ମମତା ବାନାର୍ଜୀଙ୍କୁ ଆଜି ଦୁଇଟି ବଡ଼ ଝଟକା ଲାଗିଛି । ଗୋଟିଏ ପଟେ ସୁଖେନ୍ଦୁ ରାୟ ଟିଏମସିରୁ ଇସ୍ତଫା ଦେଇଛନ୍ତି । ଅନ୍ୟପଟେ ଟିଏମସିର ଫାୟାରବ୍ରାଣ୍ଡ ନେତା ଜାହାଙ୍ଗୀର ଖାନଙ୍କୁ ପୋଲିସ ଗିରଫ କରିଛି । ପଶ୍ଚିମବଙ୍ଗ ବିଧାନସଭା ନିର୍ବାଚନରେ ​​ଶୋଚନୀୟ ପରାଜୟ ପରେ ମମତା ବାନାର୍ଜୀ ଗୋଟିଏ ପରେ ଗୋଟିଏ ଝଟକାର ସମ୍ମୁଖୀନ ହେଉଛନ୍ତି । ପ୍ରଥମେ ଋତବ୍ରତ ବାନାର୍ଜୀ ଅଧାରୁ ଅଧିକା ଟିଏମସି ବିଧାୟକଙ୍କୁ ନିଜ ସପକ୍ଷରେ ଆଣିଥିଲେ । ଏବେ ଅନ୍ୟ ନେତାମାନେ ବି ଧୀରେ ଧୀରେ ମମତାଙ୍କ ହାତ ଛାଡୁଛନ୍ତି ।

• ୪ ଦିନ ପୂର୍ବରୁ ସଙ୍କେତ ଦେଇଥିଲେ ସୁଖେନ୍ଦ୍ର

ସୁଖେନ୍ଦୁ ଶେଖର ରାୟ ଚାରି ଦିନ ପୂର୍ବରୁ ରାଜ୍ୟସଭାରୁ ଇସ୍ତଫା ଦେବାର ସଙ୍କେତ ଦେଇସାରିଥିଲେ । ଜୁନ ୪ ତାରିଖରେ ସେ ଦାବି କରିଥିଲେ ଯେ ଲୋକସଭା ଏବଂ ରାଜ୍ୟସଭାର କିଛି ଟିଏମସି ସାଂସଦ ଇସ୍ତଫା ଦେଇପାରନ୍ତି । ଏବେ ସୁଖେନ୍ଦୁ ଶେଖର ରାୟ ପ୍ରଥମେ ଇସ୍ତଫା ଦେଇଛନ୍ତି । ଟିଏମସି ଭିତରେ ବଢ଼ୁଥିବା ଅସନ୍ତୋଷ ବିଷୟରେ ମଧ୍ୟ ସୁଖେନ୍ଦୁ କହିଥିଲେ । ଫଳସ୍ୱରୂପ ଅଧିକ ଟିଏମସି ସାଂସଦ ଖୁବଶୀଘ୍ର ମମତା ବାନାର୍ଜୀଙ୍କୁ ବାଏ ବାଏ କରିପାରନ୍ତି ।

• ରାଜ୍ୟସଭାରେ ଏବେ କେତେ ଜଣ TMC ସାଂସଦ ?

ପଶ୍ଚିମବଙ୍ଗରେ ମୋଟ ୧୭ଟି ରାଜ୍ୟସଭା ଆସନ ଅଛି, ଯେଉଁଥିରୁ ୧୩ଟି ଟିଏମସି ପାଖରେ ଏବଂ ୩ଟି ବିଜେପି ପାଖରେ ଅଛି । ଟିଏମସି ସାଂସଦଙ୍କ ଇସ୍ତଫା ପରେ ଏଠାରେ ଏକ ଉପନିର୍ବାଚନ ଅନୁଷ୍ଠିତ ହେବ, ଯାହା ବିଜେପିକୁ ଲାଭ ଦେଇପାରେ । କାରଣ ମମତା ବାନାର୍ଜୀଙ୍କ ଟିଏମସି ଏବେ ବିଭାଜନର ସାମ୍ନା କରୁଛି । ଅନେକ ନେତା ଦଳ ଛାଡୁଛନ୍ତି ।

