର ଓ ସମ୍ବଲପୁରକୁ ସତର୍କତା ଜାରି କରିଛି ପାଣିପାଗ କେନ୍ଦ୍ର । ଯଦି ଆମେ ବୌଦ୍ଧ ଜିଲ୍ଲାର ତାପମାତ୍ରା କଥା କହିବା, ତେବେ ଗତକାଲି ଜିଲ୍ଲାରେ ୪୧.୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିଲା । ସେହିପରି ରାଜ୍ୟର ଅନ୍ୟ ପଶ୍ଚିମ ଜିଲ୍ଲା ଟିଟିଲାଗଡ଼ରେ ୪୪ ଡିଗ୍ରୀ, ସମ୍ବଲପୁର ୪୩.୬ ଡିଗ୍ରୀ ଏବଂ ଝାରସୁଗୁଡ଼ାରେ ସର୍ବାଧିକ ୪୪.୮ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ ହୋଇଛି ।