ଅର୍ଗସ ବ୍ୟୁରୋ : ପବିତ୍ର କାର୍ତ୍ତିକ ମାସ ପାଇଁ ସିଂହଦ୍ବାରରେ ଭକ୍ତଙ୍କର ଅସମ୍ଭବ ଭିଡ଼ । ଜଗାଦର୍ଶନ ପାଇଁ ବ୍ୟାରିକେଡ୍ ମଧ୍ୟରେ ଘଣ୍ଟା ଘଣ୍ଟା ଧରି ଅପେକ୍ଷା ଭକ୍ତଙ୍କ ପାଇଁ ସାଜିଛି ଯନ୍ତ୍ରଣାଦାୟକ । ଗୁରୁବାରଠାରୁ ପଞ୍ଚକ ଆରମ୍ଭ ହେଉଥିବାର ଭକ୍ତଙ୍କ ସଂଖ୍ୟା ଆହୁରି ବଢିବା ନିଶ୍ଚିତ । ତଥାପି ଶ୍ରୀମନ୍ଦିର ଚାରି ଦ୍ବାର ନଖୋଲିବା ଯିଦରେ ଅଟଳ ରାଜ୍ୟ ସରକାର । କାହିଁକି ସରକାରଙ୍କର ଏତେ ଯିଦ୍ ? ଭକ୍ତ ପଛେ ଯନ୍ତ୍ରଣା ଭୋଗନ୍ତୁ, ବୟସ୍କମାନେ ପଛେ ଦର୍ଶନରୁ ବଞ୍ଚିତ ହୁଅନ୍ତୁ ତଥାପି ଅନ୍ୟ ୩ ଦ୍ବାର ଖୋଲିବ ନାହିଁ । ଦ୍ବାର ଖୋଲିବା ପରିବର୍ତ୍ତେ ବୟସ୍କଙ୍କୁ ଶ୍ରୀମନ୍ଦିର ନଆସିବାକୁ ପରାମର୍ଶ ଦେବାଭଳି ବିଧର୍ମୀ କାର୍ଯ୍ୟ କରିବାକୁ ବି ପଛାଉନାହାନ୍ତି ମୁଖ୍ୟ ପ୍ରଶାସନ । ସେପଟେ ୪ ଦ୍ବାର ନଖୋଲି ପରିସ୍ଥିତି ଅଣାୟତ୍ତ ହେବ ବୋଲି ଚେତାଇ ଦେଇଛନ୍ତି ବରିଷ୍ଠ ସେବାୟତ ।

ଅଧିକ ପଢନ୍ତୁ ଓଡ଼ିଶା ଖବର

୨୦୧୯ରେ ଶ୍ରୀମନ୍ଦିର ଚାରିଦ୍ବାର ବନ୍ଦ କରି ଗୋଟିଏ ଦ୍ବାର ଖୋଲିବାକୁ ରାଜ୍ୟ କ୍ୟାବିନେଟ ନିଷ୍ପତ୍ତି ନେଇଥିଲା । ନିଷ୍ପତ୍ତିକୁ ପାଳନ କରିବାକୁ ୨୦୨୨ ଫେବୃଆରୀ ୩ ତାରିଖରେ ଶ୍ରୀମନ୍ଦିର ପ୍ରଶାସନକୁ ଚିଠି ଲେଖିଥିଲେ ରାଜ୍ୟ ସରକାର । ସେବେଠାରୁ କେବଳ ସିଂହ ଦ୍ବାର ଦେଇ ପ୍ରବେଶ ଓ ପ୍ରସ୍ଥାନ କରୁଛନ୍ତି ଭକ୍ତ । ନିକଟରେ ଭକ୍ତଙ୍କ ଯନ୍ତ୍ରଣା ଦେଖି କ୍ଷୋଭ ପ୍ରକାଶ କରିଥିଲେ ।

ଛତିଶଗଡ଼ ରାଜ୍ୟପାଳ ବିଶ୍ବଭୂଷଣ ହରିଚନ୍ଦନ । ଶାସନ ଓ ପ୍ରଶାସନ ଭକ୍ତଙ୍କ ଯନ୍ତ୍ରଣାକୁ ଅନୁଭବ କରିବା ଆବଶ୍ୟକ ବୋଲି ରଖିଥିଲେ ପ୍ରତିକ୍ରିୟା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ନକଟରେ ଜଗାଦର୍ଶନ ପାଇଁ ଯାଇଥିବା ବେଳେ ଭକ୍ତଙ୍କର ସୁବିଧାରେ ଦର୍ଶନ ଉପରେ ଗୁରୁତ୍ବ ଦେଇଥିଲେ । ହେଲେ ଏହାର କୌଣସି ପ୍ରଭାବ ରାଜ୍ୟ ସରକାରଙ୍କ ଉପରେ ନାହିଁ । ରାଜ୍ୟ ସରକାରଙ୍କର ଏହି ଜିଦଖୋର ମନୋଭାକୁ ନେଇ ଭକ୍ତମାନେ ବି ଖପ୍ପା ।

ଚାରି ଦ୍ବାର ଖୋଲିବା ସମ୍ପର୍କରେ ନିଷ୍ପତ୍ତି ନେବା ପରିବର୍ତ୍ତେ ମାର୍କେଟ ଛକ ଯାଏ ବ୍ୟାରିକେଡ୍ ସମ୍ପ୍ରସାରଣ କରି ନିଜ କାମ ସାରିଦେଇଛି ଶ୍ରୀମନ୍ଦିର ପ୍ରଶାସନ । ଏହା କୌଣସି ଦୃଷ୍ଟିରୁ ବି ଭକ୍ତଙ୍କ ଯନ୍ତ୍ରଣା ଉପଶମ କରିପାରିନାହିଁ । ରଜ୍ୟ ସରକାରଙ୍କ ଏଭଳି ଆଭିମୁଖ୍ୟ ଜଗନ୍ନାଥ ସଂସ୍କୃତି ବିରୋଧୀ ନୁହେଁକି ? ଏହି ଜିଦ୍ ଖୋର ମନୋଭାବ ବିରୋଧରେ ଜଗନ୍ନାଥପ୍ରେମୀଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV