Dharmendra Good Works / ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତର ରୂପକାର; କେନ୍ଦ୍ର ଶିକ୍ଷାମନ୍ତ୍ରୀ ଭାବେ ଧର୍ମେନ୍ଦ୍ର ପ୍ରଧାନଙ୍କ ଉଲ୍ଲେଖନୀୟ ଅବଦାନ

ଭୁବନେଶ୍ଵର: ଦେଶର ଯୁବବର୍ଗଙ୍କ ଆକାଂକ୍ଷା, ଭାବନା ଏବଂ ସେମାନଙ୍କ ନ୍ୟାୟୋଚିତ ଅପେକ୍ଷାକୁ ଗଭୀର ସମ୍ମାନ ଜଣାଇ ଶେଷରେ କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଧର୍ମେନ୍ଦ୍ର ପ୍ରଧାନ । କେନ୍ଦ୍ର ଶିକ୍ଷାମନ୍ତ୍ରୀ ଭାବେ ଧର୍ମେନ୍ଦ୍ର ପ୍ରଧାନଙ୍କ କାର୍ଯ୍ୟକାଳ ଭାରତୀୟ ଶିକ୍ଷା ବ୍ୟବସ୍ଥାରେ ଅନେକ ଦୂରଗାମୀ ପରିବର୍ତ୍ତନ ପାଇଁ ସ୍ମରଣୀୟ ହୋଇ ରହିବ । ତାଙ୍କ ନେତୃତ୍ୱରେ ଶିକ୍ଷା କ୍ଷେତ୍ରରେ ଏଭଳି ଅନେକ ସଂସ୍କାରମୂଳକ ପଦକ୍ଷେପ ଗ୍ରହଣ କରାଯାଇଥିଲା, ଯାହା କେବଳ ବର୍ତ୍ତମାନ ନୁହେଁ, ଆଗାମୀ ପିଢ଼ିର ଶିକ୍ଷା ବ୍ୟବସ୍ଥାକୁ ମଧ୍ୟ ପ୍ରଭାବିତ କରିବ ।

ଶିକ୍ଷା କ୍ଷେତ୍ରରେ ଧର୍ମେନ୍ଦ୍ର ଆଣିଥିବା ଅନେକ ଐତିହାସିକ ସଂସ୍କାର

• ଜାତୀୟ ଶିକ୍ଷା ନୀତି-୨୦୨୦

ଧର୍ମେନ୍ଦ୍ର ପ୍ରଧାନଙ୍କ କାର୍ଯ୍ୟକାଳର ସବୁଠାରୁ ବଡ଼ ସଫଳତା ହେଉଛି 'ଜାତୀୟ ଶିକ୍ଷା ନୀତି-୨୦୨୦ (NEP 2020)'ର ବ୍ୟାପକ କାର୍ଯ୍ୟକାରୀ ରୂପାୟନ । ଦଶନ୍ଧି ପରେ ଦେଶର ଶିକ୍ଷା ନୀତିରେ ହୋଇଥିବା ଏହି ବଡ଼ ପରିବର୍ତ୍ତନ ମାଧ୍ୟମରେ ପାରମ୍ପରିକ ୧୦+୨ ପଦ୍ଧତି ବଦଳରେ ୫+୩+୩+୪ ଶିକ୍ଷା ଢାଞ୍ଚା ପ୍ରଚଳନ ହୋଇଥିଲା। ବହୁବିଷୟକ ଶିକ୍ଷା ବା ମଲ୍ଟିଡିସିପ୍ଲିନାରୀ ଏଜୁକେସନ୍, ନିଜ ପସନ୍ଦର ବିଷୟ ଚୟନ ଏବଂ ଦକ୍ଷତାଭିତ୍ତିକ ଶିକ୍ଷାକୁ ପ୍ରାଧାନ୍ୟ ଦେଇ ଭାରତୀୟ ଶିକ୍ଷାକୁ ବିଶ୍ୱସ୍ତରୀୟ କରିବାର ପ୍ରୟାସ କରାଯାଇଥିଲା ।

