ଅର୍ଗସ ବ୍ୟୁରୋ : ଉପକୂଳରୁ ଉପାନ୍ତ ସାରା ରାଜ୍ୟରେ ଉତ୍କଟ ଜଳକଷ୍ଟ । ରାଉରକେଲା ପରେ ଢେଙ୍କାନାଳରେ ଝାଡ଼ାବାନ୍ତି ଆତଙ୍କ । ଦୂଷିତ ନଈ ପାଣି ପିଇ ୭୦ରୁ ଅଧିକ ଆକ୍ରାନ୍ତ । ଜଳ ପାଇଁ ରାଜରାସ୍ତାରେ ମହିଳାଙ୍କ ଆନ୍ଦୋଳନ । ଲୋକଙ୍କୁ ପିଇବା ପାଣି ମୁନ୍ଦେ ଦେବାରେ ବିଫଳ ୨୪ ବର୍ଷର ସରକାର । କୁଆଡ଼଼େ ଯାଉଛି ବସୁଧା, ଡ୍ରିଙ୍କ ଫ୍ରମ୍ ଟ୍ୟାପ୍ ନାଁରେ ଖର୍ଚ୍ଚ କୋଟି କୋଟି ଟଙ୍କା । କିନ୍ତୁ ସରକାର ପ୍ରଚାର କରୁଛନ୍ତି, ପ୍ରତି ଘରକୁ ପହଞ୍ଚିବ ବିଶୁଦ୍ଧ ପାନୀୟ ଜଳ, ଟ୍ୟାପରେ ପାଣି ଯୋଗାଇବେ ସରକାର । କିନ୍ତୁ ଢେଙ୍କାନାଳରେ ରାଜ୍ୟ ସରକାରଙ୍କ ଖୋଲି ଯାଇଛି ତମାମ ମିଛ ପ୍ରଚାରର ପୋଲ୍ । ଢେଙ୍କାନାଳ ଓଡ଼ାପଡ଼ା ବ୍ଲକ୍ ଖଗଡ଼ପ୍ରସାଦ ଗାଁରେ ଲୋକଙ୍କୁ ମିଳୁନି ପିଇବା ପାଣି । ବାଧ୍ୟ ହୋଇ ନଈ ପାଣି ପିଉଛନ୍ତି ଗାଁ ଲୋକେ । ଆଉ ଝାଡ଼ାବାନ୍ତିରେ ହେଉଛନ୍ତି ଆକ୍ରାନ୍ତ ।

ରୋଗଗ୍ରସ୍ତ ୭୦ରୁ ଅଧିକ ଲୋକଙ୍କୁ ଢେଙ୍କାନାଳ, ମେରାମଣ୍ଡଳି, ଅନୁଗୁଳ ଆଦି ହସ୍ପିଟାଲରେ ଭର୍ତ୍ତି କରାଯାଇଛି । ବଡ଼ କଥା ହେଲା, ଏ ଗାଁ ହେଉଛି ଢେଙ୍କାନାଳ ସଦରରୁ ବିଧାୟକ ସୁଧୀର ସାମଲଙ୍କ ଗାଁ । ନିଜ ଦଳର ୨୪ ବର୍ଷର ସ୍ଥିର ଶାସନ ପରେ ବି ବିଜେଡି ବିଧାୟକଙ୍କ ଗାଁ ଲୋକଙ୍କ ପାଖରେ ପହଞ୍ଚି ପାରିଲାନି ମୁନ୍ଦେ ଶୁଦ୍ଧ ପିଇବା ପାଣି । ଢେଙ୍କାନାଳରେ ନଈ ପାଣି ପିଉଛନ୍ତି ଲୋକେ, ଅନ୍ୟପଟେ ପାଣି ପାଇଁ ଗଞ୍ଜାମରେ ପାଣି ପାଇଁ ରାସ୍ତା ରୋକ କରିଛନ୍ତି ମହିଳା। ପୁରୁଷୋତ୍ତମପୁର ଭୁତସରସିଙ୍ଗି ପଞ୍ଚାୟତ ଦାସିଆମାରିପଲ୍ଲୀ ଗାଁରେ ପାଣି ପାଇଁ ଇଏ ମହିଳାଙ୍କ ଆନ୍ଦୋଳନ ।

ଅଧିକ ପଢନ୍ତୁ ଓଡ଼ିଶା ଖବର

ପାନୀୟ ଜଳର ସୁବିଧା କରିବାକୁ ଲୋକେ ଦୀର୍ଘ ଦିନ ହେଲା ଦାବି କରୁଛନ୍ତି। ସମାଧାନ ନ ହେବାରୁ ବାଧ୍ୟ ହୋଇ ସକାଳୁ ପୁରୁଷୋତ୍ତମପୁର- ଆସିକା ରାଜ୍ୟ ରାଜପଥରେ ହାଣ୍ଡି ମାଠିଆ ରଖି ରାସ୍ତା ଅବରୋଧ କରିଛନ୍ତି । ସେପଟେ ନୂଆପଡ଼ା ଜିଲ୍ଲା କୋମନା ବ୍ଲକ ଜଟଗଡ଼ ପଞ୍ଚାୟତ ବାବେଘାଟୀ ଗାଁରେ ପାଣି ପାଇଁ ହାହାକାର । ଗାଁରେ ୮ଟି ନଳକୂଅ ଥିବା ବେଳେ, ଗୋଟିଏ ଅଚଳ ହୋଇପଡ଼ିଛି । ଅନ୍ୟ ସବୁଥିରୁ ଫ୍ଲୋରାଇଡ୍ ପାଣି ବାହାରୁଛି । ଯାହାକୁ ପିଇ ରୋଗରେ ପଡୁଛନ୍ତି ଲୋକେ । ଗାଁରେ ପାଇପ୍ ବିଛା ଯାଇଛି ହେଲେ ଏଯାଏଁ ପାଣି ସଂଯୋଗ ହୋଇ ପାରିନାହିଁ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV