OP Rajbhar reply to Akhilesh Yadav / 'ଚ୍ୟାଲେଞ୍ଜ ଦେବା ପରେ ପଛକୁ ହଟନ୍ତୁ ନାହିଁ ଅଖିଳେଶ ଯାଦବ; ମୁକାବିଲା ପାଇଁ ରୁହନ୍ତୁ ପ୍ରସ୍ତୁତ'

ଆଗାମୀ ୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନକୁ ଏବେ ଠାରୁ ସରଗରମ ହୋଇଉଠଛି ରାଜ୍ୟ ରାଜନୀତି। ଏହି ନିର୍ବାଚନରେ ରାଜ୍ୟର ଜଣାଶୁଣା ଆସନ ଅଯୋଧ୍ୟାରୁ ପ୍ରତିଦ୍ୱନ୍ଦ୍ୱିତା କରିବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଚ୍ୟାଲେଞ୍ଜ ଦେଇଥିଲେ ପୂର୍ବତନ ମୁଖ୍ୟମନ୍ତ୍ରୀ ତଥା ସମାଜବାଦୀ ପାର୍ଟି (ସପା) ଅଧ୍ୟକ୍ଷ ଅଖିଳେଶ ଯାଦବ। ଏବେ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ଯୋଗୀ ସରକାରଙ୍କ ମନ୍ତ୍ରୀ ତଥା ସୁହଲଦେବ ଭାରତୀୟ ସମାଜ ପାର୍ଟି ମୁଖ୍ୟ ଓମ ପ୍ରକାଶ ରାଜଭର। ମନ୍ତ୍ରୀ ରାଜଭାର କହିଛନ୍ତି ଯେ, ଯଦି ଅଖିଳେଶ ଯାଦବ ଅଯୋଧ୍ୟା ଆସନରୁ ନିର୍ବାଚନ ଲଢିବାକୁ ପ୍ରସ୍ତୁତ ଅଛନ୍ତି, ତାହେଲେ ମୁଖ୍ୟମନ୍ତ୍ରୀ ଯୋଗୀ ଜୀ ମଧ୍ୟ ସେଠାରୁ ନିର୍ବାଚନ ଲଢିବାକୁ ପ୍ରସ୍ତୁତ ଅଛନ୍ତି। ଯଦି ଅଖିଳେଶ ଯାଦବଙ୍କ ପାଖରେ ସାମାନ୍ୟ ରାଜନୈତିକ ପରିପକ୍ୱକତା ଥାଏ, ତାହେଲେ ସେ ଏହି ଚ୍ୟାଲେଞ୍ଜ ଗ୍ରହଣ କରିବା ଆବଶ୍ୟକ।"

ମନ୍ତ୍ରୀ ରାଜଭର ଆହୁରି କହିଛନ୍ତି ଯେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ସପା ମୁଖିଆଙ୍କ ଚ୍ୟାଲେଞ୍ଜ ଗ୍ରହଣ କରିଛନ୍ତି। ଅଖିଳେଶ ଯାଦବ ଆଗକୁ ଆସି ତାଙ୍କ ବିରୋଧରେ ନାମାଙ୍କନ ଦାଖଲ କରିବା ଆବଶ୍ୟକ। ଯଦି ସପା ମୁଖିଆ ଆଗାମୀ ବିଧାନସଭା ନିର୍ବାଚନରେ ଅଯୋଧ୍ୟା ଆସନରୁ ​​ପ୍ରତିଦ୍ୱନ୍ଦ୍ୱିତା କରିବାକୁ ଭୟ କରୁଛନ୍ତି, ତାହେଲେ ସେ ଜହୁରାବାଦ ଆସନରେ ପ୍ରତିଦ୍ୱନ୍ଦ୍ୱିତା କରନ୍ତୁ। ଏହା ପରେ ଅଖିଳେଶ ଯାଦବ ଏନଡି଼ଏ ମେଣ୍ଟର ଶକ୍ତି ଏବଂ ତାଙ୍କ ବାସ୍ତବତା ଜାଣିପାରିବେ।

