ଶିମଲା: ହିମାଚଳ ପ୍ରଦେଶ ମହାନଗର ନିଗମ ନିର୍ବାଚନରେ ବିଜେପିର ବଡ଼ ବିଜୟ । ୪ଟି ମହାନଗର ନିଗମରୁ ୩ଟି ଅକ୍ତିଆର୍ କରିଛି ବିଜେପି । ରାଜ୍ୟରେ ଶାସନରେ ଥିବା କଂଗ୍ରେସ ମାତ୍ର ଗୋଟିଏ ମହାନଗର ନିଗମରେ ଜିତିବାରେ ସକ୍ଷମ ହୋଇଛି ।

ଧର୍ମଶାଳା, ମଣ୍ଡି, ସୋଲନ ମହାନଗର ନିଗମରେ ବିଜେପି ଜିତିଛି । ଯେତେବେଳେ କି ପାଲମପୁର ବଞ୍ଚାଇ ଦେଇଛି କଂଗ୍ରେସର ଇଜ୍ଜତ । ମଣ୍ଡିରେ ବିଜେପି ୧୨, ସୋଲନରେ ୧୦ ଓ ଧର୍ମଶାଳାରେ ୧୧ଟି ଆସନ ଜିତିଛି । ସେହିଭଳି ମଣ୍ଡିରେ କଂଗ୍ରେସ ଗୋଟିଏ, ଧର୍ମଶାଳାରେ ୬ ଓ ସୋଲନରେ ୬ଟି ଆସନ ଜିତିଛି ।

ଏଥିସହ ପଢ଼ନ୍ତୁ: ଥମୁନି ଜନତାଙ୍କ ରାଗ; ପୁଣି ମାଡ଼ ଖାଇଲେ ମମତାଙ୍କ ନେତା 

ପାଲମପୁରକୁ ପୁଣି ଥରେ କଂଗ୍ରେସ କବ୍‌ଜା କରିଛି । ପାଲମପୁରରେ କଂଗ୍ରେସ ୧୧ଟି ଆସନରେ ବିଜୟୀ ହୋଇଥିବା ବେଳେ ବିଜେପି ୨ଟି ଆସନରେ ଜିତିଛି । ମହାନଗର ନିଗମ ଫଳାଫଳ ଆସି ସାରିଥିବା ବେଳେ ଜିଲ୍ଲା ପରିଷଦ ଭୋଟ୍ ଗଣତି ଜାରି ରହିଛି ।

କେଉଁଠି କାହାକୁ କେତେ ଆସନ ?

ମଣ୍ଡି ମହାନଗର ନିଗମର ମୋଟ ୱାର୍ଡ ସଂଖ୍ୟା ୧୪ । ସେଠି ବିଜେପି ଖାତାକୁ ୧୨ ୱାର୍ଡ ଯାଇଛି । ସେହିଭଳି ୧୭ ୱାର୍ଡ ବିଶିଷ୍ଟ ଧର୍ମଶାଳାରେ ବିଜେପି ୧୭ଟିରେ ଜିତିଛି । ୧୭ ୱାର୍ଡ ବିଶିଷ୍ଟ ସୋଲନରେ ବିଜେପି ପାଇଁ ୧୦ ଆସନ । ୧୫ ୱାର୍ଡ ବିଶିଷ୍ଟ ପାଲମରେ କଂଗ୍ରେସ ୧୧ଟି ୱାର୍ଡରେ ଜିତିଛି ।

ବିଜେପିର ବମ୍ପର ବିଜୟ ପରେ ହିମାଚଳ ପ୍ରଦେଶ ବିଜେପି ପକ୍ଷରୁ ଏକ୍ସରେ ପୋଷ୍ଟ କରାଯାଇଛି । ଲେଖାଯାଇଛି, "ମହାନଗର ନିଗମ ନିର୍ବାଚନରେ ମିଳିଥିବା ସଫଳତା ବିଜେପିର କର୍ମଠ କାର୍ଯ୍ୟକର୍ତ୍ତାଙ୍କ ପରିଶ୍ରମ ଓ ଜନତାଙ୍କ ଆଶୀର୍ବାଦର ପ୍ରତିଫଳନ ।"

ଏଥିସହ ପଢ଼ନ୍ତୁ: ସରକାରୀ ବାସଭବନରେ ଦଳ ବଳ ସହ ପହଞ୍ଚିଲା ପ୍ରଶାସନ; କ'ଣ କହିଲେ ରାବ୍ରି ଦେବୀ? 

ବିଜେପିର ଏହି ପ୍ରଚଣ୍ଡ ବିଜୟ ବିକାଶ ଓ ସୁଶାସନର ବିଜୟ ଅଟେ । ହିମାଚଳର ଜନତା କଂଗ୍ରେସ ସରକାରଙ୍କ ରାଜନୀତିକୁ ଏଡ଼ାଇ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ଵ ଉପରେ ପୁଣି ଥରେ ଅତୁଟ ବିଶ୍ଵାସ ଓ ଭରସା ଜ୍ଞାପନ କରିଛନ୍ତି ବୋଲି ଲେଖିଛି ବିଜେପି ।

ହିମାଚଳ ପ୍ରଦେଶର ମୋଟ ୬୩ଟି ୱାର୍ଡରେ ହୋଇଥିବା ନିର୍ବାଚନରେ ବିଜେପି ୩୭ଟିରେ ଜିତିଛି । ଯେତେବେଳେ କି କଂଗ୍ରେସ ୨୩ଟି ଅକ୍ତିଆର୍ କରିଛି । ସେଥିରୁ ଏକାକୀ ପାଲମପୁରରେ ୧୧ଟି ୱାର୍ଡ ରହିଛି । ମହାନଗର ନିଗମ ନିର୍ବାଚନକୁ ହିମାଚଳ ପ୍ରଦେଶର ବିଧାନସଭା ନିର୍ବାଚନ ପୂର୍ବରୁ ସେମିଫାଇନାଲ୍ ବିବେଚନା କରାଯାଉଛି ।