Odisha News / ଦେଶୀ ମଦଭାଟି ଭଙ୍ଗାରୁଜା ଘଟଣାରେ ୧୭୪ ଜଣଙ୍କ ନାଁରେ ମାମଲା ରୁଜୁ

ସୁବର୍ଣ୍ଣପୁର: ମଦ ଯୋଗୁଁ ପୋଛି ହୋଇ ଯାଉଛି ସିନ୍ଦୂର, ଉଜୁଡ଼ି ଯାଉଛି ସଂସାର । କିଏ ସ୍ଵାମୀକୁ ତ ଆଉ କିଏ ପୁଅକୁ ହରାଉଛି । ଗାଁରେ ଅଶାନ୍ତିର ବାତାବରଣ ସୃଷ୍ଟି ହେଉଥିବା ବେଳେ ସୁବର୍ଣ୍ଣପୁର ପିତାମହୁଲ ଠାରେ ଶନିବାର ଦେଶୀ ମଦଭାଟି ଭଙ୍ଗାରୁଜା କରିଥିଲେ ଗ୍ରାମବାସୀ ।

ଏବେ ଦେଶୀ ମଦଭାଟି ଭଙ୍ଗାରୁଜା ଘଟଣାରେ ୧୭୪ ଜଣଙ୍କ ନାଁରେ ମାମଲା ରୁଜୁ କରିଛି ସୁବଳୟା ଥାନା ପୋଲିସ । ସୁବଳୟା ଥାନା ପୋଲିସ ପକ୍ଷରୁ ୧୭୪ ଜଣଙ୍କ ନାଁରେ ଥାନା କେସ୍ ନମ୍ବର ୧୭୩/୨୬ରେ ବିଏନଏସ୍ ଧାରା ୧୯୧ (୨), ୧୯୧ (୩), ୩୩୩, ୩୨୪ (୪), ୧୨୬ (୨), ୨୯୬, ୩୫୧ (୨), ୩୧୦ (୨), ୧୦୯, ୧୯୦ ଲଗା ଯାଇଛି ।

ଏଥିସହ ପଢ଼ନ୍ତୁ: ଶ୍ରୀକାନ୍ତଙ୍କ ମୃତ୍ୟୁର ୧୨ ଦିନ ପରେ ହେଲା ଗିରଫଦାରୀ; ପୋଲିସ ଲଗାଇଥିବା ଦଫାକୁ ନେଇ ଉଠିଲା ପ୍ରଶ୍ନ 

ଶନିବାର ସୁବର୍ଣ୍ଣପୁର ଜିଲ୍ଲା ସୁବଳୟା ଥାନା ଅନ୍ତର୍ଗତ ପିତାମହୁଲ ଠାରେ ଥିବା ଦେଶୀ ମଦଭାଟିରେ ଭଙ୍ଗାରୁଜା ହୋଇଥିଲା । ପ୍ରଥମେ ପଞ୍ଚାୟତର ଶତାଧିକ ମହିଳା, ପୁରୁଷ ମଦ ଭାଟି ସମ୍ମୁଖରେ ଧାରଣାରେ ବସି ଉଚ୍ଛେଦ ଦାବି କରିଥିଲେ ।

ପ୍ରଶାସନ ମଦ ଭାଟିକୁ ବନ୍ଦ କରିବା ଦିଗରେ ପଦକ୍ଷେପ ନ ନେବାରୁ ଶତାଧିକ ମହିଳା ଓ ପୁରୁଷ ମଦ ଭାଟିକୁ ଭାଙ୍ଗି ରୁଜି ଚୁରମାର କରି ଦେଇଥିଲେ । ଉତ୍ତ୍ୟକ୍ତ ମହିଳାମାନେ ଭିତରକୁ ଧସେଇ ପଶି ଦେଶୀ ମଦଭାଟିରେ ବ୍ୟାପକ ଭଙ୍ଗାରୁଜା କରିବା ସହିତ ରନ୍ଧା ମଦ ମହୁଲ ପୋଚ ନଷ୍ଟ କରିଥିଲେ । ଢାଳି ଦେଇଥିଲେ ଶହ ଶହ ଲିଟର ରନ୍ଧା ମଦ ।

ଏଥିସହ ପଢ଼ନ୍ତୁ: ଧରାପଡ଼ିଲେ ବାପ-ପୁଅ; ଟ୍ରକ୍ ଚୋରିର ଏମିତି ରାକେଟ୍, ଜାଣିଲେ ଉଡ଼ିଯିବ ହୋସ୍ 

ଭଙ୍ଗାରୁଜା କରିବା ସହ ଦେଶୀ ମଦଭାଟିର ଲାଇସେନ୍ସ ବାତିଲ ପାଇଁ ଦାବି କରିଥିଲେ ଗ୍ରାମବାସୀ । ନଚେତ୍ ଆଗାମୀ ଦିନରେ ଆନ୍ଦୋଳନ ଭୟଙ୍କର ହେବ ବୋଲି ଚେତାବନୀ ମଧ୍ୟ ଦେଇଥିଲେ । ଏବେ ମଦଭାଟି ଭଙ୍ଗାରୁଜା ମାମଲାରେ ପୋଲିସ ୧୭୪ ଜଣଙ୍କ ନାଁରେ ମାମଲା ରୁଜୁ କରିଛି ।