ବିଜେଡି ବିଧାୟକ ଦଳ ବୈଠକକୁ ଆସିଲେନି ପ୍ରାୟ ୧୦ରୁ ଅଧିକ ବିଧାୟକ । ଯାହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଆଲୋଚନା ଆରମ୍ଭ ହୋଇଯାଇଛି । ବୁଧବାର ଶଙ୍ଖ ଭବନରେ ବସିଥିଲା ବିଜେଡି ବିଧାୟକ ଦଳ ବୈଠକ । ବିଜେଡି ସଭାପତି ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିଲା । ଆଗାମୀ ବିଧାନସଭା ଶୀତ ଅଧିବେଶନ ପାଇ ରଣନୀତି ପ୍ରସ୍ତୁତ ହେଲା । କିନ୍ତୁ ଏହି ବୈଠକରେ କିଛି ବିଧାୟକଙ୍କ ଅନୁପସ୍ଥିତିକୁ ରାଜନୈତିକ ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି ।

ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁଙ୍କ ଅନୁପସ୍ଥିତି ମଧ୍ୟ ଚର୍ଚ୍ଚାକୁ ଖୋରାକ ଯୋଗାଇଛି । ସେହିପରି ବିଧାୟକ ସନାତନ ମହାକୁଡ ମଧ୍ୟ ଉପସ୍ଥିତ ନଥିଲେ । ଯାଜପୁର ବିଧାୟକ ସୁଜାତା ସାହୁ, ରାଉରକେଲା ବିଧାୟକ ସାରଦା ନାୟକ, ନର୍ଲା ବିଧାୟିକା ମନୋରମା ମହାନ୍ତି ମଧ୍ୟ ବିଧାୟକ ଦଳ ବୈଠକକୁ ଆସିନଥିଲେ । ନୂଆପଡା ଉପ-ନିର୍ବାଚନରେ ବିଜେଡିର ଖରାପ ପ୍ରଦର୍ଶନ ପରେ ଦଳୀୟ କନ୍ଦଳ ବଢିଛି । ବରିଷ୍ଠ ନେତା ଭୂପିନ୍ଦର ସିଂହ ସମାଲୋଚନା କରିବା ପରେ ପଦ ଛାଡିଥିଲେ ସାଂସଦ ଦେବାଶିଷ ସାମନ୍ତରାୟ । ଆଉ ଏବେ ବିଧାୟକ ଦଳ ବୈଠକକୁ କିଛି ବିଜେଡି ବିଧାୟକ ନ ଆସିବା ଅନେକ ପ୍ରଶ୍ନ ସୃଷ୍ଟି କରିଛି ।

ଅଧିକ ପଢ଼ନ୍ତୁ: ଗୃହ ଯୁଦ୍ଧରେ କମ୍ପୁଛି ଶଙ୍ଖ ଶିବିର; ନବୀନଙ୍କ ନୀରବତା ହେବ କି BJD ବିନାଶର କାରଣ ?

ସେପଟେ ନୂଆପଡ଼ା ବିପର୍ଯ୍ୟୟ ଓ ସୁଜାତାଙ୍କ ଏଣ୍ଟ୍ରିକୁ ବିରୋଧ ପ୍ରସଙ୍ଗ ଭିତରେ ନଇଁ ପଡିଥିଲା ବିଜେଡି ସଂଗଠନ । ସୁଯୋଗ ଦେଖି ବିଧାଏ ମାରିଲେ ବରିଷ୍ଠ । ଦଳୀୟ ପଦବୀ ପ୍ରତ୍ୟାଖ୍ୟାନ କଲେ ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ନବୀନଙ୍କୁ ଚିଠି ଲେଖି ଝାଡ଼ିଲେ ଅସନ୍ତୋଷ । କହିଲେ ବିଜୁଙ୍କ ବିଚାରଧାରାରୁ ଦୂରେଇ ଯାଉଛି ବିଜେଡି । ନିଷ୍ଠାବାନଙ୍କ ପାଇଁ ଦଳରେ ସ୍ଥାନ ନାହିଁ । ସାମ୍ବାଦିକ ସମ୍ମିଳନୀରେ ବି ଆଣିଲେ ସାଂଘାତିକ ଅଭିଯୋଗ । ଭୈରବ ପାଣ୍ଡିଆନଙ୍କ ପାଲତୁ ଆଦିତ୍ୟ ମହାପାତ୍ର ଏବେ ଦଳ ଚଳାଉଥିବା କହି ଖୋଲିଲେ ଗୁମର ।

କେବଳ ଦେବାଶିଷ ନୁହଁନ୍ତି ଭୁପିନ୍ଦର ବି ମାରିଲେ ବାଣ । କହିଲେ ବରିଷ୍ଠ ମାନଙ୍କୁ ଦୂରେଇ ଦେଇଛି ଦଳ । ପାଣି ମୁଣ୍ଡ ଉପରେ ଚଢ଼ିଲେ ବିକଳ୍ପ ବ୍ୟବସ୍ଥାରେ ନୂଆ ଦଳ କଥା ଚିନ୍ତା କରିବୁ । ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ କିନ୍ତୁ ମାପିଚୁପି ରଖିଥିଲେ ବୟାନ । କହିଥିଲେ, ନେତାଙ୍କ ଭିତରେ କ୍ଷୋଭ ଅଛି ଦାୟିତ୍ୱରେ ଥିବା ଲୋକ ବୁଝି ବିଚାରି କାମ କଲେ ଭଲ ।