Sujata Karthikeyan BJD / ଓଡ଼ିଶା ବୁଲି ସ୍ଵାମୀ କରିଥିଲେ ଦଳର ସର୍ବନାଶ, ଏବେ ନିର୍ବାଚନ ପୂର୍ବରୁ ପଞ୍ଚାୟତ ବୁଲିବେ ସୁଜାତା

ପାଣ୍ଡିଆନଙ୍କ ପରି ଗ୍ରାଉଣ୍ଡକୁ ଯିବେ ସୁଜାତା । ପଞ୍ଚାୟତ ନିର୍ବାଚନ ପୂର୍ବରୁ ଏ ନେଇ ବିଜେଡି କରିଛି ବଡ଼ ପ୍ଲାନ୍‌ । ପୁରୀ, କଟକ ପରେ ସମ୍ବଲପୁରରେ ସୁଶାନ୍ତଙ୍କ ଶ୍ରଦ୍ଧାଞ୍ଜଳୀ ସଭାରେ ସାମିଲ ହୋଇଥିଲେ ସୁଜାତା । ତେବେ ୨୪ ସାଧାରଣ ନିର୍ବାଚନ ପୂର୍ବରୁ ହେଲିକେପ୍ଟରରେ ଉଡି ଉଡି ସବୁ ବ୍ଲକରେ ପାଣ୍ଡିଆନ କରିଥିବା ସଭା ଦଳ ପାଇଁ ବୁମେରାଂ ହୋଇଥିବା ବେଳେ ସୁଜାତାଙ୍କ ଗସ୍ତର କ'ଣ ରହିବ ପ୍ରଭାବ ତାକୁ ନେଇ ଚର୍ଚ୍ଚା ।

ପଞ୍ଚାୟତ ନିର୍ବାଚନ ପୂର୍ବରୁ ସୁଜାତାଙ୍କୁ ମୈଦାନକୁ ଓହ୍ଲାଇବାକୁ ବିଜେଡିର ବ୍ଲୁ ପ୍ରିଣ୍ଟ । ବିଜେଡିରେ କର୍ମୀ ଭାବେ ମିଶିଥିଲେ ବି ତାଙ୍କ କାନ୍ଧରେ ଏବେ ସୁପ୍ରିମୋଙ୍କ ଦାୟିତ୍ବ । ପ୍ରଥମେ ପୁରୀ ଯାଇ ମହାପ୍ରଭୁଙ୍କ ଆର୍ଶୀବାଦ ନେଇଥିଲେ ସୁଜାତା । ତା' ପରେ କଟକ ଯାଇ ମା' ଚଣ୍ଡୀଙ୍କ ନିକଟରେ କରିଥିଲେ ପୂଜାର୍ଚ୍ଚନା । ଆଉ ଉଭୟ ଜାଗାରେ ସୁଜାତାଙ୍କୁ ବିଜେଡିର ସର୍ବୋଚ୍ଚ ନେତା ଭଳି ସ୍ବାଗତ କରିଥିଲେ ନେତା ଓ କର୍ମୀ । ବିଧାୟକ ଓ ସାଂସଦ ବି ବାଦ୍‌ ପଡିନଥିଲେ । ଆଉ ଗତକାଲି ସମ୍ବଲପୁର ଯାଇ ସମଲେଶ୍ଵରୀଙ୍କ ଦର୍ଶନ କରିବା ସହ ସୋହେଲାରେ ସୁଶାନ୍ତ ସିଂଙ୍କ ଶ୍ରଦ୍ଧାଞ୍ଜଳୀ କାର୍ଯ୍ୟକ୍ରମରେ ସାମିଲ ହୋଇଛନ୍ତି ସୁଜାତା । ତେବେ ଆଗକୁ ସୁଜାତା ବୁଲିବେ ପଞ୍ଚାୟତ ।

