ରାସ୍ତାର ଗୋଟିଏ ପାର୍ଶ୍ଵରେ ରଥଖଳା ଓ ଅନ୍ୟପଟେ ଲୋକଙ୍କ ଠେଲାପେଲା । ଭିଡ଼ ଭିତରୁ ହାତରେ ପୁଳା ପୁଳା ଖଜା ଧରି ହସି ହସି ବାହାରୁଥିଲେ ଲୋକେ । ସମସ୍ତେ ସେହି ଭିଡ଼ ଭିତରକୁ ମାଡ଼ି ଯାଉଥିଲେ । ଆଉ ଦୁଇ ହାତ ପୂର୍ଣ୍ଣ କରି ଖଜା ନେଇଆସୁଥିଲେ । କେହି କିଛି ବୁଝିବା ଆଗରୁ ଖଜାରେ ପୂରିଥିବା ହଣ୍ଡାଟି ହଠାତ୍ ଖାଲି ହୋଇଗଲା । ଆଜି ପୁରୀ ବଡ଼ଦାଣ୍ଡରେ ଦେଖିବାକୁ ମିଳିଛି କିଛି ଏପରି ଦୃଶ୍ୟ । ଯାହାର ଭିଡିଓ ଏବେ ନିଆଁ ପରି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

• କ୍ଷଣିକରେ ଖାଲି ହୋଇଗଲା ଖଜା

ପୁରୀ ବଡ଼ଦାଣ୍ଡରେ କ୍ଷଣିକରେ ଖାଲି ହୋଇଗଲା ଖଜା । ଦୋକାନୀଙ୍କୁ ପୋଲିସ ଉଠାଇ ନେବା ପରେ ମାଗଣାରେ ଖଜା ବୋହି ନେଲେ ଲୋକେ । ନିୟମ ଉଲ୍ଲଙ୍ଘନ କରୁଥିବା ଖଜା ବ୍ୟବସାୟୀଙ୍କ ଉପରେ ପୋଲିସ ନିରନ୍ତର ଚଢାଉ କରିଥିଲା । ତେବେ ଗୁରୁବାର ଅପରାହ୍ନରେ ରାସ୍ତାପାର୍ଶ୍ୱରେ ବସୁଥିବା ଉଠାଦୋକାନୀଙ୍କ ଉପରେ ପ୍ରଶାସନର ଏନ୍‌ଫୋର୍ସମେଣ୍ଟ ଟିମ୍‌ ଚଢାଉ କରି ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଅମାନିଆ ଖଜା ଦୋକାନୀଙ୍କୁ ପୋଲିସ ଉଠାଇ ନେବାପରେ ମାଲିକ ବିହୀନ ଖଜା ଭର୍ତ୍ତି ହଣ୍ଡା ଦେଖି ସେଠାକୁ ଧାଇଁଥିଲେ ଶ୍ରଦ୍ଧାଳୁ । ଆଉ କିଛି କ୍ଷଣ ମଧ୍ୟରେ ପୁରା ହଣ୍ଡାକୁ ଖାଲି କରିଦେଇଥିଲେ ।

ପଢନ୍ତୁ ଏହି ଖବର: ରାଜ୍ୟ ଭିତରେ ଏବଂ ବାହାରେ ଥିବା ମହାପ୍ରଭୁଙ୍କ ଜମିକୁ ଅଧୀନକୁ ନେବେ ସରକାର

• ଭିଡିଓ ଖୁବ୍ ଭାଇରାଲ

ସମୁଦ୍ର ପରି ଖଜା ହଣ୍ଡା ନିକଟକୁ ଲୋକେ ମାଡ଼ି ଯାଇ ଠେଲାପେଲା ଭିତରେ ଯିଏ ଯେତେ ପାରିଲା ବୋହି ନେଇଥିଲା ଖଜା । କିଏ ବ୍ୟାଗରେ ଭର୍ତ୍ତି କରୁଥିଲା ତ ଆଉ କିଏ ହାତରେ ଧରି ନେଇଯାଉଥିଲା । ଅନ୍ୟପଟେ ସେଠାରେ ଥିବା କିଛି ଶ୍ରଦ୍ଧାଳୁ ଦର୍ଶକ ସାଜିଥିଲେ ଓ ନିଜ ମୋବାଇଲ ଫୋନରେ ଏହି ବିରଳ ଦୃଶ୍ୟକୁ କଏଦ କରିଥିଲେ । ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାପରେ ଲୋକେ ମିଶ୍ରିତ ପ୍ରତିକ୍ରିୟା ଦେଇଛନ୍ତି । ଖଜା ବିକ୍ରି କରି ପରିବାର ପ୍ରତିପୋଷଣ କରୁଥିବା ଦୋକାନୀଟି କ୍ଷତି ସହିଥିବା କିଛି ଲୋକେ କହିଛନ୍ତି । ଅନ୍ୟ କିଛି ୟୁଜର ଏପରି ଭାବରେ ଖଜା ଲୁଟକୁ ତୀବ୍ର ବିରୋଧ କରିଛନ୍ତି ।

ନିକଟରେ ପୁରୀ ଏସପି ଭିନୀତ ଅଗ୍ରୱାଲ୍ ଖଜା ବ୍ୟବସାୟୀଙ୍କୁ ୱାର୍ଣ୍ଣଂ ଦେଇଥିଲେ । କୌଣସି ବ୍ୟକ୍ତିଙ୍କୁ ଓଜନ କିମ୍ବା ଗୁଣବତ୍ତାରେ ନ ଠକିବାକୁ ଅନୁରୋଧ କରିଥିଲେ ଏସପି । ଏହାସହିତ ବେଆଇନ ଭାବରେ ବଡ଼ଦାଣ୍ଡ ନୋ ଭେଣ୍ଡିଂ ଜୋନରେ ବିକୁଥିବା ସମସ୍ତ ଉଠା ଦୋକାନୀଙ୍କୁ ଉଚ୍ଛେଦ କରାଯାଇଥିବାବେଳେ ଆବଶ୍ୟକ ପଡ଼ିଲେ ଆକ୍ସନ ମଧ୍ୟ ନିଆଯିବ ବୋଲି କୁହାଯାଇଥିଲା ।