Sudarsan Pattnaik / ବିଦେଶରେ ଚମକିଲେ ବାଲୁକା ଶିଳ୍ପୀ ସୁଦର୍ଶନ; ଜିତିଲେ ଋଷର ଗ୍ରାଣ୍ଡ ସ୍ୟାଣ୍ଡ ମାଷ୍ଟର କପ୍ ୨୦୨୬ ଟାଇଟଲ

ପ୍ରଥମ ଭାରତୀୟ ଭାବରେ ପୁରୀର ସୁଯୋଗ୍ୟ ସନ୍ତାନ ତଥା ବିଶିଷ୍ଟ ଓଡ଼ିଆ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକଙ୍କୁ ମିଳିଲା ଋଷର ଗ୍ରାଣ୍ଡ ସ୍ୟାଣ୍ଡ ମାଷ୍ଟର କପ୍ ୨୦୨୬ ଟାଇଟଲ । ଋଷର କାଲିନିନଗ୍ରାଡ୍ ଅଞ୍ଚଳରେ ଅନୁଷ୍ଠିତ ଦ୍ୱିତୀୟ ଅନ୍ତର୍ଜାତୀୟ ବାଲୁକା ମୂର୍ତ୍ତି ମହୋତ୍ସବରେ ସେ ବିଜେତା ହୋଇଛନ୍ତି । ପ୍ରଥମ ଭାରତୀୟ ବାଲୁକା ଶିଳ୍ପୀ ଭାବରେ ଏହି ମର୍ଯ୍ୟାଦାଜନକ ସମ୍ମାନ ଜିତିଛନ୍ତି ପଦ୍ମଶ୍ରୀ ସୁଦର୍ଶନ ପଟ୍ଟନାୟକ । ବାଲୁକା କଳା କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ଏବଂ ବିଶ୍ୱ ଉଷ୍ମତା ବିଷୟବସ୍ତୁ ଉପରେ ତାଙ୍କର ଶକ୍ତିଶାଳୀ ବାଲୁକା ମୂର୍ତ୍ତି ପାଇଁ ସ୍ୱୀକୃତି ସ୍ୱରୂପ ଏହି ପୁରସ୍କାର ପ୍ରଦାନ କରାଯାଇଥିଲା ।

ଜୁନ ୧୧, ୨୦୨୬ରୁ ଆରମ୍ଭ ହୋଇଥିବା ଅନ୍ତର୍ଜାତୀୟ ମହୋତ୍ସବ ସମୟରେ ଏକ ସ୍ୱତନ୍ତ୍ର ଜୁରି କମିଟି ଦ୍ୱାରା ସର୍ବସମ୍ମତିକ୍ରମେ ଏହି ଚୟନ କରାଯାଇଥିଲା । ମହୋତ୍ସବରେ ବିଭିନ୍ନ ଦେଶର ୧୨ ଜଣ ପ୍ରମୁଖ ବାଲୁକା କଳାକାର ଅଂଶଗ୍ରହଣ କରିଥିଲେ । ପ୍ରତ୍ୟେକ ଉଲ୍ଲେଖନୀୟ କଳାକୃତି ସୃଷ୍ଟି କରିଥିଲେ । ପଟ୍ଟନାୟକଙ୍କ ପୁରସ୍କାରପ୍ରାପ୍ତ ମୂର୍ତ୍ତି, ୩ ମିଟର ଉଚ୍ଚ, ପୃଥିବୀର ଦୁଇଟି ବିପରୀତ ମୁହଁକୁ ଚିତ୍ରଣ କରିଛି। ଗୋଟିଏ ପାର୍ଶ୍ୱ ପରିବେଶଗତ ଅବକ୍ଷୟର ଶିକାର ହେଉଥିବା ଏକ ଶୁଷ୍କ ଏବଂ କ୍ଷତିଗ୍ରସ୍ତ ଗ୍ରହକୁ ଚିତ୍ରଣ କରିଥିବା ବେଳେ ଅନ୍ୟଟି ବୃକ୍ଷ ରୋପଣ ଏବଂ ପରିବେଶ ସଂରକ୍ଷଣ ମାଧ୍ୟମରେ ଆଶାର ପ୍ରତୀକ ଉଜ୍ଜୀବିତ କରିଛି ।

