ବାଂଲାଦେଶ ଅସ୍ଥିରତା ପରେ କିଏ ହେବେ ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ। ପ୍ରଧାନମନ୍ତ୍ରୀ ପଦ ଓ ଦେଶ ଛାଡ଼ିବା ପରେ କିଏ ନେବେ ଦେଶର ମଧ୍ୟବର୍ତ୍ତିକାଳୀନ ସରକାରର ଦାୟିତ୍ବ। କାହା ହାତରେ ନ୍ୟସ୍ତ ହେବ ଦେଶର ଶାସନ ଭାର। ଏମିତି ପ୍ରଶ୍ନ ଏବେ ଉଙ୍କି ମାରୁଥିବା ବେଳେ ସାମ୍ନାକୁ ଆସୁଛି ଅନେକ ନେତାଙ୍କ ନାଁ।

ହେଲେ ସବୁ ନାଁ ଭିତରେ ଅଧିକ ଚର୍ଚ୍ଚାରେ ଅଛନ୍ତି ଖାଲିଦା ଜିୟାଙ୍କ ବଡ଼ ପୁଅ ତାରିକ୍ ରେହମାନ। ସେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (ବିଏନପି)ର କାର୍ଯ୍ୟକାରୀ ଅଧ୍ୟକ୍ଷ ଅଛନ୍ତି। ସେହିପରି ଶେଖ ହସିନାଙ୍କ ବଡ଼ ପୁଅ ସଜିବ ୱାଜେଦଙ୍କ ନାଁକୁ ନେଇ ବି କଳ୍ପନାଜଳ୍ପନା ହେଉଛି। ସେ ବିଦେଶରୁ ତାଙ୍କ ପ୍ରଶାସନକୁ ସମର୍ଥନ କରନ୍ତି। ଜଣେ ଡିଜିଟାଲ ପରାମର୍ଶଦାତା ଭାବରେ ଦେଶରେ ଇଣ୍ଟରନେଟ ସେବାକୁ ଆଗକୁ ବଢ଼ାଇବାରେ ତାଙ୍କର ପ୍ରମୁଖ ଭୂମିକା ରହିଛି।

ଏହାସହ ପଢ଼ନ୍ତୁ:- ଆଫଗାନିସ୍ତାନ ମାଡ଼ରେ ବେହାଲ ହେଲାଣି ପାକିସ୍ତାନ ସେନା !

ତେବେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP)ର କାର୍ଯ୍ୟକାରୀ ସଭାପତି ତାରିକ ରହମାନ, ୧୭ ବର୍ଷର ସ୍ୱ-ନିର୍ବାସନ ଶେଷ କରି ଶୀଘ୍ର ବାଂଲାଦେଶ ଫେରିବା ନେଇ ସଙ୍କେତ ଦେଇଛନ୍ତି। ରହମାନ ପ୍ରଧାନମନ୍ତ୍ରୀ ହେବାର ତାଙ୍କର ଦୀର୍ଘଦିନର ସ୍ୱପ୍ନ ପୂରଣ କରିବା ପାଇଁ ଫେବୃଆରୀରେ ହେବାକୁ ଥିବା ବାଂଲାଦେଶ ସାଧାରଣ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବାକୁ ଯୋଜନା କରୁଛନ୍ତି। ଗତ ୧୭ ବର୍ଷ ଧରି ଲଣ୍ଡନରେ ରହୁଥିବା BNP ନେତା ଏହି ସପ୍ତାହରେ BBC ବଙ୍ଗଳାକୁ ଏକ ସାକ୍ଷାତକାର ଦେଇଥିଲେ। ଏଥିରେ ରହମାନ କହିଛନ୍ତି, "କିଛି ବୈଧ କାରଣ ଯୋଗୁଁ ମୋର ପ୍ରତ୍ୟାବର୍ତ୍ତନ ବିଳମ୍ବ ହୋଇଛି, କିନ୍ତୁ ଏବେ ସମୟ ଆସିଛି ଏବଂ ଇନଶାଆଲ୍ଲାହ, ମୁଁ ଶୀଘ୍ର ଫେରିବି।" ସେ ଏହା ମଧ୍ୟ କହିଛନ୍ତି ଯେ, ଆଗାମୀ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବେ।

ପାକିସ୍ତାନର ISI ସହିତ ରହମାନଙ୍କ ସମ୍ପର୍କ
ଆସନ୍ତା ନିର୍ବାଚନରେ BNP ସରକାର ଗଠନ କଲେ ରେହମାନ ତାରିକ୍ ପ୍ରଧାନମନ୍ତ୍ରୀ ହେବେ କି ବୋଲି ପଚରାଯିବାରୁ ସେ କହିଛନ୍ତି, 'ଏହା ଲୋକଙ୍କ ନିଷ୍ପତ୍ତି ହେବ।' ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଖାଲିଦା ଜିଆ ଏବଂ ଜେନେରାଲ ଜିଆ-ଉର-ରହମାନଙ୍କ ବଡ଼ ପୁଅ ହେଉଛନ୍ତି ତାରିକ୍ ରହମାନ । ଯାହାଙ୍କର ଏକ କଳୁଷିତ ଇତିହାସ ରହିଛି। ପାକିସ୍ତାନର ଗୁଇନ୍ଦା ସଂସ୍ଥା ତଥା ବାଂଲାଦେଶର ଶତ୍ରୁ ISI ସହିତ ରେହମାନ ତାରିକ୍‌ଙ୍କ ସମ୍ପର୍କ ରହିଥିବାର ଅଭିଯୋଗ ରହିଛି। କୁହାଯାଏ ଯେ ସେ ୨୦୦୧ ରୁ ୨୦୦୬ ପର୍ଯ୍ୟନ୍ତ ISI ସହିତ ସମ୍ପର୍କ ବଜାୟ ରଖିଥିଲେ, ଯେତେବେଳେ ତାଙ୍କ ମାଆ ପ୍ରଧାନମନ୍ତ୍ରୀ ଥିଲେ। ସେହି ସମୟରେ ରହମାନ ହିଁ ପାଓ୍ୱାର ସେଣ୍ଟର ଥିଲେ।

