ଅର୍ଗସ ବ୍ୟୁରୋ : ଚାରୋଟି ଫେଜରେ ୧୧୭ ପ୍ରାର୍ଥୀଙ୍କ ନାଁ ବିଜେଡି ଘୋଷଣା କରିଥିବା ବେଳେ ବର୍ତ୍ତମାନ ସୁଦ୍ଧା କାକଟପୁର, କୋରେଇ, କରଞ୍ଜିଆ, କେନ୍ଦ୍ରାପଡା ଓ କୁଚିଣ୍ଡା ଭଳି ୫ ଆସନର କାର୍ଡ ଖୋଲିନି ବିଜେଡି । ଷ୍ଟାଣ୍ଡିଂ ବିଧାୟକ ସତ୍ତ୍ବେ ଏହି ୫ ଆସନରେ ଦଳ ପ୍ରାଥିଙ୍କ ନାଁ ଘୋଷଣା ନ କରିବା ଟିକେଟ କଟିବା ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି । କେନ୍ଦ୍ରାପଡା ଓ କୁଚିଣ୍ଡାରେ ଦଳ ଅନ୍ୟ ଦଳରୁ ନେତାଙ୍କ ଆମଦାନୀ କରିବା ପରେ ବର୍ତ୍ତମାନର ବିଧାୟକଙ୍କ ଟିକେଟ କଟିବା ଦିଗରେ ବଡ଼ ସଙ୍କେତ ଦେଇଛି । କେନ୍ଦ୍ରାପଡାରେ ଗଣେଶ୍ବର ବେହେରା ବିଜେଡ଼ିରେ ସାମିଲ ହେବା ପରେ ବର୍ତ୍ତମାନର ବିଧାୟକ ଶଶୀଭୂଷଣ ବେହେରାଙ୍କ ଟିକେଟ କଟିବା ସୁନିଶ୍ଚିତ ବୋଲି ଚର୍ଚ୍ଚା ହେଉଛି ।

ସେହିପରି କୁଚିଣ୍ଡାରେ ରାଜେନ୍ଦ୍ର ଛତ୍ରିଆ ଓ ବୃନ୍ଦାବନ ମାଝୀ ବିଜେଡିରେ ସାମିଲ ହେବା ପରେ ବର୍ତ୍ତମାନର ବିଧାୟକ କିଶୋର ନାୟକଙ୍କ ଟିକେଟ କଟିବ ବୋଲି କୁହାଯାଉଛି । ସେହିପରି କାକଟପୁର ଓ କରଞ୍ଜିଆ ନିର୍ବାଚନୀ ମଣ୍ଡଳୀରେ ବିରୋଧୀଙ୍କ ରଣନୀତିକୁ ଦେଖି ବିଧାୟକ ତଥା ଗୃହ ରାଷ୍ଟ୍ର ମନ୍ତ୍ରୀ ଥିବା ତୁଷାର କାନ୍ତି ବେହେରା ଏବଂ ମହିଳା ଶିଶୁ ବିକାଶ ମନ୍ତ୍ରୀ ଥିବା ବାସନ୍ତୀ ହେମ୍ବ୍ରମଙ୍କୁ ବିଜେଡି ବଦଳାଇ ପାରେ ବୋଲି ଚର୍ଚ୍ଚା ହେଉଛି । ସେହିପରି କୋରେଇ ରେ ପ୍ରତ୍ୟେକ ଥର ନିର୍ବାଚନରେ ଦଳ ଚେହେରା ପରିବର୍ତ୍ତନ କରୁଥିବାରୁ ଏଥର ବି ବିଧାୟକ ଅଶୋକ ବଳଙ୍କୁ ପରିବର୍ତ୍ତନ କରିବ ବୋଲି ସ୍ପଷ୍ଟ ସଂକେତ ଦେଇସାରିଲାଣି ଦଳ । ତେବେ ବିଜେଡି ନେତା କହିଛନ୍ତି ଟିକେଟକୁ ନେଇ କୌଣସି ଟେନସନ ନାହିଁ ।

ସେପଟେ ଟିକେଟ ଘୋଷଣାରେ ବିଳମ୍ବ ହେଉଥିବାରୁ ନିର୍ବାଚନ ମଣ୍ଡଳୀ ଛାଡି ରାଜଧାନୀ ରେ ଡେରା ପକେଇଛନ୍ତି ନେତା ଓ କର୍ମୀ । ପ୍ରଥମ ପର୍ଯ୍ୟାୟରେ ନିର୍ବାଚନ ହେବାକୁ ଥିବା ଜୟପୁର ଆସନ ପାଇଁ ଟିକେଟ ଘୋଷଣା ହୋଇ ନଥିବା ବେଳେ ବାରମ୍ବାର ଶଙ୍ଖ ଭବନ ଦୌଉଡୁଛନ୍ତି ବରିଷ୍ଠ ନେତା ରବି ନନ୍ଦ ଏବଂ ଆଶାୟୀ ଈଶ୍ବର ପାଣିଗ୍ରାହୀ । ଗତ ୧୩ ତାରିଖରେ ନିଜ ସମର୍ଥକ ମାନଙ୍କୁ ଧରି ଉଭୟ ନେତା ଶଙ୍ଖ ଭଵନ ଆସିଥିବା ବେଳେ ଆଜି ବି ସମାନ ଦୃଶ୍ୟ ଦେଖିବାକୁ ମିଳିଥିଲା ।

ଅଧିକ ପଢନ୍ତୁ ଓଡ଼ିଶା ଖବର

ସେହିପରି ଭୋଗରାଇ ଆସନ ଲାଗି ପୁଅ ପାଇଁ ଲବି କରି ଆଜି ନିଜ ସମର୍ଥକଙ୍କୁ ଧରି ନବୀନ ନିବାସରେ ପହଁଚିଥିଲେ ବରିଷ୍ଠ ବିଧାୟକ ଅନନ୍ତ ଦାସ । ବର୍ତ୍ତମାନ ସୁଦ୍ଧା ୩୦ ଆସନରେ ବିଜେଡି କ୍ୟାଣ୍ଡେଟ ଦେବାକୁ ବାକି ଥିବା ବେଳେ ବାଲିକୁଦା, ବେଗୁନିଆ, ବରି, ବଡ଼ଚଣାରେ ଭଳି କିଛି ସ୍ଥାନରେ ଆମଦାନୀ ନେତା ଓ ଆଶାୟୀ ପ୍ରାଥିଙ୍କ ଟଣା ଓଟରାକୁ ନେଇ ବିଗିଡିଲାଣି ବିଜେଡି ଗଣିତ ।

Argus News | argus news | -Argusnews Home: Odisha Latest News, Breaking News, Trending News, Live TV and more