Argus News - ଅବିଶ୍ରାନ୍ତ ବର୍ଷାରେ ଦକ୍ଷିଣ ଓଡ଼ିଶା ସ୍ଥିତି ସଙ୍ଗୀନ, ଭାଙ୍ଗିଲା କଲଭର୍ଟ...ରାସ୍ତାରେ ଚାଲୁଛି ପାଣି

ଅବିଶ୍ରାନ୍ତ ବର୍ଷାରେ ଦକ୍ଷିଣ ଓଡ଼ିଶା ସ୍ଥିତି ସଙ୍ଗୀନ ହୋଇପଡ଼ିଛି । ଗଜପତିରେ ଲଗାଣ ବର୍ଷା ଯୋଗୁଁ ଘୋଡାହାଡ଼ ଡ୍ୟାମରେ ଖୋଲିଲା ଦୁଇଟି ଗେଟ୍ । ଘୋଡ଼ାହାଡ଼ ନଦୀ ତଟବର୍ତ୍ତୀ ଆଞ୍ଚଳ ବାସୀଙ୍କୁ ସତର୍କ କରାଇଛି ଘୋଡ଼ାହାଡ଼ ଜଳସେଚନ ବିଭାଗ ।

ସେହିପରି ପ୍ରବଳ ବର୍ଷା ଯୋଗୁଁ ଗଞ୍ଜାମ ଜିଲ୍ଲା ସୀମା ତଟବର୍ତ୍ତୀ ଅଞ୍ଚଳ ସ୍ଥିତି ବେହାଲ୍ ହୋଇପଡିଛି । ଦିଗପହଣ୍ଡି ବ୍ଲକ ଭ୍ରମରପୁର ବ୍ରିଜର ଅସ୍ଥାୟୀ ରାସ୍ତା ଉପରେ ଚାରି ଫୁଟ ପାଣି ପ୍ରବାହିତ ଯୋଗୁଁ ପାତ୍ରପୁର ବ୍ଲକର ତୁରୁବୁଡି ଓ ଖରିଆଗୁଡାକୁ ଗମନାଗମନ ବିଚ୍ଛିନ୍ନ ହୋଇଛି ।

ସେହିପରି ଦିଗପହଣ୍ଡି ଆସିକା ମୁଖ୍ୟ ରାସ୍ତା ପଳାସପୁର ବ୍ରିଜ୍ ଉପରେ ଚାଲୁଛି ଘୋଡ଼ାହାଡ଼ ନଦୀର ବର୍ଷା ପାଣି । ଯାହାକୁ ନେଇ ଆସିକା ପାଟପୁରକୁ ସଂଯୋଗ କରୁଥିବା ଜାତୀୟ ରାଜପଥ ୩୨୬ରେ ଯାତାୟତ ବାଧାପ୍ରାପ୍ତ ହୋଇଛି । ଅନ୍ୟପଟେ ମୌଲାଭଣଜା ପଞ୍ଚାୟତ ଖୁଲୁଡ଼ି-ନୂଆଗଡ଼ ହରିଣା ଗ୍ରାମ୍ୟ ଉନ୍ନୟନ ବିଭାଗ ଘୁଷୁରୀ ନାଳର ଅସ୍ଥାୟୀ କଲଭର୍ଟ ଧୋଇଯାଇଛି । ଫଳରେ ମୌଲାଭଣଜାରୁ ନୂଆଗଡ଼କୁ ଯିବା ଆସିବା ସମ୍ପୂର୍ଣ ଠପ ହୋଇଯାଇଛି ।

ଅଧିକ ପଢ଼ନ୍ତୁ: ଟ୍ବିନ୍ ସିଟିରେ ଆଜି ମେଲାଣି ନେବେ ମା', ଭସାଣ ଉପରେ ନଜର ରଖିବ ଡ୍ରୋନ୍

ସେପଟେ ଲଗାଣ ବର୍ଷାରେ ବେହାଲ ଗଜପତି । ପ୍ରବଳ ବର୍ଷା ଫଳରେ ଗଜପତି ଜିଲ୍ଲା ରାୟଗଡ଼ ବ୍ଲକ ପେକଟ ନିକଟରେ ଭୂସ୍ଖଳନରେ ନିଖୋଜ ବାପ ପୁଅଙ୍କ ଏବେ ସୁଦ୍ଧା ପତ୍ତା ମିଳିନାହିଁ । ଉଭୟେ ମାଟି ତଳେ ଚାପି ହୋଇ ରହିଥିବା ସନ୍ଦେହ କରାଯାଉଛି । ନିଖୋଜ ବାପ ପୁଅ ପେକଟ ଗାଁର କାର୍ତ୍ତିକ ଶବର ଓ ତାଙ୍କ ପୁଅ ରାଜିକ ଶବର । ଭୂସ୍ଖଳନ ଯୋଗୁଁ ରାୟଗଡ଼ଠାରୁ ନୂଆଗଡ଼ ଓ ରା.ଊଦୟଗିରି ବ୍ଲକ ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଛି । ଅଗ୍ନିଶମ ବିଭାଗ ଏବଂ ଜିଲ୍ଲା ପ୍ରଶାସନ ଉଦ୍ୟମରେ ଭୂସ୍ଖଳନ ହୋଇ ମାଟି ଅତଡ଼ା ଖସିଥିବା ସ୍ଥାନରେ ଉଦ୍ଧାର କାର୍ଯ୍ୟ ଜାରି ରହିଛି । ଯୁଦ୍ଧକାଳୀନ ଭିତ୍ତିରେ ରାସ୍ତା ସଫା କରାଯାଉଛି ।

ସେପଟେ ଗଜପତି ଜିଲ୍ଲାରେ ପ୍ରବଳ ବର୍ଷା ଯୋଗୁ ଫୁଲୁଛି ବଂଶଧାରା । କାଶୀନଗର ଠାରେ ସତର୍କ ସଂକେତ ଉପରେ ପ୍ରବାହିତ ହୋଇଛି । ସତର୍କ ସଂକେତ ୫୪.୧୦ ମିଟର ରହିଥିବା ବେଳେ ବର୍ତ୍ତମାନ ଜଳସ୍ତର ୫୪.୩୨ରେ ପ୍ରବାହିତ ହେଉଛି । ସେହପରି ଉପର ମୁଣ୍ଡରେ ଏବେ ବି ବର୍ଷା ଜାରି ରହିଛି । ମଧ୍ୟରାତ୍ରରେ ବିପଦ ସଂକେତ ଉପରେ ପ୍ରବାହିତ ହେବା ନେଇ ଆକଳନ କରାଯାଉଛି । ଯାହାଫଳରେ ନଦୀ କୁଳିଆ ଲୋକେ ଏବେ ଆତଙ୍କିତ ଅବସ୍ଥାରେ ଅଛନ୍ତି ।