ବିଜୁ ଜନତା ଦଳରେ ବର୍ଷିଲେ ବରିଷ୍ଠ, ନୂଆ ଦଳ ଗଢିବାକୁ ଚେତାବନୀ ଦେଲେ । ସୁଜାତାଙ୍କୁ ଉତ୍ତରାଧିକାରୀ ଚର୍ଚ୍ଚା ପରେ ବିଜେଡିରେ ଘନେଇଲା ବିବାଦ । ଦଳୀୟ ପଦବୀ ପ୍ରତ୍ୟାଖ୍ୟାନ ସହ ନବୀନଙ୍କୁ ଚିଠି ଲେଖି ଅସନ୍ତୋଷ ଝାଡ଼ିଲେ ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ସେହିପରି ଭୂପିନ୍ଦର କହିଲେ, ବରିଷ୍ଠ ମାନଙ୍କୁ ଦୂରେଇ ଦେଉଛି ଦଳ । ମାପିଚୁପି ବୟାନ ରଖିଛନ୍ତି ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ।

ଅଧିକ ପଢ଼ନ୍ତୁ: ପଦରୁ ଇସ୍ତଫା ଦେଇ ନବୀନଙ୍କୁ ପ୍ରଶ୍ନ କଲେ ଦେବାଶିଷ; 'BJDରେ ବିଜୁ ଅନୁଗତଙ୍କ ସ୍ଥାନ କେଉଁଠି ?'

ନୂଆପଡ଼ା ବିପର୍ଯ୍ୟୟ ଓ ସୁଜାତାଙ୍କ ଏଣ୍ଟ୍ରିକୁ ବିରୋଧ ପ୍ରସଙ୍ଗ ଭିତରେ ନଇଁ ପଡିଥିଲା ବିଜେଡି ସଂଗଠନ । ସୁଯୋଗ ଦେଖି ବିଧାଏ ମାରିଲେ ବରିଷ୍ଠ । ଦଳୀୟ ପଦବୀ ପ୍ରତ୍ୟାଖ୍ୟାନ କଲେ ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ନବୀନଙ୍କୁ ଚିଠି ଲେଖି ଝାଡ଼ିଲେ ଅସନ୍ତୋଷ । କହିଲେ ବିଜୁଙ୍କ ବିଚାରଧାରାରୁ ଦୂରେଇ ଯାଉଛି ବିଜେଡି । ନିଷ୍ଠାବାନଙ୍କ ପାଇଁ ଦଳରେ ସ୍ଥାନ ନାହିଁ । ସାମ୍ବାଦିକ ସମ୍ମିଳନୀରେ ବି ଆଣିଲେ ସାଂଘାତିକ ଅଭିଯୋଗ । ଭୈରବ ପାଣ୍ଡିଆନଙ୍କ ପାଲତୁ ଆଦିତ୍ୟ ମହାପାତ୍ର ଏବେ ଦଳ ଚଳାଉଥିବା କହି ଖୋଲିଲେ ଗୁମର । କେବଳ ଦେବାଶିଷ ନୁହଁନ୍ତି ଭୁପିନ୍ଦର ବି ମାରିଲେ ବାଣ । କହିଲେ ବରିଷ୍ଠ ମାନଙ୍କୁ ଦୂରେଇ ଦେଇଛି ଦଳ । ପାଣି ମୁଣ୍ଡ ଉପରେ ଚଢ଼ିଲେ ବିକଳ୍ପ ବ୍ୟବସ୍ଥାରେ ନୂଆ ଦଳ କଥା ଚିନ୍ତା କରିବୁ । ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ କିନ୍ତୁ ମାପିଚୁପି ରଖିଛନ୍ତି ବୟାନ । କହିଛନ୍ତି, ନେତାଙ୍କ ଭିତରେ କ୍ଷୋଭ ଅଛି ଦାୟିତ୍ୱରେ ଥିବା ଲୋକ ବୁଝି ବିଚାରି କାମ କଲେ ଭଲ ।

ସେପଟେ ବିଜେଡି କଳିକୁ ଅଧିକ ଚେଙ୍କିଛି ବିଜେପି । ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ କହିଛନ୍ତି ଆଗକୁ ଆହୁରି ନେତା ମୁହଁ ଖୋଲିବେ ଆଉ ତାସ ଘର ଭଳି ଭାଙ୍ଗିଯିବ ବିଜେଡି ।

ଅଧିକ ପଢ଼ନ୍ତୁ: ଦେବାଶିଷଙ୍କୁ ଭୂପିନ୍ଦରଙ୍କ ସମର୍ଥନ; BJDକୁ ଖୋଲା ଚେତାବନୀ ଦେଇ କହିଲେ- 'ଚିନ୍ତା କରୁଛୁ ବିକଳ୍ପ'

ଏସବୁ ଭିତରେ ସୋସିଆଲ ମିଡ଼ିଆରେ ପୋଷ୍ଟ କରି ପୁଣି କେଞ୍ଚାଏ ମାରିଛନ୍ତି ପୂର୍ବତନ ବିଜେଡି ମ୍ୟାଡମ ଶ୍ରୀମୟୀ ମିଶ୍ର । ଲେଖିଛନ୍ତି ବିଦ୍ରୋହର ବହ୍ନି, ବିପ୍ଳବର ଆରମ୍ଭ, ବିନାଶର ଶଙ୍ଖ ନାଦ । ତେବେ ଦେଖିବାର କଥା ବରିଷ୍ଠଙ୍କ ଏହି ଶଙ୍ଖ ନାଦରେ ବିଜେଡିର ସୂର୍ଯ୍ୟ ଅସ୍ତମିତ ହେଉଛି ନା ନୂଆ ସକାଳ ଆଣୁଛି ।