୭୬ ବର୍ଷ ବୟସରେ ବରିଷ୍ଠ ସାମ୍ବାଦିକ ଅରୁଣ କୁମାର ପଣ୍ଡାଙ୍କ ପରଲୋକ
ଅର୍ଗସ ବ୍ୟୁରୋ : ଆରପାରିରେ ବରିଷ୍ଠ ସାମ୍ବାଦିକ ତଥା ସ୍ତମ୍ଭକାର ଅରୁଣ କୁମାର ପଣ୍ଡା । ୭୬ ବର୍ଷ ବୟସରେ ତାଙ୍କର ପରଲୋକ ଘଟିଛି । କଟକ ସିଡିଏ ସେକ୍ଟର ୬ ସ୍ଥିତ ବାସ ଭବନରେ ତାଙ୍କର ଏହି ପରଲୋକ ଘଟିଛି । ସେ ଗତ ୨ ମାସ ହେବ ଅସୁସ୍ଥତା କାରଣରୁ ଚିକିତ୍ସିତ ହେଉଥିଲେ । ତାଙ୍କର ଓପନ ହାର୍ଟ ସର୍ଜରୀ ମଧ୍ୟ ହୋଇଥିଲା । ତେବେ ଆଜି ତାଙ୍କର ପରଲୋକ ଘଟିଥିବା ବେଳେ ସାମ୍ବାଦିକତା ଜଗତ ପାଇଁ ଅପୂରଣୀୟ କ୍ଷତି ହୋଇଛି ।
ସେ ଜଣେ ନିର୍ଭିକ ସାମ୍ବାଦିକ ଭାବରେ ବେଶ୍ ପରିଚିତ ଥିଲେ । କଟକ ସମେତ ସେ ରାଜ୍ୟର ବିଭିନ୍ନ ଜିଲ୍ଲାରେ ଅଗ୍ରଣୀ ଖବରକାଗଜର ସ୍ବତନ୍ତ୍ର ପ୍ରତିନିଧି ଭାବେ କାର୍ଯ୍ୟ କରିଥିଲେ । ସେ ଜଣେ ସାମ୍ବାଦିକ ହେବା ସହିତ ଜଣେ ସୁବକ୍ତା ଓ ଲେଖକ ଭାବରେ ବେଶ ଜଣାଶୁଣା ଥିଲେ । ସେ ଅନେକ ପୁସ୍ତକର ରଚୟିତା ମଧ୍ୟ ଥିଲେ । ଆଜି ତାଙ୍କ ବିୟୋଗରେ ସମଗ୍ର ସାମ୍ବାଦିକତା, ସାହିତ୍ୟିକ ତଥା ବୁଦ୍ଧିଜୀବୀ ମାହୋଲରେ ଶୋକର ଛାୟା ଖେଳିଯାଇଛି ।
ଅଧିକ ପଢନ୍ତୁ ଓଡ଼ିଶା ଖବର
ତାଙ୍କ ପରଲୋକ ଖବର ପାଇ ବହୁ ରାଜନେତା, ପ୍ରଶାସନିକ ଅଧିକାରୀ, ସାମ୍ବାଦିକ , ସାହିତ୍ୟକ ପ୍ରମୁଖ ତାଙ୍କ ବାସ ଭବନ ପହଞ୍ଚି ତାଙ୍କୁ ଶ୍ରଦ୍ଧାଞ୍ଜଳୀ ଜ୍ଞାପନ କରିଛନ୍ତି । ସତୀ ଚୌରା ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ ବୋଲି ପରିବାର ବର୍ଗଙ୍କ ପକ୍ଷରୁ ସୂଚନା ମିଳିଛି ।