• ଦାଦାବଟି ଆଦାୟ ଅଭିଯୋଗରେ ଜାହାଙ୍ଗୀର ଖାନ ଗିରଫ

ଆଜି ଉତ୍ତର ବଙ୍ଗର ଭାରତ-ନେପାଳ ସୀମା ନିକଟରୁ ଟିଏମସି ନେତା ଜାହାଙ୍ଗୀର ଖାନଙ୍କୁ ଦାଦାବଟି ଆଦାୟ ଅଭିଯୋଗରେ ଗିରଫ କରାଯାଇଛି । ପୋଲିସ କହିଛି ଯେ କଲିକତା ହାଇକୋର୍ଟ ମେ ୨୬ ତାରିଖରେ ଜାହାଙ୍ଗୀର ଖାନଙ୍କୁ ଦିଆଯାଇଥିବା ଗିରଫଦାରୀରୁ ମଧ୍ୟବର୍ତ୍ତୀକାଳୀନ ସୁରକ୍ଷା ପ୍ରତ୍ୟାହାର କରିନେଇଛି । ଦକ୍ଷିଣ ୨୪ ପ୍ରଗଣା ଜିଲ୍ଲାର ଫାଲଟା ପୋଲିସ ଷ୍ଟେସନରେ ଜାହାଙ୍ଗୀର ଖାନଙ୍କ ବିରୁଦ୍ଧରେ ୭ଟି ଏଫଆଇଆର ରୁଜୁ ହୋଇଛି ।

ପଢନ୍ତୁ ଏହି ଖବର: ବଡ଼ ଅଫର ଦେଲେ ହୁମାଁୟୁ କବୀର; ମାନିବେ କି ମମତା ବାନାର୍ଜୀ?

ଜଣେ ପୋଲିସ ଅଧିକାରୀ କହିଛନ୍ତି, "ଜାହାଙ୍ଗୀର ଖାନଙ୍କୁ ଉତ୍ତର ବଙ୍ଗର ଭାରତ-ନେପାଳ ସୀମାବର୍ତ୍ତୀ ଅଞ୍ଚଳରୁ ଗିରଫ କରାଯାଇଛି ।" କିନ୍ତୁ ପୋଲିସ ଗିରଫଦାରୀ ବିଷୟରେ ଅଧିକ ତଥ୍ୟ ପ୍ରଦାନ କରିନାହିଁ । ଗତ ମେ ୨୧ ତାରିଖରେ ଫାଲଟା ବିଧାନସଭା ଉପନିର୍ବାଚନରେ ​​ଜାହାଙ୍ଗୀର ଖାନ ଚତୁର୍ଥ ସ୍ଥାନରେ ରହିଥିଲେ । ଯଦିଓ ସେ ନିର୍ବାଚନର କିଛି ଦିନ ପୂର୍ବରୁ ତାଙ୍କ ପ୍ରାର୍ଥୀତ୍ୱ ପ୍ରତ୍ୟାହାର ଘୋଷଣା କରିଥିଲେ, ପ୍ରତ୍ୟାହାର ଅବଧି ଶେଷ ହୋଇଯାଇଥିଲା, ତେଣୁ ତାଙ୍କ ନାମ ଇଭିଏମରେ ପଞ୍ଜିକୃତ ହୋଇ ରହିଥିଲା । ଏହା ତାଙ୍କର ବ୍ୟକ୍ତିଗତ ନିଷ୍ପତ୍ତି ଥିବା ଦଳ କହିଥିଲା । ଆଜି ନେପାଳ ଦେଇ ପଳାୟନ କରୁଥିବାବେଳେ ତାଙ୍କୁ ପୋଲିସ ଗିରଫ କରିଛି ।