ନୂଆଦିଲ୍ଲୀ: ଯେଉଁଠି ବିନା ଭେଦଭାବରେ ବିକାଶ ହୁଏ, ସେଠି ବିଶ୍ଵସନୀୟତା ସୃଷ୍ଟି ହୁଏ । ANIକୁ ସାକ୍ଷାତକାର ଦେଇ ବିହାର ବିଧାନସଭା ନିର୍ବାଚନରେ ବିଜେପିର ପ୍ରଭାରୀ ଥିବା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବଡ଼ କଥା କହିଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, "NDAର ବିଶ୍ଵସନୀୟତା ରହିଛି । ବିହାରରେ ପ୍ରାୟ ୩୦ ବର୍ଷ ହେଲା NDA ରହିଛି । ବିଗତ ୨୦ ବର୍ଷ ହେଲା ନୀତିଶ କୁମାର ବିହାର ମୁଖ୍ୟମନ୍ତ୍ରୀ ଅଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମୟରେ ଯେତିକି ଯୋଜନା ହୋଇଛି, ସେଥିରେ ପୂର୍ବ ଭାରତୀୟ ରାଜ୍ୟରେ ସର୍ବାଧିକ ଲାଭ ପାଇଛି ବିହାର । ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ମଧ୍ୟ ଲାଭାନ୍ଵିତ ହୋଇଛନ୍ତି ।"

ସେ ଆହୁରି କହିଛନ୍ତି, "ଚଳିତ ନିର୍ବାଚନରେ ୨ ବ୍ୟକ୍ତିଙ୍କ ବିଶ୍ଵସନୀୟତା ହେଉଛି ମୁଖ୍ୟ । ନିର୍ବାଚନରେ ପ୍ରତିଦ୍ଵନ୍ଦ୍ଵୀ ରହିବେ । କାମ ଓ ନୂତନ ଆକାଂକ୍ଷା ଅନୁସାରେ ଲୋକେ ସମର୍ଥନ କରନ୍ତି । ବିହାର, ଏମିତି ଏକ ରାଜ୍ୟ ଯାହା ସମୟ ସହ ଆଗକୁ ବଢ଼ୁଛି । ବିହାରକୁ ଭରସା ଦରକାର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ନୀତିଶ କୁମାର ବିଶ୍ଵସନୀୟ ଚେହେରା, ଯାହାଙ୍କୁ ବିହାର ବିଶ୍ଵାସ ଓ ଭରସା କରୁଛି । ମୋ ଭଳି ରାଜନେତା ଏଥିରେ ସହଯୋଗ କରିବା ଦ୍ଵାରା ଆମକୁ ନୂଆ ଅଭିଜ୍ଞତା ସହ ଅନେକ କିଛି ଶିଖିବାକୁ ମିଳୁଛି ।"

ଏଥିସହ ପଢ଼ନ୍ତୁ: ଦିଲ୍ଲୀରେ ନିର୍ମାଣ ହେବ 'ସ୍ପୋର୍ଟ୍ସ ସିଟି', ଭଙ୍ଗାଯିବ ଜବାହରଲାଲ ନେହେରୁ ଷ୍ଟାଡିୟମ୍

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିହାର ନିର୍ବାଚନ ଘୋଷଣା ପୂର୍ବରୁ ପ୍ରାୟ ୭ରୁ ୮ ଥର ନୀତିଶ କୁମାରଙ୍କ ଆମନ୍ତ୍ରଣରେ ବିହାର ଆସିଛନ୍ତି, ଅନେକ ପ୍ରକଳ୍ପର ଶୁଭାରମ୍ଭ କରିଛନ୍ତି । NDAର ଔପଚାରିକ ଅଭିଯାନ ଅକ୍ଟୋବର ୨୪ରୁ ଭାରତରତ୍ନ କର୍ପୁରୀ ଠାକୁରଙ୍କ ଗାଁ ସମସ୍ତିପୁରରୁ ଆରମ୍ଭ ହୋଇଥିଲା । ଯେଉଁଥିରେ NDAର ସମସ୍ତ ନେତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମୁଖ୍ୟମନ୍ତ୍ରୀ ନୀତିଶ କୁମାର, ଚିରାଗ ପାଶୱାନ, ଜିତନରାମ ମାଞ୍ଝୀ, ଉପେନ୍ଦ୍ର କୁଶୱାହାଙ୍କ ସହ ବିହାର ବିଜେପିର ସମସ୍ତ ନେତା ଉପସ୍ଥିତ ଥିଲେ । ଏହା ଆମ ଯୋଜନାର ଅଂଶ ଥିଲା ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, "ଆମେ ନିଷ୍ପତ୍ତି ନେଇଥିଲୁ ଭିନ୍ନ ଭିନ୍ନ ପ୍ରଚାର କରିବୁ । ତେବେ ଛଟ୍, ବର୍ଷା ପାଇଁ ପ୍ରଚାର ସମୟ ଟିକିଏ ସଂକୁଚିତ ହୋଇଥିଲା । ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ଗୃହମନ୍ତ୍ରୀ, ରକ୍ଷା ମନ୍ତ୍ରୀ, ରାଷ୍ଟ୍ରୀୟ ଅଧ୍ୟକ୍ଷ, NDA ନେତାଙ୍କ ପାଇଁ ଭିନ୍ନ ଭିନ୍ନ ପ୍ରଚାର ଯୋଜନା ହୋଇଥିଲା ।"

ଏଥିସହ ପଢ଼ନ୍ତୁ: ଆସନ୍ତାକାଲି ବିହାରରେ ଶେଷ ପର୍ଯ୍ୟାୟ ଭୋଟ୍, ୧୩୦୨ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ଜନତା


୧୯୯୬ରେ NDAର ଗଠନ ହୋଇଥିଲା । ୨୦୦୫ରୁ ନୀତିଶ ବାବୁ ଆମ ମୁଖ୍ୟମନ୍ତ୍ରୀ ଅଛନ୍ତି । ତିନି ତିନୋଟି ବିଧାନସଭା ଓ ଲୋକସଭା ନିର୍ବାଚନ NDA ଏକାଠି ଲଢ଼ିଛି । ଭୋଟରଙ୍କ ମନରେ କୌଣସି ଦ୍ଵନ୍ଦ୍ଵ ନାହିଁ । ଭାରତୀୟ ରାଜନୀତିରେ ନୀତିଶ ବାବୁଙ୍କ ଭଳି ଥଣ୍ଡା ମସ୍ତିଷ୍କ ରାଜନେତା ବହୁତ କମ୍ ଦେଖିଛି । ନୀତିଶ କୁମାର ଜଣେ ପରିପକ୍ଵ ବ୍ୟକ୍ତିତ୍ଵ । NDA ଏକ ରାଜନୈତିକ ମଞ୍ଚ ନୁହେଁ, ଏହା ଏକ ସାମାଜିକ ମେଣ୍ଟ । NDAରେ ଅନେକ ଦଳ ରହିଛି, ଅନେକ ଭିନ୍ନତା ରହିଛି । ତଥାପି ଅନେକ ପ୍ରସଙ୍ଗରେ ଏକମତ ରହିଛୁ । ବିହାରର ଉଜ୍ଜ୍ଵଳ ଭବିଷ୍ୟତ ପାଇଁ ଏହା ୧୦୦ ପ୍ରତିଶତ ଗ୍ୟାରେଣ୍ଟିର ସୂତ୍ର ବୋଲି କହିଛନ୍ତି ଧର୍ମେନ୍ଦ୍ର ପ୍ରଧାନ ।