BJD Internal Conflict / ନବୀନଙ୍କୁ ବରିଷ୍ଠଙ୍କ ଚେତାବନୀ, ସୁଜାତାଙ୍କୁ ଦାୟିତ୍ବ ଦେଲେ ଭାଗ ଭାଗ ହେବ ବିଜେଡି

ବିଜେଡିରେ ମିଶିବେ ପାଣ୍ଡିଆନଙ୍କ ସ୍ତ୍ରୀ । ଏହି ଚର୍ଚ୍ଚା ଏବେ ଜୋର ଧରିଥିବାବେଳେ ଦଳର ପ୍ରତିଷ୍ଠା ଦିବସ ପୂର୍ବରୁ ସୁପ୍ରିମୋ ନବୀନଙ୍କୁ ଚେତାବନୀ ଦେଇଛନ୍ତି ବିଜେଡିର ବରିଷ୍ଠ ନେତା । ବିଜେଡି ଭାଗ ଭାଗ ହୋଇଯିବ ବୋଲି ରୋକ୍ ଠୋକ୍ କହିଛନ୍ତି ଭୂପିନ୍ଦର ସିଂ । ସୁଜାତାଙ୍କୁ ବିରୋଧ କରିବାରୁ ଭୂପିନ୍ଦରଙ୍କୁ ବିଜେଡି ଭିତରୁ ଆରମ୍ଭ ହୋଇଯାଇଛି ଧମକ ଚମକ ।

ସୁଜାତାଙ୍କୁ ନେଇ କ'ଣ ରହିଛି ବିଜେଡିର ପ୍ଲାନ ? ପ୍ରତିଷ୍ଠା ଦିବସରେ ସୁଜାତା ଶଙ୍ଖ ଫୁଙ୍କିବେ ନା ମେଳି ରାଜନୀତି ଦେଖି ପ୍ଲାନ୍‌ ପୋଷ୍ଟପୋନ୍‌ କରିବେ ? ବିଜେଡି ଭିତରେ ସୁଜାତାଙ୍କୁ ନେଇ ଏ ପ୍ରଶ୍ନ ଭିତରେ ଭୂପିନ୍ଦର କରିଛନ୍ତି ଭବିଷ୍ୟବାଣୀ । ଯଦି ନବୀନଙ୍କ ସୁଜାତାଙ୍କୁ କିମ୍ବା ଆଉ କାହାକୁ ବିଜେଡିର ଦାୟିତ୍ବ ଦିଅନ୍ତି ତେବେ ବିଜେଡି ଭାଗ ଭାଗ ହୋଇଯିବ ବୋଲି କହିଛନ୍ତି ଭୂପିନ୍ଦର । ବରିଷ୍ଠ ବିଜେଡି ନେତା ଭୂପିନ୍ଦର ସିଂ କହିଛନ୍ତି, "ବିଜେଡି କହିଲେ ନବୀନ ପଟ୍ଟନାୟକଙ୍କୁ ବୁଝାଏ । ନବୀନ ବାବୁ ଯଦି ନେତୃତ୍ଵ ନନେବେ, ନବୀନ ବାବୁ ଯଦି ସେଠି ନାହାନ୍ତି... ବିଜେଡି କେଉଁଠି ରହିଲା ।"

ଭୂପିନ୍ଦର କହିଛନ୍ତି, "ବରିଷ୍ଠଙ୍କ ଭଳି କନିଷ୍ଠ ବିଜେଡି ନେତା ନୂଆ ନେତୃତ୍ଵକୁ ଆଶଙ୍କା କରି ଏକାଠି ବସୁଥିଲେ । ନବୀନ ଆଗକୁ ଦଳର ନେତୃତ୍ଵ ନେବେ କି ନାହିଁ ଦ୍ଵନ୍ଦ୍ଵ ଥିଲା । ଏବେ ନବୀନ ସ୍ପଷ୍ଟ କରି ସାରିଛନ୍ତି ସେ ଦାୟିତ୍ଵରେ ରହିବେ ।"

ଅଧିକ ପଢ଼ନ୍ତୁ: ସୁଜାତାଙ୍କ BJD ଏଣ୍ଟ୍ରି ନେଇ ପ୍ରମିଳା ଦେଲେ ନୂଆ ସଂକେତ

କେବଳ ଏତିକି ନୁହେଁ, ଭୂପିନ୍ଦରଙ୍କ ଅଭିଯୋଗ ଦଳ ଚଳାଉଛନ୍ତି ହାତ ଗଣତି ତିନି - ଚାରି ଜଣ । ସମସ୍ତଙ୍କୁ ସାଙ୍ଗରେ ନେଇ ନ ଚାଲିଲେ ମେଳି ଓ ଅସନ୍ତୋଷ ତେଜିବ ବୋଲି ଚେତାବନୀ ଦେଇଛନ୍ତି ଭୂପିନ୍ଦର । ତେବେ ପ୍ରଫୁଲ୍ଲଙ୍କ ଉଦାହରଣ ଦେଖି ପରୋକ୍ଷରେ ଭୂପିନ୍ଦରଙ୍କୁ ବହିଷ୍କାରର ଧମକ ଦେଇଛନ୍ତି ବିଜେଡି କୋଷାଧ୍ୟକ୍ଷ ସୁବାସ ସିଂ ।
ସୁଜାତାଙ୍କୁ ନେଇ ବିଜେଡି ଭିତରେ ଏ ଘମାସନ ଭିତରେ କିଛି ପରାମର୍ଶ ଦେବାର ଥିଲେ ନବୀନଙ୍କୁ ଭେଟି ଦିଅନ୍ତୁ ବୋଲି କହିଛନ୍ତି ଦେବୀ ମିଶ୍ର ।

ସୁଜାତାଙ୍କୁ ବିଜେଡିରେ ବଡ଼ ଦାୟିତ୍ବ ମିଳୁ ଏହା ଚାହୁଁନାହାଁନ୍ତି ଆଣ୍ଟି ପାଣ୍ଡିଆନ ଗୋଷ୍ଠୀ । କିନ୍ତୁ ପ୍ରୋ ପାଣ୍ଡିଆନ ଗୋଷ୍ଠୀ ପାରୁ ପର୍ଯନ୍ତ ସୁଜାତାଙ୍କୁ ସାମିଲ ପାଇଁ ଲବି କରୁଛନ୍ତି । ତେବେ ସୁଜାତାଙ୍କୁ ଦାୟିତ୍ବ ବିଜେଡିର ଭୁଲ ରାଜନୈତିକ ନିଷ୍ପତ୍ତି ବୋଲି ପୂର୍ବରୁ ଖୋଲା ଖୋଲି କହି ସାରିଛନ୍ତି ରାଜ୍ୟସଭା ସାସଂଦ ଦେବାଶିଷ ସାମନ୍ତରାୟ । ଏ ସବୁ ଭିତରେ ପ୍ରତିଷ୍ଠା ଦିବସରେ ସୁଜାତାକୁ ନ ମିଶାଇ ଉପଯୁକ୍ତ ସମୟକୁ ସୁପ୍ରିମୋ ଅପେକ୍ଷା କରିବେ ବୋଲି କୁହାଯାଉଛି ।