Kalahandi Honour Killing / ଭିନ୍ନ ଜାତି ବୋଲି ମାରିଦେଲେ ! ପ୍ରେମୀଯୁଗଳଙ୍କ ଝୁଲନ୍ତା ମୃତଦେହ ଉଦ୍ଧାର, ବନ୍ଧା ହୋଇଛି ହାତ

କଳାହାଣ୍ଡି: ଭିନ୍ନ ଜାତିର ହୋଇଥିବାରୁ ମାରିଦେଲେ କି ? ଧର୍ମଗଡରେ ପ୍ରେମୀ ଯୁଗଳଙ୍କ ଝୁଲନ୍ତା ମୃତଦେହ ଉଦ୍ଧାର ପରେ ବଢୁଛି ସସପେନ୍ସ । ସେମାନଙ୍କୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି । ପାଞ୍ଚ ଦିନ ତଳେ ନିଖୋଜ ଥିବା ପ୍ରେମୀ ଯୁଗଳଙ୍କ ମୃତଦେହ ବେହେରା ସ୍ଥିତ ଭଣ୍ଡାର ଡଙ୍ଗରି ଶୀର୍ଷରୁ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଥିଲା । ଉଭୟଙ୍କ ମୃତ୍ୟୁକୁ ନେଇ ହତ୍ୟା ସନ୍ଦେହ ପ୍ରକାଶ ପାଇଥିବା ବେଳେ ଘଟଣାସ୍ଥଳରେ ଉତ୍ତେଜନା ଦେଖାଦେଇଛି ।

• ୫ ଦିନ ତଳେ ନିଖୋଜ ଥିଲେ

କୋକସରା ଥାନା ଟେଣ୍ଡାପାଲି ଗ୍ରାମର ପ୍ରହ୍ଲାଦ ନାଏକଙ୍କ ପୁଅ ଅଜିତ କୁମାର ନାଏକ ଏବଂ ଧର୍ମଗଡ଼ ସହରର କେନ୍ଦୁମୁଡ଼ିପଡ଼ାର ଜଣେ ଯୁବତୀଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା । ଉଭୟ ଭିନ୍ନ ଜାତିର ହୋଇଥିବାରୁ ସେମାନଙ୍କ ସମ୍ପର୍କକୁ ନେଇ ପରିବାର ମଧ୍ୟରେ ଅସହମତି ରହିଥିବା ଜଣାପଡ଼ିଛି । ଗତ ୧୭ ତାରିଖ ରାତିରୁ ଉଭୟ ନିଖୋଜ ହୋଇଯାଇଥିଲେ । ଏନେଇ ଉଭୟଙ୍କ ପରିବାର ପକ୍ଷରୁ କୋକସରା ଓ ଧର୍ମଗଡ଼ ଥାନାରେ ନିଖୋଜ ଅଭିଯୋଗ କରାଯାଇଥିଲା ।

• ମିଳିଲା ଗଳିତ ମୃତଦେହ

ମୃତଦେହ ଦୁଇଟି ପଚିଯାଇଥିବା ବେଳେ ପରିବାର ଲୋକେ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଚିହ୍ନଟ କରିଥିଲେ । ମୃତକଙ୍କ ଶରୀରରେ ରକ୍ତର ଚିହ୍ନ ଥିବା ଏବଂ ଉଭୟଙ୍କ ହାତ ପଛପଟେ ବନ୍ଧା ହୋଇଥିବା ନେଇ ଆଲୋଚନା ହେଉଥିବାରୁ ଏହାକୁ ନେଇ ସସପେନ୍ସ ରହିଛି । ମୃତ୍ୟୁର ପ୍ରକୃତ କାରଣ ଏବଂ ଏହା ପଛରେ କାହାର ସମ୍ପୃକ୍ତି ରହିଛି, ତାହା ପୋଲିସ ତଦନ୍ତ ପରେ ସ୍ପଷ୍ଟ ହେବ । ଝିଅ ଘର ଲୋକ ହତ୍ୟା କରିଥିବା ସଙ୍ଗୀନ ଅଭିଯୋଗ ଆଣିଲେ ପୁଅ ଘର ପରିବାର ଲୋକେ ।

ପଢନ୍ତୁ ଏହି ଖବର: ପ୍ରଥମେ ଧକ୍କା ଦେଲେ; ୱିଣ୍ଡସିଲ୍ଡରେ ହାତ ଫସାଇ ମାରିଦେଲେ

• ପୁଅ ଘରକୁ ମିଳିଥିଲା ଧମକ

ମୃତ ଯୁବକ ଅଜିତଙ୍କ ମାମୁଁ ମଧୁସୂଦନ ନାଏକ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ କିଛି ଦିନ ପୂର୍ବରୁ ଦୁଇ ଜଣ ଯୁବକ ଆସି ମୃତ ଅଜିତଙ୍କ ବାପା ପ୍ରହ୍ଲାଦଙ୍କୁ ଘରୁ ଉଠାଇନେବାକୁ ଉଦ୍ୟମ କରିଥିଲେ । ନିଜକୁ ପୋଲିସର ପରିଚୟ ଦେଇ ସାଙ୍ଗରେ ଯିବାକୁ କହିଥିଲେ । ମାତ୍ର କୌଣସି ପ୍ରମାଣ ନଦେଖାଇପାରିବାରୁ ପ୍ରହ୍ଲାଦ ତାଙ୍କ ସହ ଯାଇ ନଥିଲେ । ଏହାପରେ ତାଙ୍କୁ ଏକ ଫୋନକଲ୍ ଆସିଥିଲା । ସେହି ଦୁଇ ଜଣ ଯୁବକ ତାଙ୍କର ଅସଲ ଉଦ୍ଦେଶ୍ୟ ପ୍ରହ୍ଲାଦଙ୍କୁ କହିଥିଲେ । ଯଦି ସାଙ୍ଗରେ ଆସିଥାନ୍ତେ, ତେବେ ତାଙ୍କୁ କିଡନାପ୍ କରିଥାନ୍ତେ ବୋଲି କହିଥିଲେ । ତେବେ ସେହି ଦୁଇ ଜଣ ଯୁବକ ମୃତ ଯୁବତୀଙ୍କ ମାମୁଁ ଓ ଅନ୍ୟ ଜଣେ ସମ୍ପର୍କୀୟ ବୋଲି ଅଜିତଙ୍କ ମାମୁଁ କହିଛନ୍ତି । ଉଭୟଙ୍କ ଜାତି ଅଲଗା ଥିବାରୁ ସେମାନେ ହତ୍ୟା କରିଛନ୍ତି ବୋଲି ଯୁବକଙ୍କ ପରିବାର ଲୋକେ ଅଭିଯୋଗ କରିଛନ୍ତି । ତୁରନ୍ତ ଦୁଇ ଯୁବକଙ୍କୁ ଧରି ଫାଶୀଦଣ୍ଡ ଦିଆଯାଉ ବୋଲି ଯୁବକଙ୍କ ପରିବାର ଲୋକେ ଦାବି କରିଛନ୍ତି ।