ଅର୍ଗସ ବ୍ୟୁରୋ : ରାଜ୍ୟରେ ଚାଲିଛି ଭେଟନାରୀ ଡାକ୍ତରଙ୍କ କାର୍ଯ୍ୟବନ୍ଦ ଆନ୍ଦୋଳନ । ଚିକିତ୍ସା ଅଭାବରୁ ମୃତ୍ୟୁ ମୁଖରେ ପଡୁଛନ୍ତି ଗୃହପାଳିତ ପଶୁପକ୍ଷୀ । ଗତ ଶୁକ୍ରବାର ଏକ ଅଟୋରେ ମଲା କୁକୁଡ଼ା ଆଣି ଜିଲ୍ଲାପାଳଙ୍କ କାର୍ଯ୍ୟାଳୟରେ ଫିଙ୍ଗିଲେ ଚାଷୀ । ଦିନ ପରେ ଦିନ କ୍ଷତି ସହି ଅତିଷ୍ଠ ହୋଇ ପଡିଲେଣି ଫାର୍ମ ମାଲିକ । ଏଭଳି ଘଟଣା ଦେଖିବାକୁ ମିଳିଛି ରାସଗୋବିନ୍ଦପୁର ବ୍ଲକ ପୂର୍ଣ୍ଣଚନ୍ଦ୍ରପୁରର ଚାଷୀ ଉମେଶ ଜେନା ଫାର୍ମରେ । ୧୦ହଜାର ବ୍ରଏଲର କୁକୁଡାର ଫାର୍ମ କରିଛନ୍ତି । 

ହେଲେ ଚିକିତ୍ସା ଓ ଔଷଧ ନପାଇ ଗତ ୪ ଦିନ ହେଲାଣି ଦୈନିକ ୧୫୦ ରୁ ୨୦୦ କୁକୁଡା ମରିବାରେ ଲାଗିଛନ୍ତି । କ୍ଷତି ସହି ନପାରି ଆଜି ପ୍ରାୟ ୨୦୦ ମୃତ କୁକୁଡା ଆଣି ଜିଲ୍ଲାପାଳଙ୍କ ଅଫିସ ପିଣ୍ଡାରେ ଫିଙ୍ଗି ଗଦା କରିଦେଇଛନ୍ତି । ଚିକିତ୍ସା ସହିତ କ୍ଷତିପୂରଣ ବ୍ୟବସ୍ଥା ନହେବା ଯାଏଁ ସେମିତି ରହିବ ବୋଲି କହିଛନ୍ତି ଉକ୍ତ ଫାର୍ମର କର୍ମଚାରୀ । କେବଳ ଫାର୍ମ ମାଲିକ ନୁହେଁ, ଛେଳି, କୁକୁଡା ଓ ଗାଈ ଫାର୍ମ କରିଥିବା ଜିଲ୍ଲାର ଅନେକ ସ୍ୱୟଂସହାୟକ ଗୋଷ୍ଠିର ମହିଳା ମାନେ ମଧ୍ୟ ସମାନ ଦାବିରେ ଆସି ଜିଲ୍ଲାପାଳଙ୍କ କାର୍ଯ୍ୟାଳୟରେ ପହିଞ୍ଚି ଥିଲେ । 

ଅଧିକ ପଢନ୍ତୁ ଓଡ଼ିଶା ଖବର

ଫାର୍ମର ସବସିଡି ସହିତ ଚିକିତ୍ସାସେବା ନପାଇ ସେମାନେ ମଧ୍ୟ ଏଭଳି କ୍ଷତି ସହୁଥିବା ନେଇ ଅଭିଯୋଗ କରିଛନ୍ତି । ତେବେ କାର୍ଯ୍ୟାଳୟରେ ଜିଲ୍ଲାପାଳ ଅନୁପସ୍ଥିତ ରହିଥିବା କାରଣରୁ ଅତିରିକ୍ତ ଜିଲ୍ଲାପାଳ ଏଭଳି ଅଭାବନୀୟ ପରିସ୍ଥିତି ଦେଖି ଅପ୍ରସ୍ତୁତ ହୋଇ ପଡିଥିଲେ । ତୁରନ୍ତ ବାହାରକୁ ଆସି ସବୁ ଘଟଣା ବୁଝାସୁଝା କରିବା ସହିତ ବିଭାଗୀୟ ଅଧିକାରୀଙ୍କୁ ଖବର ଦେଇଥିଲେ । ଏବଂ ଏନେଇ ଧାରଣାରତ ପ୍ରାଣୀ ଚିକିତ୍ସକଙ୍କ ସହିତ ଆଲୋଚନା କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଅତିରିକ୍ତ ଜିଲ୍ଲାପାଳ ।