• ପ୍ରାଥମିକ ଶିକ୍ଷାର ଗୁଣବତ୍ତା ପାଇଁ 'ନିପୁଣ ଭାରତ'

ଦେଶରେ ପ୍ରାଥମିକ ଶିକ୍ଷାର ଗୁଣବତ୍ତା ବୃଦ୍ଧି ପାଇଁ ନିପୁଣ ଭାରତ (NIPUN Bharat) ମିଶନକୁ ଅଧିକ ସୁଦୃଢ଼ କରାଯାଇଥିଲା । ତୃତୀୟ ଶ୍ରେଣୀ ସୁଦ୍ଧା ପ୍ରତ୍ୟେକ ଶିଶୁ ମୌଳିକ ଶିକ୍ଷା ଓ ଗଣିତ ଦକ୍ଷତା ହାସଲ କରିବା ଲକ୍ଷ୍ୟରେ ଏହି ଅଭିଯାନ ଦେଶବ୍ୟାପୀ ଭାବେ କାର୍ଯ୍ୟକାରୀ ହୋଇଥିଲା । ଏହାଦ୍ଵାରା କୁନିପିଲାଙ୍କୁ ସଅଳ ଶିକ୍ଷାଦାନ କରାଯିବା ସହ ପାଠପଢାରେ ଯେପରି କୌଣସି ବ୍ରେକ୍ ଲାଗିବ ନାହିଁ ତାହା ଉପରେ ଧ୍ୟାନ ଦିଆଯାଇଥିଲା ।

• ଉଚ୍ଚଶିକ୍ଷା କ୍ଷେତ୍ରରେ ଯୁଗାନ୍ତକାରୀ ପଦକ୍ଷେପ

ଉଚ୍ଚଶିକ୍ଷା କ୍ଷେତ୍ରରେ ମଧ୍ୟ ତାଙ୍କ ନେତୃତ୍ୱରେ ଅନେକ ଯୁଗାନ୍ତକାରୀ ପଦକ୍ଷେପ ନିଆଯାଇଥିଲା । ଏକାଡେମିକ୍ ବ୍ୟାଙ୍କ ଅଫ୍ କ୍ରେଡିଟ୍ (ABC) ଏବଂ ମଲ୍ଟିପଲ୍ ଏଣ୍ଟ୍ରି-ଏକ୍ସିଟ୍ ବ୍ୟବସ୍ଥା ମାଧ୍ୟମରେ ଛାତ୍ରଛାତ୍ରୀମାନେ ପାଠପଢ଼ାକୁ ନିଜ ସୁବିଧା ଅନୁଯାୟୀ ଜାରି ରଖିବାର ସୁଯୋଗ ପାଇଥିଲେ । ସେହିପରି ନ୍ୟାସନାଲ୍ କ୍ରେଡିଟ୍ ଫ୍ରେମୱାର୍କ (NCrF) ମାଧ୍ୟମରେ ସ୍କୁଲ ଶିକ୍ଷା, ଉଚ୍ଚଶିକ୍ଷା ଓ ଧନ୍ଦାମୂଳକ ଶିକ୍ଷାକୁ ଏକ ସୂତ୍ରରେ ବାନ୍ଧିବାର ପ୍ରୟାସ କରାଯାଇଥିଲା ।