ମୁଖ୍ୟମନ୍ତ୍ରୀ ଯୋଗୀଙ୍କୁ ଚ୍ୟାଲେଞ୍ଜ ଦେଇଥିଲେ ଅଖିଳେଶ ଯାଦବ
ନିକଟରେ ଅଖିଳେଶ ଯାଦବ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଅଯୋଧ୍ୟା ଆସନରୁ ନିର୍ବାଚନ ଲଢିବା ପାଇଁ ଚ୍ୟାଲେଞ୍ଜ କରିଥିଲେ। ଏନେଇ ସେ କହିଥିଲେ ଯେ ବିଗତ କିଛି ବର୍ଷ ଧରି ବିଜେପି ଲାଗି ମନ୍ଦିର ରାଜନୀତିର କେନ୍ଦ୍ର ପାଲଟିଥିବା ଅଯୋଧ୍ୟା ଆସନରୁ ସେ, ଆଗାମୀ ୨୦୨୭ ଉତ୍ତର ପ୍ରଦେଶ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଆବଶ୍ୟକ। ସପା ମୁଖିଆ ଆହୁରି କହିଥିଲେ ଯେ, ଯେବେଠାରୁ ଅଯୋଧ୍ୟା ଆସନ ପାଇଁ ଆମେ ଆମର ଦଳୀୟ ପ୍ରାର୍ଥୀ ଘୋଷଣା କରିସାରିଛୁ, ସେବେଠାରୁ ବିଜେପି କ୍ରମାଗତ ଭାବେ ଏହି ଆସନରେ ସର୍ଭେ କରୁଛି। ପ୍ରତ୍ୟେକ ସର୍ଭେ ରିପୋର୍ଟ ଅନୁସାରେ ପଛରେ ପଡ଼ିଯାଇଛି। ବର୍ତ୍ତମାନ ଶୁଣିବାକୁ ମିଳୁଛି ଯେ ସେମାନେ ଅଯୋଧ୍ୟା ପାଇଁ କୌଣସି ନୂତନ ପ୍ରାର୍ଥୀ ଖୋଜି ପାରିବେ ନାହିଁ। ଯଦି ବଡ଼ ବଡ଼ ଦାବି କରୁଥିବା ମୁଖ୍ୟମନ୍ତ୍ରୀ ଏତେ ଆତ୍ମବିଶ୍ୱାସୀ ତାହେଲେ ସେ ନିଜେ ଅଯୋଧ୍ୟା ଆସନରେ ପ୍ରତିଦ୍ୱନ୍ଦ୍ୱିତା କରି ଏହାକୁ ପ୍ରମାଣ କରିବା ଆବଶ୍ୟକ।

ଏହା ସହ ପଢନ୍ତୁ:  ଅଖିଳେଶ ଯାଦବଙ୍କୁ ମୁଖ୍ୟମନ୍ତ୍ରୀ ଯୋଗୀଙ୍କ ପାଲଟା ଜବାବ; କହିଲେ ଅଯୋଧ୍ୟା ଲଢେଇ ଲାଗି ମୁଁ ପ୍ରସ୍ତୁତ 

ମୁଖ୍ୟମନ୍ତ୍ରୀ ଯୋଗୀଙ୍କ ଜବାବ
ବଳରାମପୁର ଜିଲ୍ଲାରେ ୮୦୦ କୋଟିରୁ ଅଧିକ ମୂଲ୍ୟର ବିଭିନ୍ନ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରି, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି, “ଅଖିଳେଶ ଜୀ, ଆପଣଙ୍କ ପାଇଁ ମୋ ପାଖରେ ଏକ ପ୍ରସ୍ତାବ ରହିଛି। ଆପଣ ମଧ୍ୟ ଶ୍ରୀ ଅଯୋଧ୍ୟା ଧାମ ଆସନରୁ ଆପଣଙ୍କର ନାମାଙ୍କନ ଦାଖଲ କରନ୍ତୁ। ମୁଁ ମଧ୍ୟ ସେଠାରୁ ମୋର ନାମାଙ୍କନ ଦାଖଲ କରିବି। "

ମୁଖ୍ୟମନ୍ତ୍ରୀ ଯୋଗୀ ଆହୁରି କହିଛନ୍ତି, “ସମାଜବାଦୀ ପାର୍ଟି ବିଚଳିତ ହୋଇପଡ଼ିଛି। ସେ (ଅଖିଳେଶ ଯାଦବ) ରାଜ୍ୟରେ ଘଟୁଥିବା ବିକାଶକୁ ଦେଖୁ ନାହାଁନ୍ତି କିମ୍ବା ଏହାକୁ ଚିହ୍ନିବାର ତାଙ୍କର କ୍ଷମତା ମଧ୍ୟ ନାହିଁ। ଅଯୋଧ୍ୟା ଆସନରୁ ନିର୍ବାଚନ ​​ପ୍ରତିଦ୍ୱନ୍ଦ୍ୱିତା କରିବାକୁ ସେ ମୋତେ ଚ୍ୟାଲେଞ୍ଜ କରିଛନ୍ତି। ମୁଁ ଆପଣକୁ ଅଯୋଧ୍ୟା ଆସନରୁ ଆପଣଙ୍କୁ ନାମାଙ୍କନ ଦାଖଲ କରିବାକୁ ପ୍ରସ୍ତାବ ଦେଉଛି। ମୁଁ ମଧ୍ୟ ଅଯୋଧ୍ୟାରୁ ପ୍ରତିଦ୍ୱନ୍ଦ୍ୱିତା କରିବି। ଆପଣ ଆସନ୍ତୁ ଥରେ ସେଠାରୁ ଆମେ ଆମର ଭାଗ୍ୟ ପରୀକ୍ଷା କରିନେବା। ଆପଣ ଆପଣଙ୍କ ସମର୍ଥକଙ୍କ ସହାୟତାରେ କାହିଁକି ଲଢେଇ କରିବାକୁ ଚାହୁଁଛନ୍ତି। ମୁକାବିଲା ସିଧାସଳଖ ହେବା ଆବଶ୍ୟକ।