ଅଧିକ ପଢ଼ନ୍ତୁ: CMOରୁ ଫାଇଲ ହଜିବା ଘଟଣା, ପୁଣି ରିମାଇଣ୍ଡର ପଠାଇପାରେ କ୍ରାଇମବ୍ରାଞ୍ଚ

ବଡ଼ କଥା ହେଉଛି ପଞ୍ଚାୟତ ନିର୍ବାଚନକୁ ଆଉ ମାତ୍ର କିଛି ମାସ ଥିବା ବେଳେ ନବୀନ ଏପର୍ଯ୍ୟନ୍ତ ଗ୍ରାଉଣ୍ଡକୁ ଓହ୍ଲାଇ ନାହାନ୍ତି । ସାଧାରଣ ନିର୍ବାଚନ ପରଠାରୁ ମାତ୍ର ଥରେ ବର୍ଷା କ୍ଷୟକ୍ଷତିର ଗ୍ରାଉଣ୍ଡରେ ସ୍ଥିତି ସମୀକ୍ଷା ପାଇଁ କିଛି ଅଞ୍ଚଳ ଗସ୍ତ କରିଥିଲେ ନବୀନ । ଏବେ ବି ସେ ନେତାଙ୍କୁ ନବୀନ ନିବାସ ଡାକି ବୈଠକ କରୁଛନ୍ତି । ବିଜେଡିର ଅନେକ ନେତା ବିଜେପିରେ ମିଶିବା ପରେ ଏବଂ ୮ ବିଧାୟକ ନିଲମ୍ବନ ହେବା ପରେ, ନେତା ଶୂନ୍ୟ ନିର୍ବାଚନ ମଣ୍ଡଳୀରେ ନୂଆ ନେତା ବାଛିବାକୁ ଯେଉଁ ପ୍ରୟାସ ହେଉଛି ତାକୁ ବି ନବୀନ ନିବାସରୁ କରାଯାଉଛି । ଅନ୍ୟପଟେ ସୁଜାତାକୁ ନେଇ ଦଳରେ ଅସନ୍ତୋଷ ଏବେ ବି ରହିଛି । ତେବେ ସୁଜାତାଙ୍କ ସ୍ଵାମୀ ଭୈରବ ପାଣ୍ଡିଆନ ୨୦୨୪ ସାଧାରଣ ନିର୍ବାଚନ ବେଳେ ରାଜ୍ୟ ବୁଲିବା ବିଜେଡି ପାଇଁ ବୁମେରାଂ ହୋଇଥିଲା । ଏମିତି ସ୍ଥିତିରେ ସୁଜାତାଙ୍କ ରାଜ୍ୟ ଭ୍ରମଣ କେତେ ଗ୍ରହଣୀୟ ହେବ ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।

ସୁଜାତା ମିଶିବା ପରେ ଶଙ୍ଖ ଭବନରେ ଦେଖିବାକୁ ମିଳିଥିଲା ନେତାଙ୍କ ଭିଡ଼ । ସୁଜାତାଙ୍କ ସହ ସାକ୍ଷାତ କରି ଫୋଟୋ ଉଠାଇବାକୁ ନେତାଙ୍କ ମଧ୍ୟରେ ସତେ ଯେମିତି ଚାଲିଥିଲା ପ୍ରତିଯୋଗିତା । କୁହାଗଲା ଗ୍ରାଉଣ୍ଡକୁ ଯିବା ପୂର୍ବରୁ ଏହା ଥିଲା ତାଙ୍କର ପାଗ ଭିଡା । ଏବେ ମଇଦାନକୁ ଓହ୍ଲାଇଛନ୍ତି ସୁଜାତା । ତେବେ ନବୀନଙ୍କୁ ନବୀନ ନିବାସ ଭିତରେ ସୀମିତ ରଖି ଠିକ ସ୍ବାମୀଙ୍କ ରାସ୍ତାରେ ଗ୍ରାଉଣ୍ଡରେ କର୍ମୀଙ୍କୁ ନେତାଙ୍କ ଭଳି ଉଦବୋଧନ ଦେବାର କଳାରେ ସେ କେତେ ପାସ୍ ହେବେ ତା ଉପରେ ସମସ୍ତଙ୍କ ନଜର ।