• ଡିଜିଟାଲ ଯୁଗରେ ଡିଜିଟାଲ ଶିକ୍ଷାକୁ ଗୁରୁତ୍ଵ

ଡିଜିଟାଲ୍ ଶିକ୍ଷାର ବିସ୍ତାର କ୍ଷେତ୍ରରେ ମଧ୍ୟ ତାଙ୍କ ଭୂମିକା ଉଲ୍ଲେଖନୀୟ । DIKSHA, SWAYAM ଓ ଭର୍ଚୁଆଲ୍ ଲ୍ୟାବ୍ ପରି ପ୍ଲାଟଫର୍ମକୁ ସୁଦୃଢ଼ କରାଯାଇ ଛାତ୍ରଛାତ୍ରୀଙ୍କ ପାଖରେ ଡିଜିଟାଲ୍ ମାଧ୍ୟମରେ ଶିକ୍ଷା ପହଞ୍ଚାଇବାରେ ବଡ଼ ସଫଳତା ମିଳିଥିଲା । ବିଶେଷକରି କୋଭିଡ୍ ପରବର୍ତ୍ତୀ ସମୟରେ ପ୍ରଯୁକ୍ତିବିଦ୍ୟା ବା ଟେକ୍ନୋଲୋଜି ଉପରେ ନିର୍ଭର ଶିକ୍ଷାକୁ ଲୋକପ୍ରିୟ କରିବାରେ ଏହି ପଦକ୍ଷେପ ବେଶ ସହାୟକ ହୋଇଥିଲା ।

• ଦକ୍ଷତା ବିକାଶକୁ ବି ଗୁରୁତ୍ଵ

ଶିକ୍ଷା ସହ ଦକ୍ଷତା ବିକାଶକୁ ଯୋଡ଼ିବା ଉପରେ ମଧ୍ୟ ଧର୍ମେନ୍ଦ୍ର ପ୍ରଧାନ ବିଶେଷ ଗୁରୁତ୍ୱ ଦେଇଥିଲେ । ସ୍କୁଲ ସ୍ତରରୁ ଧନ୍ଦାମୂଳକ ଶିକ୍ଷା, ଇଣ୍ଟର୍ନଶିପ୍ ଏବଂ ଶିଳ୍ପ ସଂସ୍ଥା ସହ ସମନ୍ୱୟକୁ ପ୍ରୋତ୍ସାହନ ଦେଇ ଛାତ୍ରଛାତ୍ରୀଙ୍କୁ ଭବିଷ୍ୟତର ରୋଜଗାର ବଜାର ପାଇଁ ପ୍ରସ୍ତୁତ କରିବାରେ ପଦକ୍ଷେପ ନିଆଯାଇଥିଲା । ଉଚ୍ଚଶିକ୍ଷାର ନିୟାମକ ବ୍ୟବସ୍ଥାରେ ସ୍ୱଚ୍ଛତା, ଗୁଣବତ୍ତା ଓ ସ୍ୱାୟତ୍ତତା ବୃଦ୍ଧି ପାଇଁ ମଧ୍ୟ ବିଭିନ୍ନ ସଂସ୍କାର ଆଗକୁ ବଢ଼ାଯାଇଥିଲା ।

ପଢନ୍ତୁ ଏହି ଖବର: ପ୍ରଧାନମନ୍ତ୍ରୀଙ୍କୁ ଇସ୍ତଫା ପତ୍ର ପଠାଇଲେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ

ମୋଟାମୋଟି ଭାବେ ଦେଖିଲେ, କେନ୍ଦ୍ର ଶିକ୍ଷାମନ୍ତ୍ରୀ ଭାବେ ଧର୍ମେନ୍ଦ୍ର ପ୍ରଧାନଙ୍କ କାର୍ଯ୍ୟକାଳ ଭାରତୀୟ ଶିକ୍ଷା ବ୍ୟବସ୍ଥାକୁ ଅଧିକ ଆଧୁନିକ, ନମନୀୟ ଏବଂ ଦକ୍ଷତାଭିତ୍ତିକ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ଭାବେ ବିବେଚିତ ହେବ । ତାଙ୍କ ନେତୃତ୍ୱରେ ଆରମ୍ଭ ହୋଇଥିବା ଏହି ସଂସ୍କାରଗୁଡ଼ିକ ଆଗାମୀ ବର୍ଷଗୁଡ଼ିକରେ ମଧ୍ୟ ଭାରତର ଶିକ୍ଷା ବ୍ୟବସ୍ଥାକୁ ନୂଆ ଦିଗ ଦେବ ବୋଲି ଆଶା କରାଯାଉଛି ।