ଆସାମରେ ଆସିଲା ନିର୍ବାଚନୀ ଫଳ । ମାଟି କାମୁଡିଲେ ରାଜ୍ୟ କଂଗ୍ରେସ ମୁଖିଆ । ରାଜ୍ୟର ଅନ୍ୟତମ ହାଇପ୍ରୋଫାଇଲ ଆସନ ଜୋରାହାଟରୁ ବିଜେପି ପ୍ରାର୍ଥୀଙ୍କଠାରୁ ହାରିଛନ୍ତି ଆସାମ କଂଗ୍ରେସ ରାଜ୍ୟ ସଭାପତି ଗୌରବ ଗୋଗୋଇ । ବିଜେପିର ହିତେନ୍ଦ୍ର ନାଥ ଗୋସ୍ଵାମୀଙ୍କଠାରୁ ସେ ୨୩ ହଜାରରୁ ଅଧିକ ଭୋଟରେ ହାରିଛନ୍ତି । ଆସାମରେ କଂଗ୍ରେସର ମୁଖ୍ୟମନ୍ତ୍ରୀ ଚେହେରା କୁହାଯାଉଥିବା ଗୋଗେଇଙ୍କ ହାର ପରେ ଆସାମ କଂଗ୍ରେସକୁ ବଡ଼ ଝଟକା ଲାଗିଛି । ସବୁଠୁ ବଡ଼ କଥା ହେଉଛି ଗୌରବ ଗୋଗୋଇ ଲୋକସଭା ନିର୍ବାଚନରେ ଜୋରାହାଟରୁ ଜିତି ସ୍ଥାନୀୟ ସାଂସଦ ଥିବାବେଳେ ବିଧାନସଭା ନିର୍ବାଚନରେ ଜୋରାହାଟରୁ ମାଟି କାମୁଡିିଛନ୍ତି ।  

• କଂଗ୍ରେସକୁ ଗୌରବ ଝଟକା

ହାଇପ୍ରୋଫାଇଲ ଜୋରାହାଟରୁ ଗୌରବ ଗୋଗୋଇଙ୍କ ପରାଜୟ କଂଗ୍ରେସକୁ ବଡ଼ ଝଟକା ଦେଇଛି । କାରଣ ଗୋଗୋଇ ଆସାମ କଂଗ୍ରେସର ପ୍ରମୁଖ ନେତା । ଆସାମରେ କଂଗ୍ରେସକୁ ବିଜୟ ଦେବା ଗୋଗୋଇଙ୍କ କାନ୍ଧରେ ଥିଲା, କିନ୍ତୁ ଗୌରବ ଗୋଗୋଇ ଆସାମରେ ନିଜ ନିର୍ବାଚନ ମଣ୍ଡଳୀକୁ ବି ବଞ୍ଚାଇପାରିଲେ ନାହିଁ । ଜୋରାହାଟରେ ତାଙ୍କୁ ଛୋଟ ନୁହେଁ, ବରଂ ଶୋଚନୀୟ ପରାଜୟ ମିଳିଛି । ଗୌରବଙ୍କୁ ଜୋରାହାଟରେ ୪୬,୨୫୭ ଖଣ୍ଡ ଭୋଟ୍ ମିଳିଥିବାବେଳେ ବିଜେପିର ହିତେନ୍ଦ୍ରଙ୍କୁ ୬୯,୪୩୯ ଖଣ୍ଡ ଭୋଟ୍ ମିଳିଛି । ବିଜେପିର ହିତେନ୍ଦ୍ର ଗୋଗୋଇଙ୍କୁ ୨୩ ହଜାର ୧୮୨ ଖଣ୍ଡ ଭୋଟରେ ପରାସ୍ତ କରିଛନ୍ତି । ଏହା ଦର୍ଶାଉଛି ଯେ ଆସାମରେ ଦୁର୍ବଳ ହେଉଛି କଂଗ୍ରେସ ।

• ପ୍ରଥମ ଥର ବିଧାନସଭା ନିର୍ବାଚନ ଲଢୁଥିଲେ

ଗୌରବ ଗୋଗୋଇ ପ୍ରଥମ ଥର ଲାଗି ବିଧାନସଭା ନିର୍ବାଚନରେ ମୈଦାନକୁ ଓହ୍ଲାଇଥିଲେ । ସେପଟେ ବିଜେପିର ୫ ଥରର ବିଧାୟକ ହିତେନ୍ଦ୍ର ଗୋସ୍ଵାମୀ ନିଜ ବିଜୟ ଧାରା ଜାରି ରଖିବା ପ୍ରୟାସରେ ଥିଲେ, ଯେଉଁଥିରେ ଶେଷରେ ସେ ସଫଳତା ହାସଲ କରିଛନ୍ତି । ଲୋକସଭାରେ କଂଗ୍ରେସର ଉପନେତା ଗୌରବ ଗୋଗୋଇ ୨୦୨୪ ଲୋକସଭା ନିର୍ବାଚନରେ ବିଜେପିର ତପନ କୁମାର ଗୋଗୋଇଙ୍କୁ ୧,୪୪,୩୯୩ ଖଣ୍ଡ ଭୋଟରେ ହରାଇ ଜୋରାହାଟ ଲୋକସଭା ଆସନ ଜିତିଥିଲେ । କିନ୍ତୁ ଚଳିତ ବିଧାନସଭାନ ନିର୍ବାଚନରେ ପ୍ରଥମ ରାଉଣ୍ଡରୁ ହିଁ ପଛରେ ପଡ଼ିଯାଇଥିଲେ ଗୌରବ । ଆଉ ଶେଷରେ ବିଜେପିର ହିତେନ୍ଦ୍ରଙ୍କଠାରୁ ବହୁ ଭୋଟ୍ ବ୍ୟବଧାନରେ ହାରିଛନ୍ତି ।

