Zero Fatality Week / ସାମାନ୍ୟ ଭୁଲ୍‌ କଲେ ସିଧା କଟିବ ଫାଇନ୍; ରାଜ୍ୟରେ ଚାଲିଛି 'ଶୂନ ମୃତ୍ୟୁ ସପ୍ତାହ'

ଭୁବନେଶ୍ଵର: ବିନା ହେଲମେଟ, ବିନା ବୀମା, ଓଭର ରାଇଡିଂ କିମ୍ବା ରଙ୍ଗ୍ ସାଇଡ୍ ଡ୍ରାଇଭିଂ । ସାମାନ୍ୟ ନିୟମ ଭାଙ୍ଗିଲେ ଆଉ ଗାଡି ଚାଳକଙ୍କୁ ତ୍ରାହି ନାହିଁ । ଗୋଟିଏ ପଟେ PUCC ଫାଇନର ମୂଲ୍ୟ ସରକାର କମାଇ ଦେଇଥିବା ବେଳେ ଅନ୍ୟ ଟ୍ରାଫିକ ନିୟମ ଉଲ୍ଲଙ୍ଘନ ପାଇଁ ଆରମ୍ଭ ହୋଇଛି କଡାକଡ଼ି ଚେକିଂ । ରାଜ୍ୟର ବିଭିନ୍ନ ସ୍ଥାନରେ ପରିବହନ ବିଭାଗ ପକ୍ଷରୁ ଗାଡ଼ିଗୁଡିକ ଯାଞ୍ଚ କରାଯାଇ ଇ-ଚାଲାଣ କଟାଯାଉଛି । ବୀମା ନ ଥାଇ ଦୁର୍ଘଟଣା ଘଟାଉଥିବା ଗାଡ଼ିଗୁଡିକ ଉପରେ ଅଧିକ ନଜର ରଖାଯାଇଥିବା କହିଛନ୍ତି ପରିବହନ ମନ୍ତ୍ରୀ ବିଭୂତି ଜେନା ।

• ପ୍ରଥମ ଦିନରେ କଟିଲା ୪୪ ହଜାର ଇ-ଚାଲାଣ

ତଥ୍ୟ କହୁଛି ସେପ୍ଟେମ୍ବର ୧ ତାରିଖରୁ ଆରମ୍ଭ ହୋଇଥିବା ଶୂନ ମୃତ୍ୟୁ ସପ୍ତାହର ପ୍ରଥମ ଦିନରେ ୪୪ ହଜାର ୭ ଶହ ୪୬ଟି ଇ-ଚାଲାଣ କଟିଛି । ଯେଉଁଥିରୁ ବିନା ହେଲମେଟ୍ ପାଇଁ ୨୫ ହଜାର ୨୮୨ ଏବଂ ଦ୍ରୁତଗତି ପାଇଁ ୪ ହଜାର ୧୬୦, ଟ୍ରିପଲ୍ ରାଇଡିଂ ପାଇଁ ଏକ ହଜାର ୩୮୩ ଏବଂ ବୈଧ ବୀମା ନଥାଇ ଗାଡ଼ି ଚଲାଇବା ଯୋଗୁଁ ୧୨୧୬ ଗାଡ଼ି ବିରୋଧରେ ଇ-ଚାଲାଣ ଜାରି ହୋଇଛି । ଝାରସୁଗୁଡା ଆରଟିଓ ଗୋଟିଏ ଦିନରେ ସର୍ବାଧିକ ୫୭୧ଟି ଚାଲାଣ କଟାଯାଇଛି ।

• ଦ୍ଵିତୀୟ ଦିନରେ କଟିଲା ୬୦ହଜାର ଇ-ଚାଲାଣ

ସେହିପରି ସେପ୍ଟେମ୍ବର ୨ ତାରିଖରେ ୬୦ ହଜାର ୨୪୨ ଚାଲାଣ କଟିଛି । ବିନା ହେଲମେଟ ପାଇଁ ୩୩ ହଜାର ୬୧ଟି, ଦ୍ରୁତ ଗତି ପାଇଁ ୫ ହଜାର ୬୮୧, ଟ୍ରିପଲ ରାଇଡିଂ ପାଇଁ ୧୮୨୦ ଓ ବୈଧ ବୀମା ନ ଥାଇ ଗାଡି ଚଳାଇବା ପାଇଁ ୧୭୨୨ଟି ଚାଲାଣ କଟିଛି । ଅନ୍ୟପଟେ ଦୁର୍ଘଟଣାରେ ରାଜ୍ୟରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି । ୨୦୨୨ରେ ୫୪୬୭ ଜଣଙ୍କ ମୃତ୍ୟୁ ଘଟିଥିବାବେଳେ ୨୦୨୩ରେ ୫୭୩୯, ୨୦୨୪ରେ ୬୧୪୨ ଏବଂ ୨୦୨୫ରେ ୬୪୮୩ ଜଣଙ୍କର ମୃତ୍ୟୁ ଘଟିଛି ।

ପଢନ୍ତୁ ଏହି ଖବର: ଗାଡ଼ି ମାଲିକ ଓ ଚାଳକମାନଙ୍କ ପାଇଁ ଖୁସି ଖବର, କମିଲା PUCC ଫାଇନ୍

ସଡ଼କ ଦୁର୍ଘଟଣାଜନିତ ମୃତ୍ୟୁ ରୋକିବାକୁ ପ୍ରତି ମାସର ପ୍ରଥମ ସପ୍ତାହ 'ଶୂନ ମୃତ୍ୟୁ ସପ୍ତାହ' ଭାବେ ପାଳନ କରାଯିବ । ସେପ୍ଟେମ୍ବର ୨୦୨୬ରୁ ମାର୍ଚ୍ଚ ୨୦୨୭ ପର୍ଯ୍ୟନ୍ତ ଏହା ଚାଲିବ । ଯେଉଁଥିରେ ପରିବହନ ବିଭାଗ ସବୁ ଜିଲ୍ଲାରେ ଟ୍ରାଫିକ ନିୟମ ଉଲ୍ଲଙ୍ଘନକାରୀଙ୍କୁ ଧରିବ । ବିନା ବୀମାରେ ଗାଡ଼ି ଚଲାଇ ଦୁର୍ଘଟଣା ଘଟାଉଥିବା ଚାଳକଙ୍କ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରିବେ ସରକାର ।