ଅର୍ଗସ ବ୍ୟୁରୋ :  ଆଜି ଲଗାତାର ତୃତୀୟ ଦିନରେ ବି ଅଚଳ ବିଧାନସଭା । ପ୍ରଶ୍ନକାଳ ଆରମ୍ଭରୁ ହୋହଲ୍ଲା-ନାରାବାଜି କରି କକ୍ଷତ୍ୟାଗ କଲେ ବିରୋଧୀ ସଦସ୍ୟ । ଅପରାହ୍ନ 4ଟା ଯାଏଁ ଗୃହ ମୁଲତବୀ । ବିରୋଧୀ ଦଳ ଉଦ୍ଦେଶ୍ୟମୂଳକ ଭାବେ ତିନି ଦିନ ହେଲା ବିଧାନସଭା ଚଳାଇ ଦେଉନାହାନ୍ତି ବୋଲି ଶାସକ ଦଳର ଅଭିଯୋଗ ।
 ଆଜି ସକାଳ 10ଟା 30ରେ ଆରମ୍ଭ ହୋଇଥିଲା ପ୍ରଶ୍ନକାଳ । ପ୍ରଥମେ କୃଷି ବିଭାଗର ବିଭିନ୍ନ ପ୍ରଶ୍ନର ଉତ୍ତର ରଖୁଥିଲେ ବିଭାଗୀୟ ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ କେ. ଭି. ସିଂହଦେଓ । ଏତିକି ବେଳେ ପାଟିତୁଣ୍ଡ ଓ ହଙ୍ଗାମା କରିଥିଲେ ବିରୋଧୀ ସଦସ୍ୟ ।  ବିରୋଧୀଙ୍କ ହଙ୍ଗାମା ଯୋଗୁଁ ଗୃହ ଚଳାଇବା ଅସମ୍ଭବ ହେବାରୁ ବାଚସ୍ପତି ଗୃହକୁ ପ୍ରଥମେ ସାଢ଼େ 11ଟା ଯାଏଁ ପରେ 12ଟା ଯାଏଁ ଗୃହ ମୁଲତବୀ  କରିଥିଲେ । ଗୃହ ସୁପରିଚାଳନା ପାଇଁ ସର୍ବାଦଳୀୟ ବୈଠକ ଡାକିଥିଲେ ବାଚସ୍ପତି । କିନ୍ତୁ କୌଣସି ନିର୍ଯ୍ୟାସ ବାହାରିଲା ନାହିଁ । ଅଚଳାବସ୍ଥା ଜାରି ରହିବାରୁ ଅପରାହ୍ନ 4ଟା ଯାଏଁ ମୁଲତବୀ ରହିଲା ଗୃହ ।

ଅଧିକ ପଢନ୍ତୁ ଓଡିଶା ଖବର

ବିଧାନସଭା ସୁରୁଖୁରରେ ଚଳାଇବା ନେଇ ଅଧିବେଶନ ପୂର୍ବରୁ  ବଡ଼ ହୃଦୟ ଦେଖାଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟି ସହଯୋଗ ଲୋଡିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ହେଲେ ଶାସକ ବିଧାୟକଙ୍କ ଅଭିଯୋଗ ମାଛ ଯେପରି ବିନା ପାଣିରେ ଛଟପଟ ହୁଏ, ସେପରି କ୍ଷମତା ଯିବା ପରେ ଛଟପଟ ହେଉଛି ବିଜେଡି । ବିଜେଡି ଉଦ୍ଦେଶ୍ୟମୂଳକ ଭାବେ ବିଧାନସଭା ଚଳାଇ ଦେଉନାହିଁ କି ବିତର୍କକୁ ବି ଆସୁନାହିଁ । ରାଜ୍ୟର ସ୍ବାର୍ଥକୁ ବିଜେଡ଼ି ଗୁରୁତ୍ବ ଦେଉନାହିଁ ବୋଲି କହିଛି ବିଜେପି ।
ରାଜ୍ୟପାଳଙ୍କ ଅଭିଭାଷଣକୁ ନେଇ ଧନ୍ୟବାଦ ପ୍ରସ୍ତାବ ଆଲୋଚନାରେ ଭାଗ ନେଲେ ନାହିଁ ବିଜେଡି ଓ କଂଗ୍ରେସ । ଉପବାଚସ୍ପତି ନିର୍ବାଚନ ପ୍ରକ୍ରିୟା ସରିବା ପରେ କକ୍ଷ ତ୍ୟାଗ କରିଥିଲେ ବିଜେଡ଼ି ଓ କଂଗ୍ରେସ ସଦସ୍ୟ । ସର୍ବସମ୍ମତି କ୍ରମେ ଉପବାଚସ୍ପତି ଭାବେ ନିର୍ବାଚିତ ହୋଇଛନ୍ତି ତଳସରା ବିଧାୟକ ଭବାନୀ ଶଙ୍କର ଭୋଇ ।