• ବାଲୁକା କଳା ମାଧ୍ୟମରେ ଦୃଢ ବାର୍ତ୍ତା

ଏହି ମୂର୍ତ୍ତି କାର୍ବନ ଡାଇଅକ୍ସାଇଡ୍ ଶୋଷଣ, ଅମ୍ଳଜାନ ମୁକ୍ତ କରିବା, ଜଳ ସଂରକ୍ଷଣ କରିବା, ମୃତ୍ତିକା କ୍ଷୟ ରୋକିବା ଏବଂ ବନ୍ୟପ୍ରାଣୀଙ୍କୁ ସମର୍ଥନ କରିବାରେ ଗଛର ଗୁରୁତ୍ୱପୂର୍ଣ୍ଣ ଭୂମିକାକୁ ପ୍ରଦର୍ଶନ କରିଛି। ଜୁରି କମିଟି ସର୍ବସମ୍ମତିକ୍ରମେ ପଟ୍ଟନାୟକଙ୍କୁ ଏହି ସମ୍ମାନଜନକ ସମ୍ମାନ ପାଇଁ ଚୟନ କରିଥିଲେ । ନିଜ ବାଲୁକା କଳା ମାଧ୍ୟମରେ ବିଶ୍ଵକୁ ଏକ ଗୁରୁତ୍ଵପୂର୍ଣ୍ଣ ବାର୍ତ୍ତା ଦେଇଥିଲେ ଶିଳ୍ପୀ ସୁଦର୍ଶନ । ଯାହାଦ୍ଵାରା ସେ ଅନେକ ପ୍ରତିଯୋଗୀଙ୍କୁ ପଛରେ ପକାଇ ଏହି ସମ୍ମାନଜନକ ଟାଇଟଲ ଜିତିବା ସହ ବିଶ୍ଵରେ ଭାରତ ଏବଂ ଓଡ଼ିଶାବାସୀଙ୍କୁ ଗୌରବାନ୍ବିତ କରିଛନ୍ତି ।

ପଢନ୍ତୁ ଏହି ଖବର: ପ୍ଲାସ୍-ଷ୍ଟିକ୍ ପ୍ରୋଜେକ୍ଟ; ପାଣିକୁ ପରିଷ୍କାର କରିବ ତେନ୍ତୁଳି ମଞ୍ଜି, ଯୁବ ଭାରତୀୟଙ୍କୁ ସମ୍ମାନଜନକ ପୃଥିବୀ ପୁରସ୍କାର

ଓଡ଼ିଶା ମାଟିର ସୁଯୋଗ୍ୟ ସନ୍ତାନ ସୁଦର୍ଶନ ପଟ୍ଟନାୟକ ୭ବର୍ଷ ବୟସରୁ ବାଲିରେ ମୂର୍ତ୍ତି ଗଢିବା ଆରମ୍ଭ କରିଥିଲେ । ସେ ୩୫ରୁ ଅଧିକ ଅନ୍ତର୍ଜାତୀୟ ବାଲୁକା କଳା ପ୍ରତିଯୋଗିତାରେ ଅଂଶଗ୍ରହଣ କରିସାରିଛନ୍ତି । ତାଙ୍କ ନିର୍ମିତ କଳା ତାଜମହଲ ଏକ ଅନୁପମ କୃତି । ସେ ପୁରୀରେ ଏକ ସାଣ୍ଡ ଆର୍ଟ ଇନଷ୍ଟିଚ୍ୟୁଟ ସ୍ଥାପନ କରିଛନ୍ତି, ଯେଉଁଠାରେ ଅନେକ ଛାତ୍ର ବାଲୁକା କଳା ଶିଖୁଛନ୍ତି ଏବଂ ସେମାନେ ବିଦେଶରେ ମଧ୍ୟ ନାଁ କମାଇଛନ୍ତି ।