୨୦୨୩ ମସିହାରେ, ବାଂଲାଦେଶର ଏକ କୋର୍ଟ ରହମାନଙ୍କୁ ଏକ ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ କରି ତାଙ୍କୁ ନଅ ବର୍ଷ ଜେଲ ଦଣ୍ଡାଦେଶ ଦେଇଥିଲେ। ୨୦୦୭ ମସିହାରେ ତାଙ୍କ ବିରୁଦ୍ଧରେ ମାମଲା ରୁଜୁ ହୋଇଥିଲା, ଯେତେବେଳେ ଏକ କାମଚଳା ସରକାର କ୍ଷମତାରେ ଥିଲା। ଗତ ବର୍ଷ ଜୁଲାଇ ମାସରେ, ଛାତ୍ର ଆନ୍ଦୋଳନ ସମୟରେ, ଶେଖ ହାସିନାଙ୍କୁ କ୍ଷମତାରୁ ହଟାଇବା ପାଇଁ ରେହମାନ ବିବୃତ୍ତି ଦେଇଥିଲେ। ରେହମାନ ସୋସିଆଲ ମିଡିଆ ପ୍ଲାଟଫର୍ମ X ରେ ଲେଖିଥିଲେ, "ତାନାଶାହୀ ହସିନା, ତାଙ୍କର ଛାତ୍ର ଓ୍ୱିଙ୍ଗର ଗୁଣ୍ଡା ଏବଂ ପୋଲିସ ହତ୍ୟା କରୁଛନ୍ତି । ବଳପୂର୍ବକ ଲୋକଙ୍କୁ ଗାୟବ କରୁଛନ୍ତି ଏବଂ ଶହ ଶହ ଲୋକଙ୍କୁ ଲକ୍ଷ୍ୟ କରି ବିନା କାରଣରେ ଗିରଫ କରୁଛନ୍ତି।"

ଏହାସହ ପଢ଼ନ୍ତୁ:- ଖୁସି ଖବର, PF ଆକାଉଣ୍ଟରୁ ଉଠାଇ ପାରିବେ ୧୦୦% ପାଣ୍ଠି !

ଶେଖ ହାସିନାଙ୍କ ପ୍ରସ୍ଥାନ ପରେ ପ୍ରତ୍ୟାବର୍ତ୍ତନ
୫ ଅଗଷ୍ଟ ୨୦୨୪ ରେ, ବାଂଲାଦେଶରେ ହିଂସାତ୍ମକ ଆନ୍ଦୋଳନ ପରେ, ଶେଖ ହାସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଦେଶ ଛାଡି ପଳାଇଗଲେ। ଶେଖ ହାସିନାଙ୍କ ଇସ୍ତଫାର ପ୍ରାୟ ଚାରି ମାସ ପରେ, ବାଂଲାଦେଶ ହାଇକୋର୍ଟ ୨୦୦୪ ଗ୍ରେନେଡ୍ ଆକ୍ରମଣ ମାମଲାରେ ତାରିକ ରହମାନ ସମେତ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଥିଲେ। ସେହି ବର୍ଷ ସେପ୍ଟେମ୍ବରରେ, ବାଂଲାଦେଶ ସୁପ୍ରିମକୋର୍ଟ ହାଇକୋର୍ଟଙ୍କ ନିଷ୍ପତ୍ତିକୁ ବଜାୟ ରଖିଥିଲେ।

ଅନ୍ୟପଟେ ନୋବେଲ ବିଜେତା ମହମ୍ମଦ ୟୁନୁସଙ୍କୁ ମଧ୍ୟବର୍ତ୍ତୀକାଳିନ ସରକାରର ନେତୃତ୍ବ ନେବାକୁ ପ୍ରସ୍ତାବ ଦେଇଛି ସରକାର ବିରୋଧୀ ଛାତ୍ର ସଂଗଠନ । ତେବେ ଦେଶର ପୂର୍ବତନ ପ୍ରଧାନମନ୍ତ୍ରୀ ଖାଲିଦା ଜିୟାଙ୍କ ନାଁ ମଧ୍ୟ ସାମ୍ନାକୁ ଆସିଛି। ହାସିନା ଦେଶ ଛାଡ଼ିବା ପରେ ଖଲିଦା ଜିୟାଙ୍କୁ ଜେଲରୁ ମୁକ୍ତି ଆଦେଶ ଦେଇଛନ୍ତି ରାଷ୍ଟ୍ରପତି। ୧୯୯୧ରେ ବାଂଲାଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ହୋଇଥିଲେ ଖାଲିଦା। ୨୦୧୮ରେ ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହେବା ପରେ ତାଙ୍କୁ ଜେଲ୍ ଦଣ୍ଡାଦେଶ ଦିଆଯାଇଥିଲା। ୨୦୦୧ରୁ ୨୦୦୬ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଭାବରେ କାର୍ଯ୍ୟ ତୁଲାଇଥିଲେ ଖାଲିଦା ଜିୟା।