ପଢନ୍ତୁ ଏହି ଖବର: ଜାଲୁକବାରିରେ ଲିଡ୍ କରୁଛନ୍ତି ହିମନ୍ତ; ଜାରି ରହିବ କି ୨୫ ବର୍ଷର ବିଜୟ ଧାରା ?

ସୂଚନା ଥାଉ କି, ୯ ଏପ୍ରିଲରେ ଆସାମରେ ବିଧାନସଭା ନିର୍ବାଚନ ପାଇଁ ପଡ଼ିଥିଲା ଭୋଟ୍ । ରାଜ୍ୟରେ ପରାୟ ୨.୫୦ କୋଟିରୁ ଧିକ ଭୋଟର ଗଣତନ୍ତ୍ରର ମହାପର୍ବରେ ସାମିଲ ହୋଇ ୮୫.୯୬% ମତଦାନ କରିଥିଲେ । ଏଥର ନିର୍ବାଚନ ମୈଦାନରେ ମୋଟ ୭୨୨ ଜଣ ପ୍ରାର୍ଥୀ ଥିଲେ, ଯେଉଁଥିରେ ୫୯ ମହିଳା ପ୍ରାର୍ଥୀ ସାମିଲ । କଂଗ୍ରେସ ସବୁଠାରୁ ଅଧିକ ୯୯ ପ୍ରାର୍ଥୀ ଦେଇଥିଲା ଏବଂ ଶାସକ ଦଳ ବିଜେପି ୯୦ ପ୍ରାର୍ଥୀ ଦେଇଥିଲା । ଅନ୍ୟପଟେ ଅଲ୍ ଇଣ୍ଡିଆ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (AIUDF) ୩୦ ଆସନରେ ନିର୍ବାଚନ ଲଢିଥିଲା ।

ପଢନ୍ତୁ ଏହି ଖବର: ଆସାମରେ ହ୍ୟାଟ୍ରିକ୍ ବିଜୟ ମାରିବ କି ବିଜେପି ? ପ୍ରାରମ୍ଭିକ ଟ୍ରେଣ୍ଡରେ ୯୯ ଆସନରେ ଆଗୁଆ

• ଏହି ନେତାଙ୍କୁ ଦେଖିଛି ଜୋରାହାଟ

ଆସାମର ରାଜନୈତିକ ଦୃଷ୍ଟିରୁ ଏହା ଆଉ ଏକ ଗୁରୁତ୍ୱପୂର୍ଣ୍ଣ ଆସନ । ଏଥର ନିର୍ବାଚନରେ ୫ ଥର ବିଧାୟକ ଥିବା ବିଜେପିର ହିତେନ୍ଦ୍ର ନାଥ ଗୋସ୍ୱାମୀ ଏହି ଆସନରୁ ଆସାମ କଂଗ୍ରେସ ମୁଖ୍ୟ ଏବଂ ସ୍ଥାନୀୟ ସାଂସଦ ଗୌରବ ଗୋଗୋଇଙ୍କ ବିରୋଧରେ ଲଢିଥିଲେ । ଗୋଗୋଇ ଏହି ଆସନରୁ ନିଜର ବିଧାନସଭା ନିର୍ବାଚନ ଡେବ୍ୟୁ କରିଥିଲେ । ଏହି ନିର୍ବାଚନମଣ୍ଡଳୀ ୨୦୧୬ ମସିହାରୁ ବିଜେପି ହାତରେ ଅଛି । ବିଜେପି ପ୍ରାର୍ଥୀ ଗୋସ୍ୱାମୀ ୨୦୨୧ ବିଧାନସଭା ନିର୍ବାଚନରେ ​​୬୮,୦୦୦ ଭୋଟ ପାଇ କଂଗ୍ରେସର ରାଣା ଗୋସ୍ୱାମୀଙ୍କୁ ପରାସ୍ତ କରି ବିଜୟୀ ହୋଇଥିଲେ । ମାତ୍ର ୨୦୨୪ ସାଧାରଣ ନିର୍ବାଚନରେ ପରିବର୍ତ୍ତନର ସ୍ଵର ଦେଖିବାକୁ ମିଳିଥିଲା ଏବଂ ଗୋଗୋଇ, ସାଧାରଣ ନିର୍ବାଚନରେ ଜୋରାହାଟରୁ ବିଜୟୀ ହୋଇଥିଲେ ।